Davudoğlu :Ermənistan tablonun əskik parçası olaraq qalır

SON XƏBƏRLƏR

Davudoğlu :Ermənistan tablonun əskik parçası olaraq qalır

2021.10.20, 07:36

Gunaz.tv

GünAzTv: Türkiyənin xarici işlər naziri Əhməd Davudoğlu Türkiyənin qonşuları ilə olan problemlərinin həllində önəmli məsafə qət etdiyini, ancaq Ermənistanın bu tablonun əskik parçası olaraq qaldığını deyib.

Bu gün MHP Hatay millət vəkili Turan Çirkinin rəsmi sorğusuna verdiyi cavabda Davudoğlu Dağlıq Qarabağ problemindən bəhs edib. O bildirib ki, problemin həllinə dair müzakirələrdə digər məsələlərlə yanaşı, işğaldan azad ediləcək Azərbaycan torpaqlarında sülhməramlı missiyanın yerləşdirilməsi də müzakirə olunur. Sözügedən missiyanın mövcudiyyəti və yaranması haqda müzakirələrin davam etdiyini bildirən nazir qeyd edib ki, Türkiyə bu istiqamətdə tərəflərə hər hansı təklif etməyib.

Türkiyənin bütün qonşuları ilə əlaqələrini qarşılıqlı hörmət və yaxşı qonşuluq prinsipləri çərçivəsində inkişaf etdirmək arzusunda olduğunu söyləyən Davudoğlu Ermənistanla imzalanan protokollara toxunub: "Bu protokollar uzun məsafəli bir proses olaraq dəyərləndirdiyimiz normallaşmanın ilk addımını təşkil edir. Bu prosesin davamı heç şübhəsiz, Ermənistanın da problemləri həll etmə iradəsilə konstruktiv yanaşma nümayiş etdirməsinə və apardığı siyasətin yaxşı qonşuluq münasibətlərinə uyğun olmasına bağlıdır".

Nazir qeyd edib ki, Cənubi Qafqazda mövcud siyasi ixtilafların sülh yolu ilə həlli bölgədə davam etdirilə bilən təhlükəsizlik və rifahın təmin olunmasının əsas şərtidir: "Cənubi Qafqazın mövcud toqquşma atmosferindən qurtarılıb təhlükəsizlik və əməkdaşlıq sahəsinə çevrilməsi bu bölgədəki bütün ölkələrin gələcəyi və bölgənin rihafı baxımından vacibdir. Cənubi Qafqazda belə bir mənzərənin ortaya çıxması bütün bölgə ölkələrinin yararına olacaq".

Davudoğlu bildirib ki, Türkiyə hökuməti Ermənistanla normallaşma prosesinin Dağlıq Qarabağ probleminin həlli istiqamətindəki səylərə də müsbət təsir edəcəyinə inanır: "Ermənistan və Azərbaycan prezidentləri arasında davam edən müzakirələrin normallaşma prosesi ilə birlikdə yeni hərəkət qazandığına, iki prezidentin bu dönəmdə 9 ikitərəfli görüş keçirdiyinə şahid olduq. Türkiyə bölgədə başlatdığı sülh həmləsini qarşılaşılan çətinliklərə rəğmən davam etdirmək üçün siyasi iradəyə sahibdir. Ermənistan da eyni siyasi iradə və xoş niyyəti göstərərsə, proses bütün bölgənin xeyrinə nəticələnəcək şəkildə irəliləyə biləcək. Türkiyənin uzatdığı dostluq əlinin geri çevrilməsinin isə hər kəsdən çox Ermənistana zərər verəcəyi aydındır".

GUNAZ.TV

SON XƏBƏRLƏR