Xamneyi: “Prezident postunun ləğv edilməsi mümkündür”

SON XƏBƏRLƏR

Xamneyi: “Prezident postunun ləğv edilməsi mümkündür”

2021.10.20, 07:36

Gunaz.tv

GünAz TV: İran İslam Respublikasının (Cümhuriyyətinin) Kirmanşah şəhərinə səfər edən ölkənin dini lideri Əli Xamneyi oktyabrın (October) 16-da tələbələr qarşısında çıxış edərək gələcəkdə ölkədə prezident postunun ləğv olunmasının mümkünlüyündən danışıb.

GünAz TV mətbuat mərkəzinin “Media forum”a istinadən yaydığı məlumata görə, Xamneyi deyib ki, prezident postunun ləğv olunub baş nazir postu ilə əvəz edilməsində heç bir problem görmür: “Hazırkı şəraitdə ölkənin siyasi sistemi prezidentliyə əsaslanır. Prezident xalqın birbaşa səsi ilə seçilir. Bu isə yaxşı və təsirli bir üsuldur. Lakin uzaq gələcəkdə bir gün hiss olunsa ki, icra hakimiyyəti məsullarını parlamentin seçməsi daha səmərəli və məqsədə uyğundur, onda hazırkı sistem və vəziyyətin dəyişməsində heç bir problem yoxdur”.

Sentyabrın (September) 21-də İran parlamentinin mühafizəkar deputatı (millət vəkili) Həmidrza Katuziyan ölkədə prezident postunun ləğv edilməsi, baş nazir postunun bərpa olunması ətrafında danışıqlar getdiyini açıqlamışdı: “Son vaxtlar siyasi nəzəriyyəçilər arasında belə bir təklif ətrafında müzakirələr gedir ki, “Vəliyi-fəqih” (dini rəhbər Əli Xamneyinin mütləqiyyətə söykənən titulu və vəzifəsi) nemətinə malik olan ölkəmizdə prezidentə ehtiyac yoxdur. Ölkədə icra hakimiyyətinə rəhbərliyi parlamentin seçdiyi baş nazir həyata keçirə bilər. Bu ideya o baxımdan önəm daşıyır ki, icra hakimiyyəti, onun rəhbəri deputatlar qarşısında cavabdeh ola bilər. Prezident postunun ləğv edilərək yerinə baş nazirin gətirilməsi təklifi haqda hazırda güclü siyasi imici olan deputatlar arasında danışıqlar gedir, məsələ hərtərəfli araşdırılır”.

1989-cu ildə İran İslam Respublikasının Konstitusiyasında (anayasasında) dəyişiklik edilərək baş nazir postu ləğv olunub. 1979-cu ildə qurulan İran İslam Respublikasının sonuncu (beşinci) baş naziri hazırda ev dustaqlığında saxlanan Mirhüseyn Musəvi olub. O, 1981-ci ildən 1989-cu ilə qədər baş nazir vəzifəsində çalışıb.

GUNAZ.TV

SON XƏBƏRLƏR