GünAzTv: Dünən Azərbaycan prezidenti İlham Əliyev Gürcüstana işgüzar səfər edib. Onun təyyarəsi paytaxt Tiflisə yox, Qara dəniz sahilindəki Batumiyə enib və Əliyev şəxsən Gürcüstan prezidenti Mixail Saakaşvili tərəfindən qarşılanıb. Daha sonra onların arasında əvvəlcə təkbətək, ardınca isə nümayəndə heyətlərinin iştirakı ilə danışıqlar olub.

GünAzTv mətbuat mərkəzinin “Musavat”a istinadən yaydığı məlumata görə, Danışıqları yekunlaşdıran prezidentlər mətbuat qarşısına çıxıblar və Gürcüstanla Azərbaycanın strateji birliyinə dair gen-bol tərif deyiblər. Xüsusən də Saakaşvili Azərbaycan dövlətinin, indiki və keçmiş prezidentlərinin ünvanına minnətdarlıq dolu ifadələr işlədib. Bu da təəccüblü deyil.

Saakaşvilinin hakimiyyətinin və Gürcüstan dövlətinin ayaqda qalması böyük ölçüdə məhz Azərbaycanın dəstəyi sayəsində mümkün olub.Saakaşvili bu dəstək haqda minnətdarlıqla danışaraq deyib ki, Azərbaycanla Gürcüstanın dostluğu zamanın sınağından çıxıb. Onun fikrincə, iki dövlət arasında münasibətlər strateji müttəfiqlikdən də o yana keçib və əsl qardaşlıq kimi qiymətləndirilə bilər: “Azərbaycan həmişə, heç bir tərəddüd etmədən həyati əhəmiyyətli strateji məsələlərdə Gürcüstanın yanında olub. Bu, əsl qardaşlıqdır. Biz eyni orqanizmin hissələriyik, Azərbaycan üçün ağrılı məsələ bizim üçün də ağrılı məsələdir”.Gürcüstan prezidenti bir qədər də irəli gedərək Azərbaycanla Gürcüstanın konfederativ dövlətdə birləşməsi ideyasını gündəmə gətirib. O deyib ki, belə ideyanı vaxtilə Heydər Əliyev irəli sürmüşdü. Saakaşvili Azərbaycanın onun ölkəsinə çətin məqamlarda göstərdiyi yardımlardan biri haqda danışaraq deyib ki, 2005-ci ildə Rusiya qaz kəmərini və elektrik xəttini partladanda Azərbaycan öz əhalisindən elektrik enerjisini kəsib Gürcüstana vermişdi.İ.Əliyev isə cavab nitqində Gürcüstanın uğurlarının Azərbaycanın uğurları olduğunu, bu ölkənin xarici investorlar üçün xeyli cəlbedici hala gəldiyini deyib. O, əlavə edib ki, azərbaycanlı investorlar da son vaxtlar Gürcüstana həvəslə investisiya qoyur: “Bu isə o deməkdir ki, Gürcüstanda uğurlu proseslər gedir”.İ.Əliyev də iki ölkə arasında dostluğun tarixindən danışıb, Gürcüstanla Azərbaycanı birləşdirən enerji layihələrindən bəhs edib. Azərbaycan prezidentinin səfəri zamanı bağlı qapılar arxasında gedən danışıqların mahiyyəti məlum olmasa da bildirilir ki, tərəflər enerji də daxil olmaqla bir sıra sahələrdə əməkdaşlıq layihələrini müzakirə ediblər.Azərbaycan prezidentini səfərdə müşayiət edən sənaye və energetika naziri Natiq Əliyev jurnalistlərə açıqlamasında deyib ki, iki ölkənin enerji şəbəkələrini birləşdirmək layihəsi müzakirə olunur. Onun sözlərinə görə, bu layihə həyata keçiriləndən sonra Gürcüstan vasitəsilə İrana və Türkiyəyə elektrik enerjisi ixrac etmək mümkün olacaq.Digər birgə layihə isə Gürcüstanın qazlaşdırılmasıdır. Natiq Əliyev tezliklə Gürcüstanın bütün ərazisinin Azərbaycan qazı ilə təmin olunacağını deyib. “Azərbaycanda təbii qaz kifayət qədərdir, biz onu qeyri-məhdud həcmdə ixrac edə bilərik” - deyə nazir bildirib.Lakin bu səfər ərəfəsində yayılan xəbərlərdən bəlli olurdu ki, Gürcüstanla Azərbaycan arasında enerji sahəsində əməkdaşlıqda bəzi əngəllər meydana çıxa bilər. Konkret olaraq Gürcüstanı qazla təmin edən “SOCAR-Gorgia” şirkəti bu ölkədə qanun pozuntularına yol verməkdə günahlandırılır və parlamentdə şirkət rəhbərliyinin izahat verməsi tələb olunur. Həmçinin belə xəbərlər var ki, Gürcüstan Bakı-Tiflis-Ceyhan kəməri ilə nəql edilən Azərbaycan nefti üçün tranzit tariflərinin aşağı olması qənaətinə gəlib və bu tariflərin artırılması məsələsi qaldırıla bilər. Eyni məsələ Gürcüstan üzərindən nəql edilən Azərbaycan qazına da aiddir.Lakin son günlər gündəmdə olan digər məsələ də Gürcüstan ərazisindən Ermənistana qaz nəql edən kəmərin satışı ətrafında yaranan səs-küydür. Gürcüstan bu kəməri satışa çıxarmağa hazırlaşır və onun potensial alıcılarından biri də ARDNŞ ola bilər. Şirkət artıq Rusiya qazını Ermənistana ötürən kəmərin səhmlərini almağa maraq göstərir. Ermənilər isə bundan bərk narahat olublar və hesab edirlər ki, kəməri Azərbaycana satmaq Ermənistanın boğazına ipi salıb ucunu Bakıya vermək deməkdir.Ehtimal ki, İ.Əliyevin Batumi səfəri zamanı bu məsələ də müzakirə olunub. Bəzi gürcü mənbələrində isə belə ehtimal irəli sürülür ki, İ.Əliyevin səfəri ABŞ dövlət katibi Hillari Klintonun Bakı və Tiflisə səfərləri zamanı təqdim etdiyi hansısa mühüm planla bağlıdır. Təxminlərə görə, bu plan Gürcüstanla Azərbaycan arasında mühüm birgə fəaliyyətləri nəzərdə tuta bilər.