GünAzTv: Klintonun Bakı səfərindən rusiyalı politoloq İranla bağlı sensasiyalı nəticə çıxarıb.

ABŞ (Amerika Biləşmiş Ştatları) və İran arasında yaşanan ziddiyyət və bunun Dağlıq Qarabağ münaqişəsinə təsiri ətrafında olduqca maraqlı proseslər cərəyan etməkdədir. İndi bir çox siyasi dairələrdə hesab edilir ki hər iki məsələ getdikcə bir-birinə daha çox bağlanmaqdadır. Sözügedən fikirlə bağlı mövqeyini bölüşən tanınmış rusiyalı politoloq Strateji Modelləşdirmə Mərkəzinin vitse-prezidenti Qriqori Trofimçuk bildirir ki ABŞ dövlət katibi Hillari Klintonun Cənubi Qafqaz dövlətlərinə səfərindən sonra bu məsələ daha qabarıq şəkildə gündəmə gəlib. Onun sözlərinə görə xanım Klintonun səfəri Dağlıq Qarabağ münaqişəsinə təsirsiz ötüşməyəcək. İran ətrafında halqanın getdikcə daralmaqda olduğunu bildirən politoloq vurğulayır ki indi ABŞ Tehranla qonşu olan dövlətlərin antiiran kampaniyasında dəqiq mövqelərini bilmək istəyir: "İndi gəlin Qarabağ məsələsinə İran kontekstində yanaşaq. Azərbaycanın İranla bütün körpüləri yandırması üçün rəsmi Bakıya hər şey vəd edirlər. Buraya təkcə Dağlıq Qarabağ ətrafında işğal edilmiş rayonların yox eləcə də Dağlıq Qarabağın özünün də geriyə qaytarılması vədi daxildir. Qarabağ ümumiyyətlə İrana zərbə endirilməsi üçün əsas məntəqə meydanlarından biri ola bilər". Lakin politoloq onu da bildirir ki Azərbaycan bununla bağlı edilən təkliflər ətrafında ciddi düşünməlidir. Əks təqdirdə işğal altında olan ərazilərinin azad olunması prosesi bir qədər də uzana bilər. Xatırladaq ki rəsmi Bakıda ATƏT-in Minsk Qrupunun həmsədr dövləti kimi ABŞ-dan Dağlıq Qarabağ münaqişəsinin həllində fəallığını artırmağı istəyir. Hazırda belə hesabedilir kiBakı və Vaşinqton arasında münasibətlər yaxşılaşmağa doğru getdiyindən ABŞ özü də sözügedən problemin həllinə diqqəti artıracaq. Münasibətlər isə Hillari Klintonun Azərbaycana səfərindən sonra daha sürətlə yüksəlməkdə davam edir. Amerika-Türkiyə şurasının sədri Riçard Armitacın fikrincə də dövlət katibi Hillari Klintonun Azərbaycana bu yaxınlarda səfəri Birləşmiş Ştatlarla Azərbaycan arasında münasibətlərə müsbət stimul verə bilər: "Səfər ABŞ-ın münasibətlərdə yaranmış soyuqluğa son qoymaq istədiyinə işarədir. Həqiqətən də artıq uzun zamandır ABŞ dövlət katibini Bakıya göndərmirdik. Dövlət katibinin müavini kimi oraya səfər etmişdim cənab Əliyevlə görüşmüşdüm onun atasını yaxşı tanıyırdım. Münasibətlərdə bir soyuqluq var idi fikrimcə bu soyuqluğa son qoyulub və ümid edirəm ki cənab Əliyev gələcəkdə cənab Obama ilə görüşəcək və hər şey öz yoluna qoyulacaq. Müdafiə və təhlükəsizlik sahələrində münasibətlər artıq illərdir sabit qalır lakin siyasi əlaqələrimizin də əvvəlki səviyyədə olmasına ehtiyac var".    Xatırladaq ki daha əvvəl Vaşinqton Azərbaycanla münasibətlərə önəm verdiyini nümayiş etdirərək Müdafiə naziri Robert Qeytsi Bakıya göndərmişdi. Qeytsin Azərbaycana prezident Obamanın adından apardığı məktubda ABŞ prezidenti ikitərəfli münasibətlərdə ciddi məsələlərin mövcud olduğunu bildirmişdi. Bu məsələlərin nədən ibarət olduğu sualının cavabında cənab Armitac burada ABŞ-ın Türkiyə-Ermənistan yaxınlaşmasına çalışmasını xüsusi qabardıb: "Yenə də deyirəm ki bizim müdafiə sahəsində münasibətlərimiz davamlı inkişaf edib. Lakin bu bir qədər balansdan kənara çıxıb. Çünki biz eyni zamanda təhlükəsizlik siyasi təhsil və mədəni sahələrdə də əlaqələrimizin eyni səviyyədə yaxşı olmasını istəyirik. Bir şeyi də əlavə etmək istəyirəm ki Azərbaycanın nefti var zəngin dövlətdir onun iqtisadiyyatı inkişaf edəcək demək asandır. Lakin neftlə zəngin bir sıra ölkələrin tarixindən görürük ki neftdən gələn gəlirlərlə düzgün davranmırlar. Mən prezident Əliyevə bu mənada bir qədər imkan vermək istərdim çünki fikrimcə o başqa ölkələrin də edə bilmədiyi bir işi görməyə çalışır və bu da sərvətlərin Azərbaycan vətəndaşları arasında bərabər bölüşdürülməsindən ibarətdir.    Rəsmi Bakı Vaşinqtonun Türkiyə və Ermənistan arasında sərhədlərin açılması istiqamətində səylərini bu bir ilə yaxın vaxt ərzində diqqətlə izləyirdi. Azərbaycan Türkiyə və Ermənistan arasında münasibətlərin normallaşmasını alqışlayır.    Lakin Azərbaycan sərhədlərin açılması və Dağlıq Qarabağ probleminin həlli məsələlərinin bir-birilə bağlı olduğunu hesab edir və Vaşinqtonun bunları bir-birindən ayırmasına ABŞ-ın Azərbaycanın maraqlarına əhəmiyyət verməməsi kimi baxır. Klintonun səfəri müəyyən mənada bu qorxuların azalmasına xidmət edib".    Onun sözlərinə görə dövlət katibi Klinton ABŞ-ın Fransa və Rusiya ilə Helsinki prinsipləri və Dağlıq Qarabağ münaqişəsinin həlli prinsiplərinin nədən ibarət olması işi üzərində fəalliyyətlərini aydın ifadə edib: "Biz ümid edirdik ki Türkiyə və Ermənistan arasında protokolların imzalanması Dağlıq Qarabağ münaqişəsinin həllinə müsbət təsir göstərəcək. Lakin qısa müddət üçün bunun əks təsiri oldu və Azərbaycanın reaksiyasına səbəb oldu.    Fikrimcə bu bizim hamımızın səhvi idi. Məncə ABŞ bu məsələdə kifayət qədər getmiş məsləhətləşmələr aparmamışdı. Türkiyə də bizim Azərbaycandakı dostlarımızı müəyyən dərəcədə təəccübləndirdi. Hesab edirəm ki hamımız bundan dərs aldıq". Bakı-xəbər