Qardaş ölkədə sərhəd lobbisi yeni fürsət axtarır

SON XƏBƏRLƏR

Qardaş ölkədə sərhəd lobbisi yeni fürsət axtarır

2021.10.20, 07:36

Gunaz.tv

GünAzTv: Bir qrup Vanlı iş adamı sərhədi “Heç olmasa bir həftəliyə açın” deyə hökumətə müraciət ediblər.

Türkiyədə Ermənistanla sərhədlərin NATO təlimləri üçün müvəqqəti açıla biləcəyinə dair məlumatları ortaya atan çevrələrin səyləri boşa çıxıb. Azərbaycan tərəfinin Ankaraya ünvanlanmış xəbərdarlıq mesajlarından sonra xarici işlər naziri Əhməd Davudoğlu rəsmən bəyan edib ki, sərhədlərin NATO təlimləri zamanı müvəqqəti açılması barədə deyilənlər yalandır. O, sərhədlərin müvəqqəti də olsa açılmasının gündəmdə olmadığını bildirib. Lakin bundan əvvəl Türkiyə XİN-dən xarici mənbələrə məlumat ötürən qaynaqlar və neçə vaxtdır sərhədlərin açılmasının lehinə mətbuatda lobbi fəaliyyətləri həyata keçirən çevrələr bu variantın NATO səviyyəsində müzakirə olunduğunu iddia edirdilər.

İddialarla bağlı Azərbaycan xarici işlər nazirinin müavini Araz Əzimov ötən həftə bəyan etdi ki, Ermənistanda keçiriləcək NATO təlimlərinin plan-seminarlarında aparılan müzakirələrlə tanışdır və orada sərhədlərin müvəqqəti açılması barədə heç bir məsələ müzakirə olunmurdu. Əzimov sərhədlərin müvəqqəti açılması məsələsinin müəyyən çevrələr tərəfindən reaksiyaları yoxlamaq üçün ortaya atıldığını deyib: “Suya daş atırlar və gözləyirlər ki, dalğa necə yayılacaq, kimlər necə reaksiya verəcək”.Ermənistanla sərhədlərin sentyabrda NATO təlimləri ilə yanaşı Vandakı erməni kilsəsindəki ibadət mərasimi üçün də müvəqqəti açılmasına çağıranlar var. Xəbər verildiyi kimi, Türkiyə Vanın Axtamar adasındakı qədim erməni kilsəsini restavrasiya edib və orada ildə bir dəfə kütləvi ibadət keçirilməsinə icazə verib. İbadət üçün Ermənistandan 6 minə qədər erməninin Vana gedəcəyi gözlənilir. Onların çarter reysləri ilə İstanbula, oradan Vana gedəcəkləri nəzərdə tutulub. Bir qismi isə Gürcüstan üzərindən avtobuslarla Türkiyəyə keçəcək. Məlumatlara görə, Van vilayətinin yerli iş adamlarını birləşdirən Ticarət-Sənaye Palatasının prezidenti Zahir Kandaşoğlu hökumətə müraciət edərək ibadətə gələcək ermənilər üçün sərhədlərin “heç olmasa bir həftəliyə açılmasına” çağırıb. Kandaşoğlu deyib ki, onun hökumətə ünvanladığı müraciəti yerli iş adamlarının çoxu dəstəkləyir və imzalayıb. Onun fikrincə, sərhədlərin açılması ermənilərin çətinlik çəkmədən Vana getməsinə imkan verərdi. Kandaşoğlu hesab edir ki, Axtamar kilsəsinin yenidən bərpası və orada ibadətə icazə verilməsi yerli iş adamlarını ruhlandırıb. Çünki bu regionda iqtisadi, sosial və mədəni inkişaf proseslərinə səbəb olacaq. “Vandan İrəvana cəmi 4 saatlıq yoldur. Ancaq ötən il biz Gürcüstandan keçməklə İrəvana 26 saata çata bildik. Ona görə də sərhədləri müvəqqəti açmaqla imkan yaratmaq olar ki, ermənilər sentyabrın 19-da Vana rahat gələ bilsinlər” deyə, Kandaşoğlu bildirib.Qeyd edək ki, sərhədlərin açılmasının marağında olan iş adamları Türkiyənin Qars və İqdır bölgələrində də fəallıq edirlər. Belələri sərhədlərin açılmasından istifadə edərək Ermənistanla biznes əlaqələri qurmaq və genişləndirmək istəyənlərdir. Musavat