GünAzTv: Avqustun 1-də Türkiyə Ali Hərbi Şurasının iclası işə başlayıb. Baş nazir Rəcəb Tayyib Ərdoğanın da iştirak etdiyi iclasda Türkiyə Silahlı Qüvvələrinin rəhbərliyində dəyişiklik edilməsi nəzərdə tutulur.

Toplantıda, həmçinin, bir qrup zabitə yeni rütbə və vəzifələrin verilməsi məsələsinə baxılacaq. Bundan başqa, təqaüdə çıxma müddəti çatmış bir qrup zabitin xidmət müddəti artırılacaq.    Toplantıda baxılacaq ən əsas məsələ isə Baş Qərargahın yeni rəisinin və jandarma baş komandanının təyinatıdır. Qeyd edək ki, Baş Qərargah rəisi, ordu generalı İlkər Başbuğ və jandarma baş komandanı, ordu generalı Atilla İşıq avqustun 30-dan xidmət müddətini başa vuraraq təqaüdə çıxır.    Hazırda Baş Qərargah rəisi olan ordu generalı İlker Başbuğ yaşına görə təqaüdə çıxmalıdır. Türk ordusunda formalaşan ənənəyə uyğun olaraq, belə hallarda Baş qərargaha Quru qüvvələrinin komandanı təyin olunur. Türkiyə mediası yazır ki, bu dəfə də hazırda Quru qoşunlarına komandanlıq edən ordu generalı Işık Koşanerin Baş qərargah rəisi olacağı gözlənir. Koşaner bu vəzifədə təqaüdə çıxacağı müddətə qədər - yəni 3 il çalışacaq.    Şurada 35-ə yaxın general və admiralın rütbəsinin artırılması, 45 polkovnikə isə general və admiral rütbələrinin verilməsi gözlənir.    Ali Hərbi Şuranın toplantısına olan maraq, ilk növbədə, Türk ordusu ilə dövlət rəhbərliyi arasında yaşanan gərginliklə bağlıdır. Məlum olduğu kimi, bir qrup yüksək rütbəli zabit Türkiyədə dövlət çevrilişi etməkdə günahlandırılaraq istintaqa cəlb olunub.    Ordu komandanlığı bu iddiaları rədd edir, öz növbəsində, dövlət rəhbərlərinin bu qalmaqalda tutduğu mövqedən narazılıq edir.    Hərbi Şura ərəfəsində, iyulun 23-də ordunun 26 general və admiralının məhkəmə tərəfindən həbsinə qərar verilməsi mövcud gərginliyi daha da artırıb. Türk mediasının xəbərinə əsasən, bu gərginliyin aradan götürülməsi məqsədilə general İlker Başbuğ bir həftə ərzində 2 dəfə baş nazir Ərdoğanla, bir dəfə isə prezident Abdulla Güllə görüşüb.    Xəbər verilir ki, Türk Silahlı Qüvvələri nizamnaməsinə görə, haqqında istintaq aparılan və ya həbsdə olan ordu mənsublarının rütbəsi və vəzifəsi yüksəldilə bilməz. Odur ki, Türkiyədə yeni hərbi ierarxiyanın formalaşmasında istintaqa cəlb olunan general və admiralların iştirakı məsələsi açıq qalır.    Ali Hərbi Şuranın iclası isə avqustun 4-də başa çatacaq. Şuranın qərarları prezident tərəfindən imzalanandan sonra qüvvəyə minəcək.    Müşahidəçilərin fikrincə, Türkiyə hazırda iki yol ayrıcındakı kimi görünür: ya AKP iqtidarı öz məqsədləri yolunda son ciddi maneə olan ordunu sıradan çıxararaq özünün siyasi iradəsinə tabe edəcək, ya da ordu rəhbərliyi ciddi siyasi proseslərə və niyyətlərə baş vuracaq. Baki-xəbər