GünAz TV: Partlayışda “Şahab 3" raketlərinin sınağına rəhbərlik edən general da öldürüldü; hərbi komandanlıq (fərmandehi) hadisə ilə bağlı informasiyalara qadağa qoyub.

İranda, Tehran yaxınlığındakı hərbi bazada (payqah) bir gün əvvəl baş vermiş güclü partlayışla bağlı sensasion (cəncali) xəbərlər yayılıb. İran rəsmi məqamları partlayışla bağlı qısa məlumat yayaraq bildiriblər ki, hadisə hərbi sursatın (mühümmat) boşaldılması zamanı baş verib, 15 nəfər həlak olub, onlarla hərbçi yaralanıb. Daha sonra bazanın ətrafı mühasirəyə alınıb və ora heç kim buraxılmayıb.

Bildirilir ki, hərbi baza İnqilab Keşikçiləri Korpusuna (Sepah) məxsusdur, “Əmir əl-Möminin” adlanır və orada raketlər saxlanılır. Partlayışdan sonra İnqilab Keşikçiləri Korpusu araşdırmanın nəticələri ilə bağlı məlumat yaymağa qadağa qoyub. Yaralılara yardım etmək üçün bazaya xilasetmə xidmətlərinin cəmi altı əməkdaşı buraxılıb. Ölənlərin dəqiq sayı barədə məlumat yoxdur. Ehtimal edilir ki, partlayışda daha çox hərbçi ölüb. İran radiolarından biri 27 nəfərin öldüyünü bildirib, rəsmi agentliklər (ajans) isə 17 nəfərin həlak olduğunu bildirir. MEHR agentliyi xəstəxanalara 27 yaralının aparıldığını xəbər verir, onların çoxu ağır vəziyyətdədir.

Beynəlxalq xəbər agentlikləri və İsrail KİV-ləri (kütləvi informasiya vasitələri) İrandakı mənbələrə istinadən xəbər verir ki, partlayış nüvə başlıqları daşıya bilən “Şahab-3" ballistik raketlərinin sınaq poliqonunda (dənəmə yeri) baş verib. ”Fars" agentliyi İnqilab Keşikçiləri Korpusundakı mənbələrə və Müdafiə Nazirliyinə istinadən xəbər verir ki, ölənlərin arasında briqada (tip) generalı Həsən Tehrani Müqəddəm də var. Bildirilir ki, o, “Şahab-3" raketlərinin sınaqlarına komandanlıq edib. Həmçinin general Müqəddəmin İranın nüvə proqramları ilə bağlı olduğu bildirilir.

Partlayışın necə baş verdiyi haqda məlumat olmasa da, onun arxasında İsrail kəşfiyyat qurumu “Mossad”ın dayandığı haqda versiyalar var. Belə ki, “Mossad” indiyədək İranın bir neçə nüvə alimini oğurlayıb, yaxud öldürüb. Həmçinin İranın hərbi obyektlərində (təsisat) partlayışlar təşkil edib. İsrail və Amerika kəşfiyyatı neçə ildir İranın nüvə fəaliyyətlərinə qarşı gizli müharibə aparır.

Fransanın “Le Figaro” qəzeti isə hərbi bazada baş vermiş partlayışın İsrail xüsusi xidmət orqanlarının işi olduğunu yazıb. İtaliyanın “Corriere della Sera” qəzeti bazada həlak olanların sayının xeyli olduğunu bildirir, məlumat verilir ki, partlayışdan sonra yaxınlıqda yerləşən hərbi anbarda yanğın başlayıb. Tehrandakı diplomatik mənbələrə istinadən bildirildiyinə görə, partlayış nəticəsində bazada təlim keçən “Hizbullah” yaraqlılarından 6-sı da ölüb, onlar Livan (Lübnan) vətəndaşlarıdır. Daha 15 “Hizbullah”çı yaralanıb.

Xəbərlərə görə, partlayış nəticəsində bazada saxlanan xeyli sayda “Şahab-3" raketləri də sıradan çıxıb. İran bu raketlərlə İsrailə zərbə endirməklə hədələyirdi. İsrailin ”Debka" saytı da partlayışın məxfi əməliyyat olduğunu bildirir. Saytın yazdığına görə, İnqilab Keşikçiləri Korpusunun komandanlığı indi bunun üzərində baş sındırır ki, diversantlar (təxrinçi) yerin altında yerləşən sursata (mühümmat) necə yol tapa biliblər. Yeni müsavat