GünAzTv: ABŞ-ın (Amerika Birləşmiş Ştatları) BMT-dəki keçmiş səfiri Con Bolton müharibəyə başlamağa çağırdı.

GünAzTv mətbuat mərkəzinin “Musavat”-a istinadən yaydığı məlumata görə, İranda tikintisi uzun illərdir ləngiyən Buşəhr AES-in nəhayət işə salınacağı elan edilib. Xəbər verildiyi kimi, İran stansiyanın tikintisini həyata keçirən “Rosatomstroy” şirkətinin sabahdan etibarən reaktorlardan birinə nüvə yanacağı yükləyəcəyini elan edib. ABŞ Buşəhr AES-in işə salınmasına qarşı deyil, İsrail isə qatı düşməninin işləyən AES-ə malik olmasından narahatlıq keçirir. Həmçinin ABŞ-dakı qatı mühafizəkar çevrələr fürsətdən istifadə edərək İrana zərbə endirməyi tezləşdirmək çağırışları ilə çıxış edirlər. Birləşmiş Ştatların BMT-dəki keçmiş səfiri Con Bolton “Fox Business Network” telekanalına müsahibəsində deyib ki, əgər İsrail Buşəhr AES-in işə salınmasına imkan versə, o zaman İranın nüvə obyektlərini bombalamaq imkanlarını əldən buraxacaq.

Boltona görə, İsrail İrana zərbə endirsə vurulacaq obyektlər sırasında Buşəhr AES də olmalıdır. Lakin işləyən stansiyaya zərbə endirmək radiasiya sızmasına və çoxsaylı insan tələfatına səbəb olacağına görə bu istisnadır. Ona görə də İsrailin İranı vurmaq üçün avqustun 21-nədək vaxtı var. “Əks halda, İran elə vasitəyə malik olacaq ki, ondan İsrailin və ABŞ-ın Yaxın Şərqdəki düşmənlərindən heç kimdə yoxdur” deyə, Bolton bildirib. Keçmiş səfir əlavə edib ki, o, İsrailin yaxın günlərdə İranı vuracağına inanmır, ona görə də hesab edir ki, İranın nüvə proqramlarını hərbi yolla dayandırmaq fürsəti əldən buraxılıb.

Bu arada İsrail mənbələri Buşəhr AES-in yaxınlığında bir gün əvvəl hərbi təyyarənin qəzaya uğraması ilə bağlı ilginc iddia ortaya atıb. “Debka” xəbər verir ki, hərbi təyyarəni səhvən stansiyanı qoruyan İran Hava Hücumundan Müdafiə qüvvələri vurub. "F-4" qırıcı təyyarəsi bilinməyən səbəblərdən stansiyanın cəmi 6 kilometrliyinə düşmüşdü və İran tərəfi qəzanın səbəblərinin araşdırıldığını bildirmişdi. Qəzada hər iki pilot sağ qalıb. “Debka” saytının əldə etdiyi məlumata görə, təyyarə Buşəhr AES-i mühafizə edən Rusiya istehsalı “Tor M-1" zenit-raket kompleksi tərəfindən vurulub. Lakin təyyarəyə atəşin səhvən açıldığı ehtimalı azdır. Belə ki, Buşəhr AES-in ətrafında 20 kilometr radiusda bütün uçuşlar qadağandır. Təyyarənin bu qadağan zonasına nədən daxil olduğu bilinmir və İrandakı qaynaqlar hadisənin xeyli ilginc olduğunu deyirlər. Qeyd edək ki, İsrail İran ərazisində vaxtaşırı olaraq diversiya əməliyyatları həyata keçirir. Bəzi ekspertlər ehtimal edir ki, İsrail Buşəhr AES-in işə salınmasını da diversiya yolu ilə əngəlləyəcək.

İran Silahlı Qüvvələri Baş Qərargahının idarə rəisi Əli Şadmani isə jurnalistlərə açıqlamasında ölkənin nüvə təsisatlarına qarşı mümkün xarici hücuma qarşı 3 plan hazırladıqlarını bildirib. “Media forum” saytının məlumatına görə, Əli Şadmani ABŞ-ın İraq və Əfqanıstandakı qüvvələrinə qarşı hücumun, İran körfəzindəki Hörmüz boğazını bağlamağın bu planların tərkib hissəsi olduğunu deyib: “Mümkün xarici təcavüzün qarşısını almaq üçün nəzərdə tutulan planların birincisi Hörmüz boğazını bağlamaq və onu tamamilə ələ keçirməkdir. Bununla da hər hansı gəminin burada hərəkət etməsinə icazə verməyəcəyik. Biz bu xüsusda bir neçə hərbi təlim də keçmişik. ABŞ-ın İraq və Əfqanıstandakı bütün hərbi bazalarını və qüvvələrini diqqət mərkəzində saxlayırıq. Ölkəmizə qarşı hər hansı hücuma cavab olaraq bu bazaları iflic vəziyyətə salaraq onlara hərəkət imkanı verməyəcəyik. Üçüncü planımız isə İsraillə bağlıdır. İsrail ABŞ-ın yaxın müttəfiqidir. Biz bu müttəfiqin asayişini pozacağıq”.