GünAz TV: Ermənistanda hakim qüvvələr arasında ciddi fikir ayrılıqları özünün pik həddinə çatıb. Artıq dünən İrəvanda siyasi böhranın yaşandığını göstərən istefalar dalğası başlayıb.

İlk olaraq Ermənistan parlamentinin spikeri (sədri) Ovik Abramyan istefa verib. "Novosti-Armeniya" agentliyi xəbər verir ki, bu barədə o jurnalistlərə Ermənistan respublikaçı (cümhuriyyətçi) partiyasının (ERP) icra komitəsinin iclasından sonra bildirib. Abramyan istefasını partiyanın gələcək parlament seçkilərində ERP-nın seçki qərargahının rəisi vəzifəsinə onun namizədliyini irəli sürməsi ilə əsaslandırıb. "Mən parlamentin spikeri vəzifəsini tərk etmək və işimi seçki qərargahının formalaşmasına yönəlməyi təklif etdim", - o bildirib.

   Bununla yanaşı Abramyan bildirib ki, iclasda onun spiker vəzifəsində kiminlə əvəz olunması məsələsi müzakirə olunmayıb. Lakin Ermənimstan mətbuatı Abramyanın istefasının Sarkisyan-Koçaryan qarşıdurmasının məntiqi nəticəsi olduğunu iddia edib.

   "Aykakan Jamanak" qəzetinin verdiyi məlumata görə, Ermənistan prezidenti Serj Sarkisyan hakim dairələrdə yeni kadr dəyişiklikləri etmək fikrindədir.

   Gündəlikdə duran məsələlərdən biri - Kotayk vilayətinin rəhbəri Şahqeldyan Kovalenkonun vəzifədən uzaqlaşdırılmasıdır. Onun yerinə polis rəisinin müavini Saşik Afyanın keçəcəyi ehtimal olunur. Bundan başqa, polis rəisi Alik Sarkisyan da vəzifəsindən azad edilib və bu rəhbər postuna isə İrəvan polis idarəsinin rəisi Nerses Nazaryan iddialıdır. Baş prokuror (dadistan) Aqvan Ovsepyannın da istefası gözlənilir. Onu Təhlükəsizlik Şurasının katibi Artur Baqdasaryanın əvəzləyəcəyi ehtimal olunur. Baqdasaryanın yerinə isə Ermənistanın müdafiə naziri Seyran Ohanyanın keçəcəyi bildirilir. Öz növbəsində müdafiə naziri vəzifəsinə Ohanyanın müavini David Tonoyan iddia edir.

   Bu arada isə Ermənistan parlamentinin spikeri Ovik Abramyan yenidən baş nazir postunu tutmaq üçün fəaliyyətə keçib. Prezident Serj Sarkisyan baş nazir Tiqran Sarkisyanı Abramyanla əvəzləməyin əleyhinə olsa da, spiker niyyətinə çatmaq üçün əlindən gələni edir. Məhz bu üzdən son zamanlar baş nazirlə onun arasında ziddiyyətlərin daha da dərinləşdiyi bildirilir. Qəzet öz mənbəsinə istinadən yazır ki, spikerin baş nazir postuna gedən yolunu prezident Sarkisyanın kürəkəni, Prezident Administrasiyası (nəhade riyasəte cümhuri) rəhbərinin müavini Mikael Minasyan da bağlayır: "Minasyan Ermənistan parlamentini oliqarxlardan, hakim Respublika Partiyasının "qocalarından" təmizləməyə, oraya öz gənc kadrlarını yerləşdirməyə çalışır. Hakim partiyanın növbəti seçki üçün proporsional (mütənasib) namizəd siyahısı da bu prinsiplə (əsl) hazırlanır. Amma Abramyanın baş nazirliyə gedən yolunu bağlamaq üçün onun adı yeni siyahıya da salınıb". İstefanın növbəti qurbanı isə Ermənistan baş nazirinin müavini, ərazi idarə olunması üzrə nazir Armen Qevorkyan olub.

   Azərbaycanlı siyasilər və millət vəkillərinin mövqeyi isə məsələyə birmənalıdır. Onlar Ermənistanda hakimiyyət böhranının yaşandığı qənaətindədir. Millət vəkili Aydın Mirzəzadənin qənaətincə, Ermənistanda hazırkı dövrdə yüksək vəzifəli şəxslərin istefa verməsi onu göstərir ki, prezident ölkəni idarə edə bilmir. "Son hadisələr bir daha sübut edir ki, Prezident Serj Sarkisyanın, nə ölkənin inkişafına dair konsepsiyası (qavram, təsəvvür), nə idarəetmə təcrübəsi, nə komanda ilə işləmək bacarığı mövcuddur, nə də dövrün tələblərinə cavab verə bilir", - Mirzəzadə deyib. Politoloq hesab edir ki, söhbət kadr dəyişikliklərindən deyil, Ermənistan dövlətçiliyinin, milli ideologiyasının böhranından gedir. "Müstəqil dövlət yaradan erməni xalqının siyasi elitası, inkişafı qonşu dövlətlərə qarşı torpaq iddiasında görür. Bu isə heç zaman, heç bir dövlətə uğur gətirməyib, Ermənistana da gətirmədi", - Mirzəzadə qeyd edib.

   Millət vəkili hesab edir ki, bu dəyişikliklər Ermənistan cəmiyyətində gedən böhranın üzdə görünən əlamətləridir. "Ölkədən əhalinin durmadan köçməsi, ölkə iqtisadiyyatının tənəzzülü, ölkənin regional (bölgəsəl) iqtisadi layihələrdən kənarda qalması, iqtisadi, siyasi, hərbi, diplomatik sahədə uğursuzluqlar göz qarşısındadır", - o, deyib. Aydın Mirzəzadənin fikrincə, Ermənistan hakimiyyəti hazırkı siyasətini davam etdirərsə, bundan sonra da bu cür böhran əlamətləri tez-tez görünəcək.

   Azərbaycanın digər deputatı Zahid Oruc da hesab edir ki, Ermənistanda baş verən son hadisələr gələcəkdə böyüyəcək hakimiyyət böhranının elementləridir. "Baş verən istefalar Ermənistan cəmiyyətinə ölkə rəhbərinin siyasi-taktiki planları (tərhləri) kimi təqdim olunur. Lakin Ermənistanda hakimiyyətin monolitliyindən (istehkam), siyasi komandadan, yaxud dəqiq müəyyənləşmiş kursdan danışmaq mümkün deyil. Ermənistanda hakimiyyətin qrup halında fəaliyyəti mövcud deyil", - o Trend-ə açıqlamasında deyib. Zahid Oruc bildirib ki, son istefalarla sübut olundu ki, Sarkisyanın bir dövlət başçısı kimi həmin şəxslər üzərində hər hansı bir mənəvi, siyasi hakimiyyəti mövcud deyil. "Onun təşkilatçılıq səriştəsi mövcud ola bilər, amma başlıca məsələ, siyasi vəhdətdən, ideoloji baxımdan o insanları irəliyə aparmağı bacarmaq keyfiyyətidir ki, Sarkisyanda da bu yoxdur", - millət vəkili deyib. Zahid Oruc hesab edir ki, Sarkisyanın xarizması, sözünü cəmiyyətə çatdırmaq gücü mövcud deyil. "Onun elə bir fikri yoxdur ki, Ermənistan cəmiyyətində müzakirə obyekti (mövzusu) olsun", - o deyib. Həftə içi