GünAzTv: Həmsədr ölkələrin XİN rəhbərləri Almatı görüşü ilə bağlı birgə bəyanat veriblər.

ATƏT-in Minsk qrupuna həmsədrlik edən ölkələrin nümayəndə heyətlərinin rəhbərləri, Rusiyanın xarici işlər naziri Serqey Lavrov, Fransanın xarici işlər naziri Bernar Kuşner və ABŞ (Amerika Birləşmiş Ştatları) dövlət katibinin müavini Ceyms Steynberq Dağlıq Qarabağ münaqişəsi ilə bağlı birgə bəyanat veriblər. Bəyanat ATƏT-in rəsmi saytında yerləşdirilib. 

Bəyanatda bildirilir ki, Rusiya, Fransa XİN rəhbərləri və ABŞ dövlət katibinin müavini Almatıda keçirilən ATƏT ölkələrinin XİN rəhbərlərinin qeyri-rəsmi görüşündə Azərbaycan xarici işlər naziri Elmar Məmmədyarov və Ermənistan xarici işlər naziri Edvard Nalbandyanla görüşüblər. Həmsədr ölkələrin nümayəndə heyətlərinin rəhbərləri ötən ilin dekabrın 1-də Afinada ATƏT-in XİN rəhbərlərinin görüşündə qəbul edilmiş bəyanata müraciət edərək tərəflərə Dağlıq Qarabağ münaqişəsinin həllində Helsinki Yekun Aktında nəzərdə tutulan prinsiplər əsasında, əsasən güc tədbiq etməkdən çəkinmək, ölkələrin ərazi bütövlüyününü qorunması, eyni zamanda xalqların bərabər hüquq və öz müqəddaratını təyin etmə hüququ əsasında sülhə nail olma öhdəliklərini xatırladıblar. Onlar təkrar ediblər ki, Rusiya, Fransa və ABŞ prezidentləri tərəfindən 2009-cu il iyunun 10-da İtaliyanın Akvill şəhərində formalaşdırılan və həmin ilin iyunun 26-da Moskvada təkrarlanan elementlər münaqişənin ədalətli və davamlı həllində əsas olmalıdır. Təklif edilən elementlər özündə vahid bütövlük əks etdirir və onlardan bəzi elementlərin çıxarılmasına istənilən cəhd balanslaşdırılmış həll yolununun əldə edilməsini mümkünsüz edəcək. 

Fransa XİN rəhbəri Bernar Kuşner və ABŞ dövlət katibinin müavini Ceyms Steynberq, bu ilin yanvarın 25-də Soçidə, iyunun 17-də Sankt- Peterburqdakı görüşləri nəzərə alaraq, Rusiya prezidenti Dmitri Medvedevə və xarici işlər naziri Sergey Lavrova tərəflər arasında fikir ayrılığının aradan qaldırılmasında göstərdikləri cəhdlərə görə təşəkkür ediblər. 

Vəyanatda daha sonra qeyd olunub: "Nazirlər qeyd ediblər ki, münaqişə tərəflərinin indiyə qədər göstərdiyi səylər mövcud fikir ayrılıqlarını aradan qaldırmaq üçün kifayət etməyib. Onlar bu yaxında regionda gərginliyi artıran, iyunun 18-19-da baş verən ciddi silahlı insidentlərə və siyasi bəyanatlara görə təəssüfləndiklərini bildiriblər. Onlar xəbərdarlıq edibklər ki, güc tətbiqi hazırkı vəziyyəti yaradıb və ondan yenidən istifadə münaqişənin dərinləşməsinə, insanların əziyyət çəkməsinə gətirib çıxara bilər.

Onlar inadkarcasına tərəfləri danışıqların ümumi əsasla davam etməsinə nail olmaq üçün kompromis ruhunu gücləndirməyə çağırıblar. Tərəflərə 1994-cü ildə əldə edilmiş atəşkəs rejiminin güclənməsi və daha yaxşı gələcək siyasi dialoq şəraitinin yaranması və razılığın əldə edilməsi üçün əlavə addımların atılmasının lazım olduğunu bildiriblər. 

Həmsədr ölkələrin nümayəndə heyətlərinin rəhbərləri tərəfləri sülh razılığı əldə etmək üçün dəstəkləyəcəklərini bildiriblər. Ancaq qeyd ediblər ki, Dağlıq Qarabağ münaqişəsinin bitməsi üçün cavabdeh tərəf Azərbaycan və Ermənistan liderləri olaraq qalır".

Xatırladaq ki, Azərbaycan və Ermənistan arasında münaqişə 1988-ci ildə Ermənistanın Azərbaycana ərazi iddiası ilə başlayıb. Dağlıq Qadabağ və 7 rayonu - Azərbaycanın 20 faiz ərazisi hazırda erməni silahlı qüvvələrinin işğalı altındadır. itv