GünAzTv: Dünya təhlilçiləri İslam ölkəsinə beynəlxalq təzyiqlərin güclənməsindən qorxulu nəticələr çıxarır.

Son dövrlər İrana qarşı beynəlxalq ictmaiyyət tərəfindən artan təzyiq fonunda Dağlıq Qarabağ münaqişəsinin adı da buna paralel olaraq daha tez-tez hallanmağa başlayır. Məsələ ilə bağlı Türkiyənin TÜRKSAM mərkəzinin direktoru Sinan Oğan isə olduqda maraqlı bir açıqlma ilə çıxış edib.  Onun sözlərindən belə aydın olur ki, İran öz üzərindən diqqəti yayındırmaq üçün Azərbaycan və Ermənistan arasında Dağlıq Qarabağ münaqişəsini yenidən alovlandıra bilər: "İran regionda diqqəti yayındırmaq məsələsində böyük ustadır. Məsələn, dünyanın diqqəti İrana qarşı iqtisadi embarqolara yönəldiyi bir vaxtda gözlənilmədən İsrail hərbçiləri Qəzzaya humanitar yardım aparan Türkiyə gəmilərinə hücum etdi. Bəzi türk ekspertləri hesab edir ki, Qəzzaya humanitar yardım göndərilməsini təşkil edən şəxslərlə İran arasında sıx əlaqələr olub. Sabah da İran küncə sıxışdırılanda, diqqəti özündən yayındırmaq üçün Azərbaycan və Ermənistan arasında Dağlıq Qarabağ münaqişəsini yenidən alovlandıra bilər. Bunun üçün İran Ermənistana vədlər verər ki, onun təxribatçı hərəkətlərini dəstəkləyəcək. Tehranın İrəvanla münasibətləri isə çox sıxdır".    Xatırlatmaq yerinə düşərdi ki, Ermənistanın müdafiə naziri Seyran Ohanyan iyulun 17-18-də İranda səfərdə olub. Onu Tehrana İranın müdafiə naziri Əhməd Vahidi dəvət edib. Seyran Ohanyan səfər çərçivəsində iranlı həmkarı ilə danışıqlar aparıb. Onun İranın hərbi-siyasi rəhbərliyilə görüşləri də keçirilib. Tərəflər regional və beynəlxalq məsələləri, eləcə də ikitərəfli maraq doğuran mövzuları müzakirə edib. Məlumatlara görə, tərəflər arasında hərbi əlaqələrin gücləndirilməsi də müzakirə olunub. Bu yaxınlarda isə İran prezidenti Mahmud Əhmədinejad Ermənistana səfər edəcək.    Bunu Ermənistanın Tehrandakı səfiri Qriqor Arakelyan bildirib. Ölkəsinin Dağlıq Qarabağ münaqişəsilə bağlı tutduğu mövqeyə görə Tehrana minnətdar olduğunu deyən səfirin sözlərinə görə, Ermənistan rəhbərliyi Əhmədinejadı İrəvana səfərə dəvət edib. "Uyğun vaxtda səfər baş tutacaq" - deyə Arakelyan qeyd edib.    Beləliklə, İran və Ermənistan arasında sıx münasibətlərin formalaşması aydın görünür və İran öz üzərindən təzyiqləri yayındırmaq üçün, həqiqətən də, İrəvana təsirlərindən istifadə edərək Qarabağ münaqişəsini alovlandıra bilər. İrana təzyiq isə getdikcə artır. Belə bir vaxtda isə İran parlamenti uranın 20 faizədək zənginləşdirilməsi barədə qanun layihəsi qəbul edib. İndi layihəni ölkənin ali qanunverici orqanı olan İnqilab Şurası təsdiqləməlidir. Sənəddə deyilir ki İran ona tətbiq edilmiş beynəlxalq sanksiyalara qarşı tədbirlər görməlidir.    İran uran zənginləşdirilməsi üzərində işi dayandırmaqdan imtina etdiyinə görə BMT-nin Təhlükəsizlik Şurası iyunun 9-da ona qarşı yeni sanksiya tətbiq elədi ki, bu artıq sayca 4-cüdür. Beynəlxalq aləm ehtiyat edir ki İran uran zənginləşdirilməsindən nüvə silahının istehsalında da istifadə edə bilər. Tehran ittihamı rədd edir və nüvə proqramının sırf dinc məqsədlər üçün nəzərdə tutulduğunu deyir. Kuba inqilabının lideri Fidel Kastro hesab edir ki, İrana hücum artıq həll olunmuş məsələdir.Kastro Tehranın 20 kiloqram uranı 20%-dək zənginləşdirdiyini xatırladıb və bunun nüvə obyektinin yaradılmasına kifayət etdiyini söyləyib: "Bu, İrana hücum etmək haqda artıq çoxdan qərar qəbul etmiş şəxsləri daha da əsəbiləşdirir".    Bu arada isə Britaniyanın Bredford Universitetindən sülh araşdırmaları üzrə professor Pol Rocers bildirib ki, Amerikanın İrana qarşı hərbi əməliyyatlara başlamaq ehtimalı azdır, lakin İsrailin bu addımı atacağı risqi çoxalıb: "İsrail Birləşmiş Ştatlardan uzaq məsafələri qət edə bilən bombardmançı təyyarələr alıb. Uzaq məsafələrə uça bilən pilotsuz kəşfiyyat təyyarələrini təkmilləşdirib və belə ehtimal var ki, İraqın şimalında, habelə Azərbaycanda hərbi əməliyyatları dəstəkləmək üçün mərkəzlər yaradıb. Bütün bunlar İsrailin İrana qarşı hərbi əməliyyatlara başlamaq potensialını artırır".    Bildirilir ki, İsrail liderləri İrana qarşı bütün variantların masa üzərində olduğunu bəyan edir.    Əsas ofisi Londonda yerləşən "Oxford Research Group" mərkəzinin analitiklərinin qənaətinə görə, İsrailin əməliyyatları təkcə nüvə və raket potensialının sıradan çıxarılmasına yönəlməyəcək, eyni zamanda zavodları, elmi-tədqiqat mərkəzlərini və laboratoriyaları da hədəfə alacaq. Bu isə mülki əhali arasında böyük tələfata gətirib çıxaracaq. Həmçinin, bombardmanlar zamanı Tehrandakı hədəflər də vurulacaq, çox güman ki, İranın nüvə fəaliyyətini idarə edən texnokratları da aradan götürməyə cəhdlər olacaq.    İranın daxili işlər naziri Məhəmməd Mustafa Nəccar isə bildirib ki, ölkəsi tezliklə sərhədlərinin mühafizəsini gücləndirəcək. O deyib ki, ABŞ-ın və İsrailin himayə etdiyi terrorçu qruplar vaxtaşırı İranda vəziyyəti qarışdırmaq üçün müəyyən təxribatlar və terror aktları törədir: "Biz bunu bilirik və bu cəhdlərin qarşısını alacağıq. Onlar qonşu ölkələrdə xüsusi təlim keçərək elə həmin ölkə vasitəsilə istər qanuni, istərsə də qanunsuz şəkildə İran sərhədlərini keçib öz çirkin niyyətlərini həyata keçirirlər". Qeyd edək ki, İranın təhlükəsizlik qüvvələri 5 iyul axşamı Zahidan şəhər məscidində terror aktı törədənlərin izinə düşüb. Təhlükəsizlik qüvvələrilə terrorçular arasındakı toqquşmada 6 terrorçu öldürülüb. Baki-Xəbər