GünAzTv: Alov Federal Nüvə Mərkəzinə yaxınlaşır, fövqəladə hallar naziri bütün qüvvələrin bu bölgəyə səfərbər edilməsinə göstəriş verdi.

GünAzTv mətbuat mərkəzinin “Musavat”-a istinadən yaydığı məlumata görə, Rusiyada tüğyan edən meşə yanğınları və son 130 ildə görünməyən istilər çoxlu sayda insanın ölümünə və milyardlarla dollarlıq iqtisadi zərərə yol açıb. Rusiya Fövqəladə Hallar Nazirliyinin son məlumatlarına əsasən, ölkənin ayrı-ayrı bölgələrində 560-a yaxın meşə yanğını hökm sürür. Son bir sutka ərzində daha 247 yanğın ocağı qeydə alınıb, 200-dən çox ocaq isə söndürülüb. Yanğınların 76-ı irimiqyaslıdır, Rusiya ərazisinin böyük hissəsi hazırda tüstüyə bürünüb. Moskva ətrafındakı torf yanğınları isə paytaxtda həyatı iflic edib. Şəhərdə görmə məsafəsi 50 metrədək azalıb, təyyarə reyslərinin çoxu təxirə düşüb. Rəsmilər təsdiq ediblər ki, Moskvada istilər və havanın kəskin çirklənməsi nəticəsində ölənlərin sayı artıb. Xəstəxanalarda və morqlarda yer yoxdur. Lakin yanğınların qarşısı alınmasa, Rusiya daha böyük fəlakətlə-nüvə fəlakəti ilə üzləşə bilər.

Fövqəladə hallar naziri Sergey Şoyqu məlumat verib ki, alovlar Moskvanın şimalındakı Federal Nüvə Mərkəzinə yaxınlaşır. O, bütün qüvvələrin həmin bölgəyə səfərbər edilməsinə göstəriş verib. Nüvə mərkəzində çoxlu miqdarda nüvə yanacağı və materialları saxlanılır. Bir gün əvvəl Moskvadan gələn Azərbaycan vətəndaşından aldığımız məlumata görə, şəhərdə durum olduqca kritikdir və bu, azərbaycanlıların da vəziyyətinə təsir edir. Mənbənin bildirdiyinə görə, bazarlarda alverlə məşğul olan azərbaycanlılar günlərdir işə çıxa bilmir, onların bir çoxu vətənə qayıtmaq üçün hava limanlarına və qatar vağzalına axışır. Sinoptiklər xəbərdarlıq edir ki, bir neçə gün sonra Rusiyada istiləri güclü qasırğa və daşqınlar əvəz edə bilər. Bildirilir ki, hakimiyyət orqanları yeni təbii kataklizmə hazır deyil və insan tələfatı qaçılmaz olacaq. Rusiyada istilərin tüğyan etdiyi bir vaxtda Pakistan və Hindistan sel fəlakətinin əlində əsir qalıb. Pakistanda misli görünməmiş dəhşətli daşqınlar nəticəsində ölənlərin sayı minlərlədir. 13 milyona qədər insan fəlakətdən zərər çəkib və evsiz-eşiksiz qalıb. BMT-nin məlumatına görə, Pakistanda ölənlərin sayı qorxunc rəqəmlərlə hesablana bilər. Belə ki, xilasedicilər 600 minə qədər insandan xəbər ala bilmir. Daşqınlar bütöv yaşayış məntəqələrini məhv edib, sel suları özü ilə insan cəsədləri aparmaqda davam edir, ölənlərin statistikasını aparmaq çətindir.Mərkəzi Avropada da güclü daşqınlar hökm sürməkdədir. Polşa, Çexiya, Almaniya və Baltik ölkələrində onlarla adam fəlakətin qurbanı olub. Ən güclü zərbə isə Polşaya dəyib. Ölkənin bir çox bölgələrində vəziyyət dramatikdir. Planetin bir hissəsində şiddətli istilərin, digər hissəsində isə güclü leysan yağışların və daşqınların tüğyan etməsini təhlil edən beynəlxalq ekspertlər bunun səbəbləri haqda dəqiq mülahizələr irəli sürməkdə çətinlik çəkirlər. Ancaq bildirilir ki, baş verənlər qlobal iqlim dəyişikliklərinin yaradacağı fəsadlar barədə proqnozları təsdiqləyir. Ekspertlər ötən il dünyanı gözləyən güclü istilər və daşqınlar barədə xəbərdarlıq etmişdilər. ABŞ-ın Okeanik və Atmosfer Araşdırmaları Milli İdarəsinin mütəxəssisləri qeyd edirlər ki, 2010-cu ilin birinci yarısında planetdə temperaturun misli görünməmiş həddə artımı qeydə alınıb. Bütün bunlar qlobal istiləşmənin və onun yaratdığı fəsadların qarşısıalınmaz prosesə çevrildiyini göstərir.