GünAzTv: Kişilərə həyat yoldaşının razılığı olmadan ikinci arvad almağa icazə verilə bilər.İran parlamentinin müzakirəsinə hazırlaşdığı yeni qanun layihəsi «Ailəni mühafizə qanunu» adlanır. Amma onu «ailəni mühafizə» yox, «ailəylə mübarizə» qanunu adlandıranlar da var. Çünki bu qanun kişilərə həyat yoldaşının razılığı olmadan ikinci arvad almağa icazə verir. Və bunun guya ki, ailənin qorunması naminə edildiyi iddia olunur. İranda şəriətə görə, 4 arvad almağa imkan verilir, amma bundan ötrü arvadların icazəsi lazımdır. Yeni qanunda isə qadının icazəsi tələb edilmir. İranlı Nobel mükafatı laureatı, hüquqşünas Şirin Ebadi də qanunun əleydarlarındandır. O deyir ki, «bu qanun qadını öz evlilik münasibətləri və hisslərini başqa bir qadınla bölüşməyə məcbur edir. Bu zaman ona hətta boşanmaq hüququ da tanınmır. Bu, İran qadınlarının hamılıqla qarşı çıxdığı məqamlardandır”. Hüquq-müdafiəçilərinin fikrincə, qanunun indi ortaya çıxması da təsadüfi deyil. Çünki bu layihə heç də yeni deyil. İlk dəfə 2007-ci ildə Mahmud Əhmədinejad hökuməti bu qanunu parlamentin müzakirəsinə təqdim etmişdi. Amma o vaxt hüquq müdafiəçiləri ictimai etiraz dalğası təşkil elədilər və qanun layihəsi geri çağırıldı. Amma indi o hüquq müdafiəçilərinin çoxu ya seçkisonrası olaylara görə həbs olunub, ya da ölkədən qaçıb. İranda qalan hüquq müdafiəçisi Fatimı Govarayi deyir ki, bir il əvvəlki olaylardan sonra tökülən qan artıq yuyulub. İran cəmiyyəti çox sərt repressiyalar altında yaşayır. Rejim, o cümlədən parlament bu vəziyyəti dəyərləndirmək istəyir, çünki bilirlər ki, 2008-ci ildəki kimi ictimai etiraz dalğasıyla raştlaşan deyillər.O ki qaldı qanun layihəsinin detallarına, layihə müəllifləri iddia edirlər ki, yeni qanun islamın prinsiplərinə daha uyğun olacaq. Qanunu dəstəkləyən deputatlardan Məhəmməd Dehqan deyir ki, bu qanun başqa arvadların icazəsi olmadığı üçün ərə gedə bilməyən qadın və qızlara yol açacaq. Amma prezidentliyə keçmiş namizəd, islahatçı Mir Hüseyn Musəvinin xanımı Zəhra Rəhnavərd ötən həftə bu qanunun ailənin təməllərini sarsıdacağını deyib. O, bunun faktiki olaraq çoxarvadlılıq üçün bəhanələri əsaslandırdığını bildirib. İndi Norveçə mühacirət edən hüquq müdafiəçisi Asiye Əmininin sözlərinə görə, bu qanuna 2008-ci ildən bu yana daha 10 əlavə də edilib. Bu əlavələr layihəni daha bərbad günə salıb. Məsələn, layihəyə görə, əgər qadın nəsə bir vərdişə qurşanarsa, ya nəyəsə aludə olarsa, bir müddətliyə əriylə intim münasibətlərə girə bilməyəcək qədər xəstələnərsə, ya sonsuz olarsa, hətta evindən hansısa səbəbdən 6 ay uzaq qalarsa, əri onun icazəsi olmadan başqa arvad ala bilər. Əmini isə deyir ki, bütün bunlar ancaq kişinin bəhanələrini əsaslandırır və qadına qarşı ayrıseçkilikdir. «Bəs birdən kişi ehtirasını cilovlaya bilmirsə, gözü orda-burdadırsa, ailə necə olacaq? Niyə qanun bu suala savab vermir? Bəlkə elə kişi sonsuzdur, ya öz qadınını istəmir, ya bəlkə sadəcə meyli başqa şey istədiyi üçün başqasına gedirsə, onda ailə necə olsun? Arvadı və uşaqları necə olsun? Qısacası, bu qanun başdan-ayağa kişinin seksual və başqa istəklərini qarşılamaq üçün yazılıb».