GünAzTv: Rəsmi Bakı Rusiyanın Ermənistanla imzaladığı sənədi ehtiyatla şərh edir.

“Rusiya və Ermənistan arasında razılaşmanın imzalanması sülhə də çox ciddi təhdiddir. Çünki Rusiya Minsk Qrupunun həmsədrlərindən biridir. Vasitəçilərdən birinin münaqişə tərəflərindən biri ilə hərbi əməkdaşlığı məhdudlaşdırmaq əvəzinə, daha da gücləndirməsi təbii ki, yolverilməzdir. Azərbaycan dövləti bununla bağlı beynəlxalq təşkilatlara müraciət etməli, bu ziddiyyətin araşdırılması və ona qiymət verilməsini istəməlidir”.

GünAzTv mətbuat mərkəzinin “Musavat”-a istinadən yaydığı məlumata görə, Müsavat Partiyasının başqanı İsa Qəmbər bu fikirləri Rusiya-Ermənistan hərbi əməkdaşlığını nəzərdə tutan müqavilənin imzalanmasını şərh edərkən bildirdi.  İsa Qəmbər xatırlatdı ki, Müsavat Partiyası bu həftənin əvvəlində partiya Divanında qəbul edilmiş bəyanatda Rusiyanın bu addımının bölgədə vəziyyətin gərginləşməsinə yönəldiyi və Azərbaycan üçün yeni təhdidlər yaratdığı, təhlükələri daha da artırdığı qeyd olunub: “Buna görə də Azərbaycan öz təhlükəsizliyi barədə ciddi düşünməlidir. Bunun yollarından biri Azərbaycanın Avroatlantik məkana inteqrasiyasının sürətlənməsi, NATO-ya üzvlüklə bağlı rəsmən müraciət edilməsidir. Bununla yanaşı, Azərbaycan Türkiyə kimi dövlətlərlə münasibətləri daha da yaxınlaşdırılmalıdır və strateji tərəfdaşlıq haqqında əməkdaşlığın daha dolğun, daha etibarlı bir şəkildə gerçəkləşməsinə çalışmalıdır”. Məsələyə rəsmi Bakı da nəhayət, reaksiya verib. “Azərbaycan ümid edir ki, Rusiya Ermənistandakı 102-ci bazanın hərbi texnika və resurslarından Azərbaycana qarşı istifadə edilməməsi haqda öz üzərinə götürdüyü öhdəliklərə bundan sonra da sadiq qalacaq”. Bu sözləri APA-ya açıqlamasında Rusiya ilə Ermənistan arasında imzalanmış protokola münasibət bildirən Azərbaycan Xarici İşlər Nazirliyinin mətbuat katibi Elxan Poluxov deyib. E.Poluxov xatırladıb ki, Rusiya 2006-cı ildə Gürcüstanın Batumi və Axalkalaki şəhərlərindən hərbi bazalarını çıxararkən bu bazaların Ermənistanın Gümrü şəhərində yerləşən hərbi bazaya göndərilən silah və hərbi texnikasından Azərbaycana qarşı istifadə olunmaması barədə öhdəlik götürüb. Dağlıq Qarabağ münaqişəsinin həlli ilə məşğul olan ATƏT-in Minsk Qrupunun həmsədri olan bir dövlətin təcavüzkar ölkənin hərbi cəhətdən güclənməsinə şərait yaradan addımlara getməsi təbii ki, Azərbaycanın vəziyyətini ağırlaşdıracaq. Bununla bağlı rəsmi Bakının gecikmiş olsa da, hərbi müttəfiq axtarışına çıxması, Türkiyə əsgəri bazalarının Azərbaycanda yerləşdirilməsini zəruri sayanlar az deyil.Politoloq Vəfa Quluzadə hesab edir ki, Rusiya Qafqazda əsgəri baxımdan özünün mövqelərini möhkəmləndirir: “Moskva Amerikaya və NATO-ya mesaj verir ki, ”bura mənim maraq dairəmdir". Rusiya Ermənistanda, Abxaziya və Cənubi Osetiyada S-300 raket qurğularını yerləşdirməklə özünün əsgəri mövcudluğunu gücləndirəcək. Bu, Amerikanı qorxutmur. Çünki əsgəri baxımdan Rusiyadan qat-qat üstündür". O ki qaldı Azərbaycana, V.Quluzadə deyir ki, hələlik Rusiyanın köhnə planı ləğv olunmayıb: “Moskva istəyir ki, Cənubi Qafqazı yenidən özünə tabe etsin, əvvəl Gürcüstanı, sonra Azərbaycanı yıxsın. Rusiya hər iki ölkədə Moskvaya tam tabe olan iqtidarları hakimiyyətə gətirmək və bununla da Cənubi Qafqazı tam ram etmək niyyətindədir”. Politoloq Azərbaycanın Qərblə əsgəri əlaqələrini inkişaf etdirməklə bağlı illər öncə verdiyi təklifləri xatırlatdı. Bildirdi ki, o zaman bu əlaqələrin inkişafı tamamilə mümkün idi: “Mən prezidenti nəzərdə tutmuram, ancaq görünür onun komandasında kimdəsə ümidlər var idi ki, Rusiyanın bütün tələblərinin qarşısında baş əyərək Moskvanı Azərbaycanı tərəf çevirmək və bununla da Qarabağ məsələsinin ədalətli həllinə nail olmaq mümkündür. Amma indi bu əsgəri müqavilə elə bil ki, tabuta vurulan axırıncı mıx oldu. Məsələ ondan ibarətdir ki, bu, mümkün deyil. Səbəb o deyil ki, rus imperiyası Ermənistanı sevir, Azərbaycanı yox. Rus imperiyası bu məsələdə xalis praqmatikdir. Ermənistan onların özlərinin yaratdığı forpostdur və o, Türkiyənin, Qərbin, NATO-nun əleyhinədir. Azərbaycan isə türk respublikasıdır və həmin meşəyə baxan canavardır. Rusiya hesab edir ki, Azərbaycanla nə qədər yaxşı münasibətlər olsa da, onun gözü Türkiyə də, Qərbdədir. Bu səbəbə görə Rusiya Azərbaycana əsrlərlə divan tutub”. Deməli, Ermənistanla Rusiya arasındakı hərbi saziş Azərbaycanın torpaqlarını güc yolu ilə azad etmək istəyinin üstündən xətt çəkmiş olur? V.Quluzadə deyir müharibə variantının üstündən əvvəldən xətt çəkilmişdi: “Kim bunu görmək istəmirsə, öz işidir. Amma müharibə variantı ona görə mümkün deyil ki, burda Rusiya dayanıb. Biz gərək Rusiyaya qarşı da müharibə aparaq. Əgər tək Ermənistan olsaydı, biz bir həftəyə Ermənistanı darmadağın edib bütün torpaqlarımızı geri qaytarardıq. Ya da ermənilər təslim olardılar, deyərdilər bunu təşkil edən Rusiyadır”. Belə çıxmırmı ki, Qarabağ məsələsi ən azı 44 illiyinə dondurulmuş halda qalacaq? V.Quluzadə: “Rusiya əgər 44 il salamat qalsa, bəli. Yox, əgər Rusiya çöksə, hər şey başqa cür inkişaf edəcək. Çökmə variantı gündəmdədir”.