GünAzTv: ABŞ (Amerika Birləşmiş Ştatları) kəşfiyyatının əlindən qaçmaq bu qədər sadə ola bilərmi?!

İranlı nüvə alimi Şəhram Amiri ABŞ-dan Tehrana qayıdıb. Amirini hava limanında oğlu və həyat yoldaşı qarşılayıb. Alim bir il əvvəl Səudiyyə Ərəbistanında Amerikanın xüsusi xidmət orqanları tərəfindən oğurlandığını iddia edir.  GünAzTv mətbuat mərkəzinin “Bakı-xəbər”-ə iastinadən yaydığı məlumata görə, Amiri Səudiyyə Ərəbistanından ABŞ-a hərbi təyyarə ilə aparıldığını bildirib: "Mən Mədinə şəhərində qaldığım otelin qarşısında Mərkəzi Kəşfiyyat İdarəsi və Səudiyyə Ərəbistanı kəşfiyyat casusları tərəfindən oğurlanaraq naməlum əraziyə aparılmışdım. Məni iynə ilə bihuş etdilər. Gözlərimi açanda özümü böyük bir təyyarənin içində gördüm".    Amiri həmçinin deyir ki nüvə alimi deyil: "Mən nüvə alimi deyiləm və ABŞ-ın xeyrinə casusluq etməmişəm. Problemim olsaydı ölkəyə qayıtmazdım. Tehran universitetlərinin birində tədris edən adi araşdırıcıyam. ABŞ-ın bütün bu hərəkətlərdə məqsədi İrana qarşı siyasi bir oyun başlatmaq idi. Bu ölkədə olduğum son günə qədər jurnalistlərə ABŞ-a könüllü sığındığımı demək İrana qayıtmaqdan imtina etmək şərtilə 50 milyon dollar pul verəcəklərini deyirdilər. Avropa ölkələrinin birində ailə üzvlərimlə birlikdə yaşamağa şərait yaradacaqlarını vəd edirdilər. Lakin mən öz şərəfimi pula satmadım".    İranlı alim israilli casusların da dindirilmələrdə iştirak etdiyini deyib.    İranlı nüvə enerjisi mütəxəssisi orada işgəncələrə məruz qaldığını da deyib: "14 ay ərzində ABŞ təhlükəsizlik orqanları mənə müxtəlif işgəncələr verib məni ölkəmin əleyhinə danışmağa məcbur ediblər. Mən bu gün vətənimə və ailəmin yanına qayıtdığım üçün xoşbəxtəm".    Jurnalistlərə açıqlamasında o bildirib ki xüsusi xidmət orqanları ilə əməkdaşlıq etməsi üçün "güclü psixoloji təzyiq"ə məruz qalıb.    Amerika isə bu ittihamları qəbul etmir. ABŞ dövlət katibi Hillari Klinton bildirib ki Amiri ABŞ-a şəxsi iradəsilə gəlib və onun ölkəni tərk etməsinə heç kim mane olmayıb.    ABŞ-ın adının çəkilməsini istəməyən bir rəsmisi iyulun 14-də BBC radiosuna açıqlamasında deyib ki Şəhram Amiri ABŞ-ın ixtiyarına çox qiymətli məlumat və informasiyalar qoyub gedib.    "Washington Post" qəzeti isə ABŞ administrasiyasındakı adının gizli qalmasını istəyən mənbəyə istinadla bildirir ki iranlı alim əməkdaşlıq üçün MKİ-dən 5 milyon dollar alıb. Qəzet yazır ki İranın Mərkəzi Kəşfiyyat İdarəsi tərəfindən oğurlanaraq ABŞ-a aparıldığını iddia edən nüvə alimi Şahram Əmiri bu məbləği İran nüvə proqramı barədə informasiyaya görə alıb.    Mənbə daha sonra qeyd edib ki Amiri artıq ABŞ-ı tərk etdiyindən bu pulları ala bilməyəcək: "O ona çatmalı olan pulları İrana tətbiq edilən sanksiyalar səbəbindən ala bilməyəcək. Amiri getdi pulları isə qaldı".    Administrasiyanın digər əməkdaşı isə 5 milyon dolların Amirinin verdiyi informasiyanın vacibliyinin qiyməti olduğunu vurğulayıb: "Ödəmələr bu şəxsin hansı işlər gördüyü materialların nə dərəcədə təsdiq olunduğu nəzərə alınaraq ayrılır. Belə böyük məbləği elə-belə vermirlər". Xatırladaq ki iki gün öncə Amiri Vaşinqtondakı Pakistan səfirliyinə gedərək siyasi sığınacaq istəyib və ölkəsinə qayıtmaq istədiyini bildirib. İyulun 14-də isə alim İrana qayıdıb.