GünAzTv: ABŞ-ın (Amerika Birləşmiş Ştatları) dövlət katibi Hillari Klintonun bölgəyə səfərindən sonra maraqlı proseslər baş verməkdədir. Diqqətçəkən gəlişmələrdən biri də Türkiyə-Ermənistan sərhədlərinin açılması ilə bağlı yeni müzakirələrin başlamasıdır.

Qeyd edək ki, Ermənistanda və Türkiyədə iki ölkə arasındakı sərhədlərin sentyabrda ən azından müvəqqəti açıla biləcəyinə dair məlumatlar yayılıb. Buna səbəb Türkiyə XİN-in Ermənistanla həmsərhəd bölgələrin valilərinə sərhədlərin açılmasının texniki tərəflərini həll etmək üçün nə qədər müddət lazım olduğu barədə məktub göndərməsidir. Cavab məktubunda qeyd olunub ki, qərar verilsə, sərhəd-keçid qapıları bir ay-ay yarım ərzində hazır vəziyyətə gətirilə bilər. Digər məlumatlara görə, Türkiyənin Ermənistanla sərhəd bölgələrində magistral yollar təmir olunur, dəmiryol stansiyasında işlər gedir və sanki hər şey sərhədlərin açılması üçündür. Baş verənləri təhlil edən ekspertlərə görə, regionda əlaltından hansısa proseslər gedir. Bir qisim hesab edir ki, yaxın vaxtlarda münaqişə ilə bağlı hansısa irəliləyiş və ya razılaşma reallaşa bilər və bunun qarşılığında sərhədlərin açılmasına hazırlıq görülür. Digər qisim isə hesab edir ki, Qarabağ münaqişəsi ilə bağlı hansısa yenilik yoxdur, sadəcə, Amerikanın təzyiqləri nəticəsində sərhədlər açılır.Əcəba, Azərbaycan bu məsələyə razılıq veribmi? Söhbət ondan gedir ki, bəzi ekspertlərin rəyincə, Amerika bu məsələdə dəridən qabıqdan çıxır və sərhədlərin açılması məsələsinə Azərbaycanın müdaxilə etməməsi üçün xeyli zamandır razılıq almaq istəyir. Belə bir anlaşmanın olması inandırıcıdırmı? Məsələni şərh edən politoloq Vəfa Quluzadə bununla bağlı konkret cavab verməyin çətin olduğunu dedi: “Çünki bu, ilk növbədə Türkiyənin mövqeyindən asılı olan məsələdir. Yəni Türkiyə Ermənistanla sərhədləri açmağa hazırdır, ya yox? Türkiyə rəhbərliyi qəti şəkildə bildirib ki, Qarabağ məsələsi həll olunmayanadək sərhədlər açılmayacaq. Bu bəyanat və vəddən sonra Türkiyə Amerikanın təzyiqləri altında sərhədlər açılarsa, gərək Ərdoğan istefaya getsin. Mən inanmıram ki, Türkiyə buna getsin. Bu dövlət özünü olduqca müstəqil aparır. Ermənistan da özü mövqeyindən çəkilmir. Ona görə də Amerikanın Türkiyəyə təzyiqi heç bir nəticə verməyəcək. Yalnız Qarabağ məsələsi həll ediləndən sonra bu barədə danışmaq olar. Bu problemin həllini də Amerika heç cür sürətləndirə bilmir. Çünki Rusiya məsələnin həllinə veto qoyub, müxtəlif fəndlərlə bu məsələnin uzadılmasına çalışır. Ona görə də inanmıram ki, nəsə gözlənilməz bir şey baş versin”.Politoloq sərhədlərin açılması məsələsinə Azərbaycan hakimiyyətinə razılıq vermədiyini xatırlatdı: “Çünki bu həm də iqtidarın özünün əleyhinə olan məsələdir. Yalnız işğal olunmuş torpaqlar azad edildikdən sonra Azərbaycan buna razılıq verə bilər”. İqtidaryönlü Ana Vətən Partiyasının sədri, deputat Fəzail Ağamalı da Türkiyənin heç bir halda Dağlıq Qarabağ problemi həll olunmadan sərhədləri açmayacağı qənaətindədir: “Bu birmənalıdır. Eyni zamanda Azərbaycanın bununla bağlı mövqeyi birmənalıdır və indiki şəraitdə hansısa dəyişiklik baş verən deyil. Azərbaycan torpaqları işğaldan azad edilmədən Türkiyə Ermənistanla sərhədlərini açmalı deyil. Bu, Azərbaycan cəmiyyətinin qənaətidir. Ermənistanın işğalçı siyasətinə son qoyulmadan sərhədlərin açılması düşmənlərimizə əlavə güc verə bilər. Buna görə də Azərbaycanın mövqeyində hər hansı dəyişiklik gözlənilmir”.