GünAzTv: Ermənistan Qarabağda mümkün müharibə zamanı İranın köməyinə arxayın olmağa çalışır.

Xəbər verdiyimiz kimi, İran son vaxtlar Qarabağ münaqişəsinin nizamlanması prosesində fəallaşıb və tərəflərə hələlik məzmunu açıqlanmayan təkliflər təqdim edib. İndiyədək Tehranın Qarabağ danışıqlarında vasitəçiliyini yaxına buraxmayan rəsmi Bakı isə İranın münaqişənin həllinə yardımçı olmaq təşəbbüsünü dəstəkləyib.

Rəsmi Tehran Ermənistan, İran və Azərbaycan xarici işlər nazirləri arasında üçtərəfli formatda danışıqları təşkil etməyə və münaqişənin həllinə dair ideyalarını rəsmi qaydada təqdim etməyə hazırdır. Lakin Ermənistan bu təşəbbüsə soyuq yanaşır. Rəsmi İrəvan Tehranın nəzərinə çatdırıb ki, münaqişənin nizamlanmasında Minsk prosesinə üstünlük verir. Ermənistan danışıqların gedişi barədə indiyədək olduğu kimi yenə də Tehranı məlumatlandırmağa, məsləhətləşmələr aparmağa hazırdır, ancaq qonşu ölkənin vasitəçiliyini sərfəli hesab etmir.  Xəbərlərə görə, məsələ xarici işlər naziri Edvard Nalbandyanın Tehrana gözlənilən səfəri zamanı müzakirə olunacaq.Bu ərəfədə Rusiyanın “Regnum” agentliyi məlumat yayıb ki, Ermənistan Qarabağ məsələsində İranı ələ almaq yolları haqda fikirləşir. Ermənistan siyasi dairələrində Azərbaycanın Qarabağı azad etmək üçün hərbi əməliyyatlara başlayacağı təqdirdə Rusiyanın köməyinə arxayın deyillər. Xüsusən son günlər Rusiyanın Azərbaycana S-300 zenit-raket sistemləri satdığı barədə yayılan xəbərlər Ermənistanda narahatlığı artırıb. Bu səbəbdən Ermənistan Qarabağda mümkün müharibə zamanı İranın köməyinə arxayın olmağa çalışır. Bildirilir ki, Ermənistan İranın köməyinin əvəzində Azərbaycanın bu ölkə ilə həmsərhəd olan işğal edilmiş ərazilərini “Tehranın tarixi yuridikasiyasına” verməyi nəzərdən keçirir. Eyni zamanda İrəvan bu variantı təkcə müharibədə göstəriləcək mümkün dəstəyə cavab olaraq hazırlamır. Ermənistanda belə təkliflər var ki, İranın Qarabağ münaqişəsinin nizamlanması prosesində ermənilərin maraqlarından çıxış etməsini təmin etmək üçün də bu ərazilər Tehranın nəzarətinə verilə bilər.Məsələ burasındadır ki, İran münaqişənin nizamlanmasına dair razılaşmadan sonra Azərbaycanın bu ölkə ilə həmsərhəd işğal edilmiş ərazilərinə nəzarətin kimin əlində olacağını yaxından izləyir. Hazırda danışıqlarda müzakirə edilən Madrid prinsiplərinə əsasən, həmin ərazilər də daxil olmaqla ətraf rayonların Azərbaycana qaytarılmasından söhbət gedir. Lakin eyni zamanda münaqişə bölgəsində beynəlxalq sülhməramlı qüvvələrin yerləşdirilməsi məsələsi də həll edilməlidir. Azərbaycan tərəfi beynəlxalq sülhməramlıların ancaq Dağlıq Qarabağın inzibati sərhədləri boyu yerləşməsini qəbul etməyə hazırdır. Erməni tərəfi isə sülhməramlıların həm də boşaldılacaq ərazilərdə yerləşdirilməsini istəyir. ABŞ qoşunlarının İranla həmsərhəd rayonlarda yerləşdiriləcəyinə dair bir müddət əvvəl mətbuatda yer almış iddialar isə Tehranı əməlli-başlı narahat etmişdi. İran rəsmi səviyyədə bildirmişdi ki, buna imkan verə bilməz.İrəvanda sözügedən ərazilərin “Tehranın tarixi yuridikasiyasına” verilməsinə dair cəfəng ideyaların müzakirə olunması da, görünür, İranın həmin ərazilərə marağından irəli gəlir. İstisna deyil ki, söhbət həmin ərazilərdə sülhməramlılar qismində İran qüvvələrinin yerləşdirilməsi variantından gedir. Lakin Ermənistanda bilməmiş deyillər ki, bu variant münaqişənin həllində vasitəçilik edən böyük dövlətlərin maraqları səbəbindən, eləcə də Azərbaycanın mövqeyindən baş tuta bilməz. Bununla belə, İran Qarabağ nizamlanmasında rola malik olarsa şübhə yoxdur ki, əvəzində nəsə almaq istəyəcək. musavat