GünAz TV: Milli Təhlükəsizlik Nazirliyinin (MTN) keçirdiyi əməliyyat tədbirləri nəticəsində İrandan qaçaqmalçılıq yolu ilə Azərbaycana xeyli silah-sursat və digər hərbi ləvazimatların, habelə külli miqdarda narkotik (müxəddir maddələri) vasitələrin keçirilməsində təqsirli bilinən bir qrup şəxs yaxalanıb.

   MTN-in İctimai Əlaqələr Mərkəzindən verilən məlumata görə, İran vətəndaşları Əbdi Nasir Zöhrab oğlu, Dəlir Əli Yadulla oğlu, Azərbaycan vətəndaşları Xubaliyev Qabil Şəkəralı oğlu, Məmmədov Ruslan Tahir oğlu, Mürşüdov Arzuman Məmmədəli oğlu, Lalayev Niyaməddin Şərafəddin oğlu və qeyriləri cinayət əlaqəsinə girərək qabaqcadan əlbir olan bir qrup şəxs halında odlu silah, döyüş sursatı və satış məqsədilə külli miqdarda narkotik vasitəni əldə edib, mühafizə olunan dövlət sərhədini pozaraq gömrük sərhədindən gömrük nəzarətindən kənar keçirərək İrandan Azərbaycana gətiriblər.

   Müəyyən edilib ki, 2012-ci ilin mart (March) ayının sonlarında əvvəlcədən əldə edilmiş razılaşmaya əsasən qrup üzvləri Niyaməddin Lalayev, Arzuman Mürşüdov və Ruslan Məmmədov İrana gedərək orada Qabil Xubaliyevin köhnə tanışı, İran vətəndaşı Nasir Əbdi ilə görüşüb, ona satış məqsədilə külli miqdarda narkotik vasitə sifariş veriblər. Narkotik vasitənin qaçaq yolla Azərbaycana keçirilərək qrupun buradakı üzvlərinə təhlükəsiz şəraitdə çatdırılması məqsədilə qrupun digər üzvü, hazırda şəxsiyyəti istintaqla araşdırılan İran vətəndaşı Əli Rəhmani 1 ədəd "AKM" tipli avtomat (müsəlsəl) silahı, həmin avtomat silah üçün nəzərdə tutulmuş 2 ədəd darağı və 273 ədəd patronu (fişəng), 2 ədəd "Makarov" tipli tapançanı, həmin tapançalara aid 2 ədəd darağı, 8 ədəd patronu, 1 ədəd əl qumbarasını, 1 ədəd gecəgörmə cihazını Nasir Əbdi və Əli Dəlirə verib. Onlar da silah-sursatı və narkotik vasitəni Yardımlı rayonunun (şəhər, məntəqə) Zevin kəndi istiqamətində Azərbaycana keçirib və bu barədə Ruslan Məmmədovla Arzuman Mürşüdova məlumat verərək onları həmin ərazidəki meşə massivində (məhəvvətə) gözləyəcəklərini bildiriblər. Bundan sonra A.Mürşüdov həmin əraziyə gedərək "qonaq"ları Masallı rayonunun Zuvandlı kəndindəki evinə gətirib.

   Silah-sursatın bir qismini evində gizlədən A.Mürşüdov bu barədə Ruslan Məmmədovu, o da Niyaməddin Lalayevi məlumatlandırıb. Sonra A.Mürşüdov, N.Əbdi və Ə.Dəlir narkotik vasitəni Masallı rayonu ərazisində R.Məmmədova çatdırıb, o da "Mercedes" markalı maşınının yük yerində gizlədib, birlikdə rayon ərazisində fəaliyyət göstərən "Gölüstü" istirahət mərkəzində onları gözləyən Qabil Xubaliyevin yanına gəliblər. Lakin MTN-in keçirdiyi əməliyyat nəticəsində Nasir Əbdi, Əli Dəlir, Ruslan Məmmədov, Arzuman Mürşüdov, Qabil Xubaliyev Masallıda, Niyaməddin Lalayev isə Xaçmazda tutulublar.

   N.Lalayevin evində yaşayan Azərbaycan vətəndaşı Qəniyev Vadim Abdulcabbar oğlu da saxlanılıb. Ondan "İC 79-93" tipli 1 ədəd qaz silahı, ona aid 2 ədəd daraq və 14 ədəd patron götürülüb.

   Bütün faktlarla bağlı MTN-in İstintaq Baş İdarəsində cinayət işi başlanıb, tutulanlar barəsində məhkəmənin qərarı ilə həbs-qətimkan tədbiri seçilib. N.S