Rəsul Rəzəvinin azadlığını tələb edən İmzatoplama Kampaniyası başladılıb

SON XƏBƏRLƏR

Rəsul Rəzəvinin azadlığını tələb edən İmzatoplama Kampaniyası başladılıb

2021.10.20, 07:36

Gunaz.tv

GünAz TV: Təbriz zindanında məhbus həyatı yaşayan azərbaycanlı milli-mədəni fəal Rəsul Rəzəvinin azadlığını tələb edən İmzatoplama Kampaniyası başladılıb.

Oktyabrın 8-də işə başlayan kampaniyaya qısa müddətdə çox sayda soydaşımız qatılıb.

İmzatoplama Kampaniyasının mətnində qeyd olunur ki, “Rəsul Rəzəvi 2015-ci il noyabrın 9-da 40 milyon Azərbaycan türkünü təhqiri edən İran televiziyasının irqçi “Fitilə” verilişinə etiraz etdiyinə görə 13 ay həbs cəzasına məhkum edilib.”

Azərbaycanlı fəal oktyabrın 4-də Təbriz zindanında yenidən aclıq aksiyasına başlayıb.

ETTELAAT (İran Kəşfiyyat Nazirliyi) İdarəsinin onunla bağlı dosye təşkil etməsi və zindanda qeyri-insani davranışlar və işgəncələrə məruz qaldığına etiraz olaraq aclığa başlayan fəal, azadlığa buraxılanadək aksiyanı davam etdirəcəyini bildirib.

Bundan öncə R.Rəzəvi yaydığı Səs Faylında aclıq aksiyasına başladığını elan edib. “Azərbaycan millətinin hüquqlarının tapdalanması və fars irqçiliyinin kökü Pəhləvi dövrünün əvvələrinə söykənir, bu vəziyyət İslam Cümhuriyyəti dövründə də davam etdirilib və edir. Sistemin əsas məqsədi, İranda yaşayan qeyri-fars millətlərinin dil və mədəniyyətinin məhv edilməsi və fars dilinin onlara sırınmasıdır. Mən bu vəziyyətə etiraz edən bir şəxs kimi, 5 dəfə təhlükəsizlik qüvvələri tərəfindən yaxalanıb və oğurlanmışam. Saxlanıldığım müddətdə isə müxtəlif işgəncələr və təhqirlərə məruz qalmışam. 28 gün aclıq aksiyası keçirdikdən sonra Azərbaycan Milli Hərəkatı ağsaqqlarının müraciətindən sonra aksiyanı dayandırdım, lakin zülmkarların qeyri-insani rəftarları davam etdiyinə görə yenidən aclıq aksiyasına başlamağa qərar verdim, bundan başqa heç bir çıxış yolum yoxdur.”- deyə R.Rəzəvi yaydığı Səs Faylında bildirib.

Azərbaycanlı fəalın müraciəti “Yaşasın Azərbaycan, Yaşasın ana dili, Yaşasın Azərbaycan milləti” sözləri ilə sona çatıb.

Rəsul Rəzəvinin azadlığını tələb edən İmzatoplama Kampaniyasına qoşulmaq üçün Buranı tıklayın.

N.S

GUNAZ.TV

SON XƏBƏRLƏR