GünAzTv: Minsk Qrupu regiona əlavə silahlı birləşmələr gətirməklə öz məqsədləri üçün istifadə etmək niyyətindədirlər.

"ATƏT-in Minsk Qrupunun həmsədrləri Dağlıq Qarabağ münaqişəsini kənara qoyub, İran məsələsi ilə məşğul olurlar. Hətta onların son verdikləri bəyanat da göstərir ki, onlar Qarabağ məsələsində danışıqları dayandırmağa və aktiv surətdə İranın məsələsi ilə məşğul olmağa çalışırlar". Bu fikirləri "Şərq"in əməkdaşı ilə söhbətində Siyasi İnnovasiya və Texnologiyalar Mərkəzinin rəhbəri, politoloq Mübariz Əhmədoğlu söyləyib.

 Onun sözlərinə görə, ATƏT-in Minsk Qrupunun həmsədrlərinin verdikləri son bəyanatlarında atəşkəs rejimini saxlamaqdan ötrü əlavə qüvvələrin bölgəyə cəlb olunmasının lazımlığı qeyd olunur. Hazırda atəşkəs rejiminin mövcud olduğunu xatırladan M.Əhmədoğlu hesab edir ki, Minsk Qrupu regiona əlavə silahlı birləşmələr gətirməklə öz məqsədləri üçün istifadə etmək niyyətindədirlər: "Deməli, bunlar regiona əlavə, öz qüvvələrini gətirirlər ki, burdan yeri gəlsə, durub İrana qarşı vuruşsunlar. Yenə deyirəm bu, onlar tərəfindən çox biabırçı hadisədir ki, əsas məşğul olmalı olduqları işi - Dağlıq Qarabağ münaqişəsini kənara qoyub başqa məsələ ilə - İranla məşğuldurlar. Mən tam səmimiyyətlə bildirim ki, Ermənistan da bu prosesdə iştirak edir. Rəsmi İrəvan İranın başının altına yastıq qoymaqla məşğuldur. Ermənistanın müdafiə naziri Seyran Ohanyan gedib bildirdi ki, guya bu işlərlə ancaq Rusiya məşğul olacaq. Harda görünüb ki, tək Rusiya məşğul olsun? Yəni İran Ermənistanın sözünə inanır ki, Amerika bu regiondan çıxıb gedir? Bu ağlagələsi bir şey deyil. Ona görə mən elə başa düşürəm ki, ATƏT-in Minsk Qrupu çox biabırçı bir vəziyyət yaradıb. Madam öz işlərini bacarmırlarsa, ən yaxşısı regiondan çıxıb getməlidirlər. Yoxsa İranı da bura qarışdırmaqla çox dərin bir uçurum yaradırlar. Əgər Dağlıq Qarabağ müharibəsi başlayıb 5-10 günə qurtara bilərdisə, bunlar İranı da prosesə qoşmaqla istəyirlər ki, illər boyu bölgədə müharibə qızışsın. Onların istəyinə görə nəticədə bu regionda elə qırılan İran, Azərbaycan olacaq, əziyyət çəkən Türkiyə olacaq. Yəni özlərindən başqa regionda demək olar ki, hamı əziyyət çəkir".       ATƏT-in Minsk Qrupunun yalnız və yalnız Dağlıq Qarabağ münaqişəsini tənzimləməkdən ötrü yaradıldığını xatırladan politoloq əlavə edib ki, ilk əvvəllər neytral Avropa dövlətlərinin nümayəndələri prosesə rəhbərlik edib: "Sonra Rusiya təkbaşına sədrlik etdi. Sonra Amerika ilə Rusiya həmsədrlik etdi. Daha sonra isə üçtərəfli, yəni Avropa Birliyi də Fransanın timsalında qoşuldu. Bunların mandatında Dağlıq Qarabağ münaqişəsini tənzimləməkdən başqa heç bir şey yoxdur. ATƏT-in Minsk Qrupunun mandatında münaqişənin tərəfləri yalnız və yalnız Azərbaycan və Ermənistandır. Dağlaq Qarabağ münaqişəsi regionunda olan digər dövlətlərin adı belə çəkilmir. Yəni Gürcüstanın, İranın, Türkiyənin adları hallanmır. Hər iki ölkə ancaq ATƏT-in Minsk Qrupunun üzvü olan dövlətlərlə bu məsələ ilə əlaqədar danışıqlar apara bilərlər".      "Belə olan halda rəsmi Bakı hansı mövqeni tutmalı və hansı addımlar atmalıdır" sualına politoloq belə cavab verib: "Mən hesab edirəm ki, əgər bu günə qədər rəsmi Bakı Amerika ilə Ermənistanın birgə oyununa, yəni İranı aldada-aldada oyuna cəlb etmək prosesinə getməyibsə, Tehran bunu başa düşməlidir. Azərbaycan bütün dünya dövlətlərinə qarşı dura bilməz. İran ortalığa mövqe qoymalıdır ki, Ermənistanın dediyi yalanlara inanır, yoxsa inanmır. ATƏT-in Minsk Qrupunun Dağlıq Qarabağ münaqişəsinin tənzimlənməsi ilə bağlı son oyunları Azərbaycan ərazisindən kənara çıxır və İranın ərazisinə daxil olur. Ona görə rəsmi Bakı, sadəcə olaraq hazırda təklifləri qəbul etmir, gözləmə mövqeyində dayanır. Gözləyir ki, vəziyyət dəyişilsin. İran isə hələ ki, susur".