GünAzTv: Azərbaycanın İrandakı sabiq səfiri, şərqşünas alim Əliyar Səfərli Tehran rəsmisi Əhməd Vahidinin son bəyanatına münasibət bildirib.

Əhməd Vahidi İranın Xəzər dənizini sülh və mehribanlıq dənizi kimi qəbul etdiyini deyib: "Dənizdə hər hansı hərbi təchizatın yerləşdirilməsinin əleyhinəyik. Bu, İranın Xəzərlə bağlı siyasətidir. Amma təəssüf ki, kənar ölkələr regionda qarışıqlıq salmaq üçün Xəzərdə hərbi iştirak barədə layihələr planlaşdırırlar. Onlar odla oynayırlar. Biz Xəzərin İrana aid hissəsinin təhlükəsizliyini tam şəkildə təmin edirik. Bu iş Xəzəryanı ölkələrlə razılaşdırılmış şəkildə həyata keçirilir".

Əhməd Vahidinin bəyanatına münasibət bildirən Azərbaycanın İrandakı sabiq səfiri, şərqşünas alim Əliyar Səfərlinin sözlərinə görə, İranın müdafiə nazirinin açıqlaması ziddiyyətlidir. Vahidi İranın Xəzərə sülh və mehribanlıq dinizi kimi baxdığını desə də digər tərəfdən, silahlı qüvvələrin dənizə nəzarət etməsindən danışır: "Azərbaycanın üzləşdiyi vəziyyət təşviş doğurur. İran Ermənistanla birgə Güney və Quzey Azərbaycan arasında su dəryaçaları yaradır ki, əlaqələrimiz kəsilsin. Digər tərəfdən, İran Xəzər dinizində öz silahlı qüvvələrini yerləşdirir. Eyni zamanda deyir ki, Xəzər sülh dənizidir. Əslində isə İranın bu siyasəti səmimi deyil. Xəzər dənizində İran hərbi qüvvələrinin yerləşdirilməsi çox qorxulu məsələdir və təşviş doğurmaqdadır. Bu, gələcəkdə bizim üçün böyük fəlakətlərə gətirib çıxara bilər. İran Xəzər dənizinin statusu məsələsini də həll etmək istəmir. Beş sahilyanı dövlət arasında müzakirə aparıladan İrapn həmişə Xəzərin statusuna qarşı çıxır və beynəlxalq hüquq normalarına əməl etmir. İran istəyir ki, Xəzər dənizinin 20 faizindən artıq hissəsini ələ keçirsin. Bu da Azərbaycan Respublikasının ərazilərinə doğru gəlib çıxır. Bu isə bizim ərazilərimizin işğalı deməkdir. Ermənistanla İranın işğalı mahiyyətcə fərqlənmir. Muğan düzündə çoxlu fars və erməni qəsəbələri tikilməkdədir. Naxçıvan ilə sərhəddə ermənilər yerləşdirilir. İranın bu fitnə-fəsadı barədə ciddi düşünməliyik. Azərbaycanda isə bununla bağlı münasibət bildirilmir. İranın fars rejimi riyakardır. Bu rejim Azərbaycan Respublikasının ərazisində böyük ideoloji təxribat işləri aparır. Azərbaycan Respublikasında İranın ideoloji şəbəkəsi günü-gündən genişlənir. Bakı kəndlərində yüzlərlə iranlı fəaliyyət göstərir. Onlar nə işlə məşğuldur? Buna Azərbaycan hökuməti dövlət səviyyəsində öz münasibətini bildirməlidir. İranın "İmdad" cəmiyyəti, "Mədəniyyət Mərkəzi", "Əhli-beyt" cəmiyyəti, "Əl-hudə" cəmiyyəti və müxtəlif təşkilatların sayı artır, İran Azərbaycanda islam inqilabı hazırlamaq istəyir. Münbit siyasi mühit üçün psixoloji hazırlıq işləri aparır. İran bizim elmimizə, təhsilimizə müdaxilə edir. Biz bu barədə düşünməliyik. Məscidlərimizdə İranın təbliğatı aparılır. İran Milli Bankının fəaliyyətinə dövlət səviyyəsində nəzarət qoyulmalıdır. İran Azərbaycan dövləti ilə heç bir müqavilə olmadan sərhədələrimizdə işlər həyata keçirir. Mənim yaxşı yadımdadır, rəhmətlik, ulu öndərimiz Heydər Əliyev İranda səfərdə olarkən görüş zamanı Xamneyi ona təklif etdi ki, Araz sahillərində birgə su dəryaçaları yaradaq, su elektrik stansiyaları quraq. O zaman Heydər Əliyev dedi ki, müharibə şaritində yaşayırıq, sülh sazişi də yoxdur, bu məsələlərə müharibədən sonra qayıdarıq. Amma indi İran ermənilərlə birgə Azərbaycan sərhəddində su dəryaçaları tikir, dəmir yollarını su altında qoyur. Azərbaycan ziyalıları buna öz etiraz səsini ucaltmalıdır. Təəssüf ki, televiziyalar bizə qarşı yönəlmiş bu təhlükə barədə susurlar, danışmırlar. Mətbuat isə çox passivdir. Bununla bağlı Azərbaycanda heç bir cavab tədbirləri görülmür. Məncə, cəmiyyətimiz İranın Azərbaycana qarşı təxribat siyasətinə öz etiraz səsini ucaltmalıdır". Xalq cəbhəsi