Tehranda etirazçılar Xamneyinin posterini cırıblar, aksiyalar gecə saatlarına qədər davam edib- VİDEO

SON XƏBƏRLƏR

Tehranda etirazçılar Xamneyinin posterini cırıblar, aksiyalar gecə saatlarına qədər davam edib- VİDEO

2021.10.20, 07:36

Gunaz.tv

GünAzTV: Dekabrın 30-u axşam saatlarında paytaxt Tehranda hakim molla rejiminə qarşı keçirilən kütləvi etirazlar gecə saatlarına qədər davam edib.

Hakimiyyətin repressiyalarından və ölkənin ağır iqtisadi durumundan cana gələn etirazçılar, Tehranın Hafiz və İnqilab küçələrinin kəsişməsində yerləşən “Kalec” körpüsünün altında toplaşaraq “Xamneyiyə ölüm” şüarları səsləndiriblər. Eyni etirazlar Tehran Universitetində də keçirilib. Tələbələr, yaraqlı polis qüvvələri tərəfindən mühasirəyə alınan universitetin həyətində və əsas qapısında toplaşaraq “Seyid Əli! utan xəcalət çək, ölkədən və hakimiyyətdən əl çək”, “Diktatora ölüm”, “İslahatçı, mühafizəkar söhbəti bizim üçün bitib artıq”, “Millət acından dilənir, Ağa (Xamneyi) isə Allahlıq edir”, və digər şüarlar səsləndiriblər.

Paytaxtın digər küçələrində isə aksiyaçılar Xamneyinin bir posterini cırıblar və polis qüvvələrinin onlara tətbiq etdiyi gözyaşardıcı qazın təsirini zərərsizləşdirmək üçün küçələrdəki zibil yeşiklərinə od vurublar. Yayılan bəzi məlumatlara əsasən etirazçılarla hökumət qüvvələri arasında bir neçə yerdə toqquşma baş verib və aksiaçılardan bir neçəsi tutularaq naməlum istiqamətə aparılıb.

Xatırladaq ki, İran hakimiyyətinin iqtisadi, daxili və xarici siyasətinə qarşı ilk etirazlar, “Bahalığa yox” adı altında “Teleqram” sosial şəbəkəsində edilən çağırışa əsasən, dekabrın 28-də Rəzəvi Xorasan əyalətinin Məşhəd şəhərindən başlanıb. Son günlər isə, İranın 20-dən çox şəhərində ölkənin ağır və acınacaqlı iqtisadi durumuna etiraz olaraq kütləvi aksiyalar və yürüşlər keçirilib, dini lider Əli Xamneyiyə, prezident Həsən Ruhaniyə və ölkənin digər rəsmilərinə qarşı sərt şüarlar səsləndirilib. Xalq etirazları, hələ də davam edir.

VİDEO:

https://www.youtube.com/watch?v=0MqhGSW30ZQ

A.M

GUNAZ.TV

SON XƏBƏRLƏR