GünAzTv: Ekspert Rusiya prezidentinin Ermənistanla imzaladıqları sazişin Azərbaycana qarşı yönəlmədiyi ilə bağlı dediklərini də yalan adlandırdı.

Rusiya prezidenti Dmitri Medvedevin Bakı səfəri üç sazişin imzalanması ilə yadda qalsa da, görüşlərdə pərdəarxası məqamlar da olmamış deyil. Ermənistanla imzalanan sazişdən sonra Medvedevin Bakıda sərt təpkilərlə üzləşəcəyi gözlənilsə də, belə olmadı. Sazişə toxunan Rusiya prezidenti onun Azərbaycana qarşı yönəlmədiyini dedi. Bu açıqlama qaneedici sayıla bilərmi?

Rusiyanın Ermənistanla imzaladığı sazişin Azərbaycanda etiraza səbəb olduğunu xatırladan politoloq Vəfa Quluzadənin fikrincə, Medvedevin Bakı səfəri balans yaratmaq məqsədi güdür: “Rusiya həmsədrə layiq olmayan addım atdı, Ermənistanla Azərbaycan və bütün region üçün olduqca təhlükəli hərbi müqavilə bağladı. Rusiya münaqişəni həll etməlidir. Ancaq münaqişə tərəflərindən birini gündən-günə gücləndirir, silahlandırır. Üstəlik, bazalarının statusunu artırdılar ki, Ermənistandan kənarda fəaliyyət göstərə bilərlər. Yəni Rusiyanın 102-ci diviziyası hətta gedib Qırğızıstanda, Qazaxıstanda da döyüşə bilər. Bu müqavilə bütün Azərbaycanın etirazına, qəzəbinə səbəb oldu. Ona görə də Medvedev bunu balanslaşdırmaq üçün gəlib üç qondarma müqavilə imzaladı”.

Ekspertin sözlərinə görə, Bakıda imzalanan sazişlər üçün Medvedevin Azərbaycana gəlməsinə ehtiyac yox idi: “Azərbaycan Medvedevi qova bilməzdi. Ona görə məcbur olub üç mənasız müqaviləyə imza atdılar. Onu ”Qazprom"un rəhbəri ilə Azərbaycan Neft Şirkətinin prezidenti imzalaya bilərdi. Sərhədlərin demarkasiyası məsələsi elə də əhəmiyyətli deyil. Bunu nazir müavinləri imzalaya bilərdilər. Medvedevin bura səfəri qondarma idi. Moskvada səfərin əhəmiyyətini şişirtdilər. Guya Ermənistanla Azərbaycana Rusiyanın münasibəti eynidir. Amma bu, yalandır. Bu yalanın üstünü örtmək üçün də Medvedev Bakıya gəldi".

Ekspert Rusiya prezidentinin Ermənistanla imzaladıqları sazişin Azərbaycana qarşı yönəlmədiyi ilə bağlı dediklərini də yalan adlandırdı: “Medvedevin sözləri başdan-ayağa yalandır. Onun deməsindən heç nə asılı deyil. Rusiya Ermənistandan qoşunları çıxarıb deyə bilərdi ki, müharibəyə son qoyulur. Bu, regionda sabitliyə xidmət edərdi. Amma əksinə, regionu silahlarla doldurur. Özü də deyir ki, bu, sabitliyə xidmət edəcək”.

Bu tip görüşlərdə pərdəarxası məqamların olduğunu deyən politoloq Zərdüşt Əlizadə üzdə olanlardan da nəticə çıxarmağın mümkünlüyünü qeyd etdi: “Ikitərəfli görüşlərdə müzakirəlik məsələlər çox olur. Ancaq üzdə olanlardan da nəticə çıxarmaq mümkündür. Qarabağ məsələsinin dondurulmuş vəziyyətdə qalacağına işarə olundu. Satılan qazın həcmi artırıldı. Sərhədlər razılaşdırılıb, müqavilə bağlanıb. Azərbaycanla Rusiya arasında qalan məsələlər problemlidir”.

Ilham Əliyevin üzündən narazılığın hiss olunduğunu deyən ekspert vurğuladı ki, bunun üzdə olan məsələlərlə bağlılığı yoxdur.

Z.Əlizadə Medvedevin Ermənistanla imzaladığı sazişlə bağlı dediyində hər hansı yeniliyin olmadığını bildirdi: “Rus hərbi bazasının bir mahiyyəti var. Erməni ordusu, generalları ilə yaxın münasibətləri saxlayaraq Ermənistanın siyasi həyatına, siyasi elitasına nəzarət etmək. Bunun vasitəsilə Qarabağ münaqişəsini dondurub saxlamaq, həm də Azərbaycan üzərində nəzarəti qorumaq”. Azadlıq