GünAzTv: Rusiyanın Ermənistandakı hərbi bazasından istifadə müddətinin 49 il uzadılmasına dair müqavilə gələn həftə prezident Dmitri Medvedyevin İrəvana səfəri zamanı imzalanacaq. Ermənistandakı diplomatik çevrələrdən “Azadlıq” radiosunun erməni xidmətinə verilən məlumatda belə deyilir.

Mənbə təsdiq edib ki, hərbi müqaviləyə bazanın istifadə müddətinin uzadılması ilə yanaşı oradakı rus qoşunlarının erməni qüvvələri ilə birlikdə Ermənistanın təhlükəsizliyini qoruması və Ermənistanın müasir silah, hərbi texnika ilə təchizatına dair öhdəliklər də nəzərdə tutulur.Xatırladaq ki, Moskvada bu müqavilənin Azərbaycanın Qarabağı azad etmək üçün hərbi əməliyyatlara başlamasına imkan verməmək məqsədi daşıdığını açıq deyirlər. Buna baxmayaraq rəsmi Bakı məsələ ilə bağlı Moskvaya hələ də etiraz etmir.Rusiyanın Ermənistandakı 102-ci hərbi bazasının tərkibinə üç motoatıcı polk (onlardan biri İrəvanda, ikisi Gümrüdə dislokasiya olunub), 992-ci artilleriya polku, 988-ci zenit-raket polku, 116-cı əlahiddə tank batalyonu, 772-ci əlahiddə kəşfiyyat batalyonu və 426-ci aviasiya qrupu daxildir. 426-cı aviasiya qruplaşması Ermənistanın Erebuni hərbi aeroportunda yerləşir və ora 18 ədəd “MiQ-29" qırıcı təyyarəsi daxildir. Həmçinin Gümrüdə iki S-300 zenit-raket diviziyası yerləşir. Rusiya mənbələrinin məlumatına görə, Ermənistandakı bazanın sərəncamında 300-dən çox zirehi maşın, artilleriya sistemləri və müxtəlif tipli zenit-raket kompleksləri daxildir. Hərbi qulluqçuların sayı isə 3-5 min nəfərdir. Onlar Gümrü və İrəvandakı hərbi şəhərciklərdə yerləşdirilib.Lakin Gürcüstandakı Rusiya bazalarından çıxarılan silah-sursat və hərbçilər də Ermənistana yer dəyişdiyi üçün oradakı silahların dəqiq sayı hazırda məlum deyil. Digər tərəfdən, bazada xidmət keçən əsgər və zabitlərin yarıdan çoxu ermənilərdir. Onlar Rusiya vətəndaşlığı alaraq bazada müqavilə əsasında xidmət edirlər. Bütün bunlar Qarabağda mümkün müharibə zamanı bazanın Azərbaycana qarşı istifadə ediləcəyi ehtimallarını artırır.Xarici mətbuat da Ermənistanla Rusiya arasında gözlənilən hərbi müqaviləni şərh etməkdədir. Qərb ekspertləri qeyd edirlər ki, bu müqavilədən sonra Rusiya Cənubi Qafqaz regionuna hərbi nəzarəti tam ələ alacaq, ABŞ və NATO-nun regionda hərbi mövqelərə malik olmaq imkanları isə aradan qalxacaq.Ukraynanın “Zerkalo nedeli” həftəliyi də mövzu ilə bağlı geniş şərh verib. Orada deyilir ki, ABŞ-ın başının İraq və Əfqanıstana qarışmasından istifadə edən Rusiya postsovet məkanında mövqelərini gücləndirir və Cənubi Qafqazdakı forpostu Ermənistanla “nikah” müqaviləsinin müddətini yarım əsr uzadır. Məqalədə xatırladılır ki, vaxtilə Rusiya Dövlət Dumasının spikeri Boris Qrızlov Ermənistanı Rusiyanın “forpostu” adlandırmışdı.“Bu ölkəni itirmək Rusiya üçün bütün regiondan çıxmaq deməkdir. Gümrü bazası isə Rusiyanın cənub cinahında güc nümayişi üçün əsas vasitədir. Bu vasitə sayəsində Rusiya Ermənistana uzunmüddətli təsir imkanlarını saxlayır. Ermənistan üçün isə bazanın mövcudluğu elementar təhlükəsizlik təminatıdır. Belə ki, Ermənistan Qarabağı qaytarmaq üçün hərbi əməliyyatlara başlaya biləcəyi haqda tez-tez xəbərdarlıq edən Azərbaycan qarşısında Rusiyanın təhlükəsizlik çətiri altına sığınır. Başqa sözlə, Gümrü bazası Rusiyanın forpostu üçün çətir rolunu oynamaqdadır” - deyə “Zerkalo nedeli” qəzeti yazır.Lakin o da bildirilir ki, Ermənistanda Gümrü bazasına dair yeni müqavilənin təhlükəsizlik üçün tam qarantiya verdiyinə şübhə edirlər. Bir çoxları hesab edir ki, Ermənistan bununla suverenliyinin son işartılarını da Rusiyaya vermiş olur. musavat