GünAz TV mətbuat mərkəzinin növbəti müsahibi, Bütöv Azərbaycan Xalq Cəbhəsi Partiyası (BAXCP) sədrinin ictimai-siyasi məsələlər üzrə müavini Niyaməddin Orduxanlıdır.

- Niyaməddin bəy, İran rejimi milli fəallarımızı həbs edir. Sizcə, rejim bununla istəyinə nail ola biləcəkmi?

- Bununla heçnəyə nail ola bilməyəcəklər. Bu prosesin (sürəc) qarşısını ala bilməz. Artıq yaxın şərqdə baş verən hadisələr göstərdi ki, zorakılıqla, qəddarlıqla hüquqi əsası olmayan və “dinə” söykənən istənilən quruluş uzun sürə bilməyəcək. Artıq uzun müddətdir ki,  İran molla rejimi insanları bu cür basqı altında saxlaması mümkünsüz hala gəlib.

Ərəb ölkələrində baş verən hadisələr minlərlə insanın öz azadlıqları uğrunda həlak olması amili göstərdi ki,  insanların azad olmaq istəyi azalmır, əksinə günü-gündən rejimə qarşı etiraz edənlər sayı çoxalır. Son vaxtlar Suriyada baş verən hadisələrə nəzər yetrin. Artıq rəsmi məlumatlara görə Əsəd rejiminə qarşı dinc əhalinin ölənlərin sayı 4000 nəfər keçib. Rejim bununla mübarizənin qarşısını ala bildimi? Əsla yox. Çağdaş dünyamız artıq imkan vermir ki, insaları cəhalət içində saxlayasan. Hər bir millətin öz milli müqəddəratını təyinetmək hüququ var. 35 milyon Azərbaycan türkünün adi bir hüququ, belə yoxdur. Doğma ana dilində danışmağa belə imkan vermirlər. İnanıram ki, tezliklə Güney Azərbaycan Respublikası (Cümhuriyyəti) yaranacaq və bu prosesin qarşısını heç bir rejim ala bilməyəcək. Bu, xalqın mənəvi haqqıdır. 

- İrana qarşı yenidən güc tətbiq olunacağı ilə məlumatlar dolaşmaqdadır. Ümumiyyətlə, İrana qarşı güc tətbiq olunsa, milli hərəkat nə etməlidir?

- İstərdim ki, hadisələr İranda dinc və demokratik şəraitdə baş versin. İstənilən müharibə xalqa xeyir gətirmir. Bu gün İranda siyasi rəhbərlik başa düşməlidir ki, əgər müharibə başlansa, bu İrana böyük fəlakətlər gətirəcək. Səddam Hüseyn rejimi nə qədər çəkdi?...Və yaxudda Qəddafi rejimi 8 aydan artıq sürə bilmədi. Odur ki, rejim məsulları bu haqda geniş düşünməlidirlər. Milli hərəkatın tutacağı mövqeyə gəldikdə isə, düşünürəm ki, onlar prosesi elə aparmalıdırlar ki, İranda kimin hakimiyyətə gəlməyindən asılı olmayaraq, insanlarımız öz məqsədlərinə çata bilsinlər. 

- Son günlər ölkənin əsas gündəmində olan əsas hadisələrdən biri də, yazıçı Rafiq Tağının bıcaqlanması hadisəsidir. Yazarın özü hadisəni İran xüsusi xidmət orqanları ilə bağlayır. Siz necə düşünürsünüz?

- Rafiq Tağının özü belə açıqlama verib ki, bu hadisəni İran molla rejiminin əlaltıları və ya agenturası (xəfiyyəsi) edə bilər. Mən də bu ehtimala inanıram. Bilirsiniz ki, İran ayətullahlarının Rafiq Tağını haqqında ölüm hökmünə “fətva” verməsi, Nardaranda keçirilən mitinqlərdən birində dini-ekstrimist (radikal) qrupların bu “fətva”nın yerinə yetiriləcəyi barədə fikirlər nəzərə alınmalıdır. Hər halda bu faktın (gərçək) özü çox mətləblərdən xəbər verir. Hesab edirəm ki, ölkə prezidenti cənab İlham Əliyev səviyyəsində məsələyə müdaxilə edilməsi çox sevindirici haldır. İnanıram ki, qısa müddətdə bu hadisəni törəndən şəxslər tapılacaq və layiqli cəzalarını alacaqlar. 

Söhbətləşdi: Elnur Eltürk