“Millətçilik” qəzetinin redaktoru Sevda Əsgərova mükafatlandırıldı

SON XƏBƏRLƏR

“Millətçilik” qəzetinin redaktoru Sevda Əsgərova mükafatlandırıldı

2021.10.20, 07:36

Gunaz.tv

GünAzTv: “Millətçilik” qəzetinin redaktoruna mükafatı Diasporla iş üzrə Dövlət Komitəsinin şöbə müdiri Elşad Miraləm təqdim etdi.

İyulun-17-də Mətbuat Şurası, Diasporla İş üzrə Dövlət Komitəsi və Heydər Əliyev adına Beynəlxalq Azərbaycan Forumunun təşkilatçılığı ilə keçirilən Diaspor məsələlərinin kütləvi informasiya vasitələrində işıqlandırılması mövzusunda müsabiqənin qaliblərinin mükafatlandırma mərasimi keçirilib.

Bu münasibətlə “Ambassador” mehmanxanasında keçirilən tədbirdə çıxış edən Mətbuat Şurasının sədri Əflatun Amaşov milli mətbuatımızın 135 illiyi ilə bağlı regionlarda keçirilən tədbirlərin yekunlaşdığını bildirib. Mətbuatımızın formalaşmasında Həsən bəy Zərdabi, Əli bəy Hüseynzadə, Əhməd Ağaoğlu, Cəlil Məmmədqluzadə və digərlərinin əməyindən danışan Əflatun Amaşov deyib ki, hər bir xalqın, dövlətin güclü olmasında güclü diaspor amilinin xüsusi rolu var: “Keçirilən bu müsabiqə də bu sahəyə həsr olunub”. Diaspor İşləri üzrə Dövlət Komitəsinin Aparat rəhbəri Nəriman Qurbanov diaspor və lobbi quruculuğuna toxunub, bu məsələlərin mətbuatın gündəmində saxlanılmasının zəruri olduğunu vurğulayıb. Heydər Əliyev adına Beynəlxalq Azərbaycan Forumunun prezidenti Mirkazım Seyidov Fondun elan etdiyi müsabiqə ilə bağlı təşkilatı işlərin Mətbuat Şurası və Dövlət Komitəsi tərəfindən yüksək səviyyədə görüldüyünü qeyd edib. Tədbirdə Rusiya Jurnalistlər Birliyinin sədri tərəfindən Mətbuat Şurasının sədri Əflatın Amaşova ünvanlanan məktub oxunub və diplom verilib. Rusiya Jurnalistlər Birliyinin sədri Əflatun Amaşova “mətbuata uzanan əlləri kəsmək üçün” rəmzi qılınc da hədiyyə edib. Tədbirdə bu qılınc da Mirkazım Seyidov tərəfindən Mətbuat Şurasının sədrinə təqdim olunub.

“Millətçilik” qəzetinin redaktoru Sevda Əsgərova müsabiqəyə təqdim etdiyi “AZƏRBAYCANLILARIN KOMPAKT YAŞAMAMASI PROBLEMLƏRDƏN BİRİDİR” (“Millətçilik” qəzeti № 025 (091), 10 iyul 2010-cu il ) məqaləsinə görə fəxri diplomla mükafatlandırıldı. “Millətçilik” qəzetinin redaktoruna mükafatı Diasporla iş üzrə Dövlət Komitəsinin şöbə müdiri Elşad Miraləm təqdim etdi.

GünAzTv kollektivi olaraq “Millətçilik” qəzetinin redaktoru tanınmış jurnalist xanım Sevda Əsgərova və qəzetin redaksiyasını səmimi qəlbdən təbrik edir, Sevda xanıma gələcək fəaliyyətlərində uğurlar arzulayırıq.

GUNAZ.TV

SON XƏBƏRLƏR