GünAz TV: İrandan Azərbaycana yönəlik növbəti təhdid “Hizbullah”ın İran qolu olan “Ənsari-Hizbullah” təşkilatından gəldi.

Qurumun Təbriz nümayəndəliyinin baş katibi Höccətülislam Ruhulla Becani bildirib ki, noyabrın (November) 4-də Azərbaycan Respublikasının (cümhuriyyət) Təbrizdəki baş konsulluğunun binası qarşısında etiraz aksiyası (göstəri, mitinq) keçiriləcək.

O deyib ki, Təbriz gəncləri sionizmin istiqaməti ilə icra olunan Azərbaycan Respublikasının anti-islami siyasətlərinə etiraz olaraq bu respublikanın Təbrizdəki baş konsulluğunun fəaliyyətini dayandıracaq, işçilərini binadan çıxaracaqlar.

“Alim və böyük şəxsiyyətlər indiyə qədər bu işi qadağan etmişdilər və ümid edirdilər ki, Azərbaycan Respublikası rəsmiləri bu anti-islami hərəkətlərdən əl çəkəcək, bu addımlarından çəkinəcək” - deyə “Hizbullah” təmsilçisi bəyan edib.

Ekspertlərin (karşünas) fikrincə, Azərbaycanın diplomatik nümayəndəliyinə ünvanlanmış hədə çox ciddi qəbul edilməli və bunun qarşılığında ciddi qabaqlayıcı tədbirlərə əl atılmalıdır.

REAL-ın həmsədri İlqar Məmmədov hesab edir ki, deyəsən, İranda bəzi adamlar ağlını itirib: “Artıq bizi hücumla hədələyirlərsə, başqa nəticəyə gəlmək mümkün deyil. Əslində Azərbaycanın İranı hədələyəsi daha çox sahə var. Amma Azərbaycan diplomatik çərçivələr daxilində hərəkət edir. Ona görə də İrandakı bu tip adamlar nə qədər tez ağıllarını başlarına yığsa, o qədər yaxşıdır. Azərbaycan dinmirsə, bu, o demək deyil ki, Azərbaycanın qaldıracağı məsələlər yoxdur”.

Politoloq düşünmür ki, İrandan gələn sərt mesaj Azərbaycanda Tehrana qarşı yönəlmiş hansısa hazırlıqlarla bağlıdır: “Əslində belə hazırlıq yoxdur. Amma fakt (gərçək) budur ki, İran Rusiya ilə xarici siyasətini kifayət qədər əlaqələndirir. Bunu Xəzər dənizi, ermənilərə dəstək məsələlərində də görürük. Ermənistanın havadarı İranla sıx əlaqəsi olan Rusiyadır. İranın bu təhdidləri ola bilsin ki, Kremllə (kremlin)  əlaqələndirilmiş məsələdir. Son günlər Rusiya mediasında da Azərbaycana qarşı kampaniya aparılır. Son vaxtlar Kreml tərəfindən nəzarət olunan rus mediası bir mənasız erməninin AZAL-ın uçağına buraxılmamasından yazır. Bu mənada demək olar ki. Azərbaycana qarşı Rusiya və İrandan əlaqələndirilmiş informasiya hücumları həyata keçirilir, media zərbələri vurulur. Bu ölkələr əvvəllər də Azərbaycan, Qafqaza yönəlik addımlarını əlaqələndirirdilər”.

İ.Məmmədov rəsmi Bakının məsələyə reaksiya (əksüləməl) verməsini zəruri sayır: “İran rəhbərliyinin diqqətinə çatdırılmalıdır ki, belə şeylərə yol vermək olmaz. Əks təqdirdə, Azərbaycan milli fəallarının İranda qaldıracağı çox məsələlər var”.

Deputat (millət vəkili) Fəzail Ağamalı “Hizbullah”dan gələn hədəni kifayət qədər ciddi məlumat sayır: “Mən bu xəbəri oxuyub həm təəccüb, həm təəssüf elədim, həm də kifayət qədər narahatçılıq keçirdim. Çünki molla rejimində məsələlərin sonrakı gedişi məntiqə vurulmur, addımlar emosiya (həyəcan) ilə atılır. Həmin addımlar isə həm özləri, həm də digərləri üçün ciddi problemlər yaradır. Əgər belə bir məsələ öz təsdiqini tapsa, yəni o aksiya baş tutsa, baş konsulluğumuz İrandakı keçmiş ABŞ (Amerika Birləşmiş Ştatları) konsulluğunun gününə salınsa, bunun nə dərəcədə ağır nəticələr verəcəyini təsəvvürümə gətirə bilmirəm. Bu, əslində iki ölkə arasında münasibətlərin kəsilməsinə gətirə və ciddi qalmaqala səbəb ola bilər. Ona görə də bu məsələ dəqiqləşdirilməlidir”.

F.Ağamalı qeyd etdi ki, əslində onların Azərbaycana qarşı bu cür qərəzli, həqiqətə uyğun olmayan addım atmasına əsas yoxdur: “Çünki Azərbaycanda onların dediyi kimi, sionist hakimiyyəti, sionist mühiti yoxdur. Biz əgər müsəlman ölkəsi olaraq dünyanın bütün ölkələri ilə əməkdaşlıq ediriksə, bu, İranı qıcıqlandırmalı deyil. Necə ki, İran hərtərəfli şəkildə Ermənistana qucaq açır və Ermənistanı yaşadan molla rejimidir”.

Deputat bildirdi ki, təhlükə ilə bağlı təcili tədbirlər görülməlidir: “Noyabrın (November) 4-nə bir gün qalıb. Bu gündən gec olmayaraq XİN (xarici işlər nazirliyi) səviyyəsində İran hökumətindən yayılmış bəyanata rəsmi münasibət alınmalıdır”.

XİN-in mətbuat katibi Elman Abdullayev bildirdi ki, məsələ rəsmi Bakının diqqətindədir: “Məsələ daim bizim diqqətimizdədir və araşdırılır”.

Nazirlik rəsmisi Tehranla mütəmadi müzakirələrin aparıldığını desə də, detalları (coziyyat) barədə konkret (açıq, şəffaf) məlumat açıqlamadı: “Bizim üçün təhlükəsizlik məsələsi mühümdür. Bütün səfirliklərimizin və baş konsulluqlarımızın təhlükəsizliyinə həmişə yüksək diqqət yetiririk”.

Təbriz konsulluğunun şəxsi heyətinin müvəqqəti də olsa, geri çağırılması gözləniləndirmi? E.Abdullayev: “Bu barədə hələlik heç bir qərar qəbul olunmayıb. Ancaq biz Təbrizdəki konsulluğumuzun təhlükəsizlik məsələsini daim diqqətdə saxlayırıq”. Yeni müsavat