GünAzTv: Keçmiş prezident Məhəmməd Xatəmi iyulun 20-də İran-İraq müharibəsinin bir qrup iştirakçısı, İran müxalifətinin liderlərindən olan Milli Etimad Partiyasının rəhbəri Mehdi Kərrubi isə iyulun 19-da islahatçı tələbələrlə görüşüblər.

Xatəmi çıxışında deyib: “İslamda hökmranlıq üçün əsas şərt xalqın razılığıdır. Nə islam peyğəmbəri, nə İmam Əli, nə də dinin digər əsas nümayəndələri xalqın razılığını əldə etmədən hökmranlıq etməyə razı olubblar. Başqa sözlə, onlar öz rəy və istəklərini nəyin bahasına olur-olsun zorla xalqa qəbul etdirmək istəməyiblər.

GünAzTv mətbuat mərkəzinin “Media Forum”-a istinadən yaydığı məlumata görə, Xatəmi sözlərini belə dəvam etdirib:  Xalqın razı qalması üçün hakimiyyət xalq qarşısında cavabdeh olmalıdır. Bizim demokratiyanın bərqərar olunması üçün israrımız din qayda-qanunlarına söykəndiyimizi, ona bağlılığımızı göstərir. Biz az diqqət etdikdə ilk din rəhbərlərimizin rəftar və mövqelərində demokratiyanın kökünü və nişanələrini tapmaq mümkündür.

Başqalarını əsasız olaraq nədəsə günahlandırmamaq, insanların şəxsi və ailəvi işlərinə qarışmamaq, şəxsiyyətə pərəstişdən, yaltaqlıq və riyakarlıqdan uzaq olmaq, cəmiyyətdəki əsas azadlıqları və digər ehtiyacları təmin etmək əxlaqa söykənən, bəyənilən hakimiyyətlərin şərtlərindən və nişanələrindəndir. Hökmranların zorakılıq etməsi çox pisdir. Ədalətsizlik pislənməli, tənqid olunmalıdır. Ədalət adına edilən ədalətsizliyin də qarşısı alınmalıdır”.

Digər xəbərə əsasən, İran müxalifətinin liderlərindən olan Milli Etimad Partiyasının rəhbəri Mehdi Kərrubi isə iyulun 19-da islahatçı tələbələrlə görüşüb.

Mehdi Kərrubi hökuməti kəskin tənqid edib: “Tarixin heç bir dövründə hakimiyyətdəkilər indiki kimi açıq-aşkar yalan danışmayıb, mövhumat və xurafat yaymayıb, xəcalət çəkmədən vətəndaşlara qarşı zorakılığa əl atmayıb. İslam inqilabı böyük və mübarək bir hadisə idi. Lakin indiki şübhəli hakim cərəyan inqilabı öz yolundan yayındıran bir cərəyandır. Ölkədə əxlaq sıradan çıxıb, onun yerini yalan, böhtan, iftira və digər əxlaqi rəzalətlər tutub, bir xərçəng vəzi kimi cəmiyyətin hər yerinə nüfuz edib. Bu gün dövlət xəzinəsindən bəhrələnən bəzi cənabların sayəsində başqalarına şər və böhtan atmaq gündəlik məşğələyə çevrilib.

Bəşəriyyət tarixi sübut edir ki, heç bir hökumət yalan, riyakarlıq və zorakılıq etməklə qala bilməz. Cəmiyyətdəki müxtəlif səsləri boğmağa, plüralizmi ləğv etməyə çalışanlar bəşəriyyət təcrübəsindən dərs almayıblar. Qanuna zidd rəftar etmək, qeyri-hökumət qurumlarını məhv etməyə çalışmaq, zorakılıq etmək, din və dini müqəddəslərdən sui-istifadə etmək, yalan danışmaq, insanların şəxsi ailə işlərinə qarışmaq və İran xalqını çör-çöp adlandırmaq bəs deyilmiş kimi bu gün də ölkədə təkpartiyalılıqdan dəm vururlar. Lakin onlar bu arzularını gora aparacaqlar”.

Bir neçə gün əvvəl dini rəhbər ayətullah Əli Xamneyinin ali təhsil ocaqlarındakı nümayəndələri ilə görüşən prezident Mahmud Əhmədinejad müstəqil və müxalif partiyaların fəaliyyətini pisləyərək ölkədə yalnız bircə qanuni partiyanın mövcud olduğunu demişdi: “Ölkədə müxtəlif partiya və siyasi cərəyanların yaranması ilə inqilab dəyərlərinin fatihəsi oxundu. Halbuki bizim sistemdə yalnız bircə partiya var. O da “Vilayət” (ayətullah Xamneyinin tərəfdarları nəzərdə tutulur) partiyasıdır”.