GünAzTv: Bu günlərdə İranın mədəniyyət və irşad naziri Məhəmməd Hüseyni Bakıda səfərdə oldu və azərbaycanlı həmkarı Əbülfəs Qarayevlə əməkdaşlıq protokolu imzaladı. Sənədə əsasən, bu ilin payızında İranda Azərbaycan Mədəniyyət Günləri, daha sonrasa Azərbaycanda İran Mədəniyyət Günləri keçiriləcək.    Beləliklə, üç-dörd aydan sonra İslam Respublikasında Azərbaycan Mədəniyyəti günlərinin keçiriləcəyi gözlənilir.    Lakin bəzi mənbələrə görə, molla rejimində heç də hamı bundan xoşnud olmayıb. Hətta istisna edilmir ki, İranın hakimiyyət dairələrindəki şovinist qafaya sahib olanlar bu tədbirin baş tutmasını əngəlləmək üçün nələrsə planlaşdıra bilərlər. Hər halda, iki gün əvvəl baş vermiş bir olay belə gümana düşmək üçün mövzu verir.    "Butovazerbaycanbirliyi.com" saytı xəbər verir ki, hər il onlarla fars müğənnisi Bakıda ən möhtəşəm salonlarda konsert verir. Ancaq İranın rəsmi TV kanalları və mətbu orqanları Azərbaycan aşıqlarının 10 dəqiqəlik ifasını həzm edə bilməyərək bunu "milli faciə" adlandırır.    Sayt xəbər verir ki, iyulun 6-da Tehranın "Arasbaran" Mədəniyyət Mərkəzində Güney Azərbaycan aşıqlarının konserti olub və həmin konsertdə iştirak etmək üçün Azərbaycan Respublikasından da qonaq qismində bir neçə aşıq dəvət edilib": Konsertdə Güney Azərbaycan aşıqları Azərbaycan aşıq havaları və mahnılarını ifa etmiş, konsertdə qonaq kimi iştirak edən Azərbaycan Respublikasından olan aşıq sənətçilərə hörmət əlaməti olaraq onların da bir neçə mahnı ifa etmələri xahiş edilib. Konsertə qatılan əhali, özəlliklə gənclər qonaq sənətçiləri gözlənildiyindən daha çox rəğbətlə qarşılayıb və alqışladıqları üçün Tehran hökumətinin əlaqədar orqanları ciddi narahatlıq keçiriblər".    Konsert zamanı hökumət məmurları müxtəlif problemlər yaratsalar da, insanların tələbi və təkidi nəticəsində konsert nəzərdə tutulan müddətdən uzun sürüb. Və bu "Arasbaran" mədəniyyət mərkəzinin rəhbərliyinin və Azərbaycan aşıqlarının İran mətbuatının hədəfinə çevrilməsinə səbəb olub.    "Ölkənin rəsmi telekanalı olan "İran TV", müxtəlif xəbər agentlikləri, farsdilli çap mətbuatı məsələ ilə bağlı geniş tənqidi yazılar və xəbərlər yaymaqda hələ də davam edirlər",-deyə mənbə xəbər verir.    "İran TV" Azərbaycan aşıqlarının türk dilində konsert verməsini, türkdilli əhalinin bunu coşqu ilə qarşılamasını və hökumət məmurlarının bu məsələyə "lazimi diqqət" ayırmamalarını "milli faciə" adlandırıb. "TV kanalı bunu (türk dilində mahnı oxunmasını) qanun və islam şəriətinə zidd hərəkət kimi dəyərləndirərək Azərbaycan Respublikasından konsertə qatılan sənətçilərin iştirakını "qaranlıq və şübhəli" məqam kimi təqdim edib",-deyə sayt bildirir.    Telekanal üstəlik, konsert təşkilatçılarının və "Arasbaran" mədəniyyət mərkəzinin rəhbərliyinin cinayət məsuliyyətinə cəlb edilmələrini tələb edib, Azərbaycan Respublikasından olan sənətçilərin ifalarını "əxlaqsızlıq" adlandırmaqdan çəkinməyib.    "Arasbaran" mədəniyyət mərkəzinin rəhbərliyi isə məsələyə münasibət bildirərək bu tip məlumatların əsassız olduğunu və konsert zamanı heç bir qanunsuzluğun, xoşagəlməz halın təşkilatçılar və sənətçilər tərəfindən edilmədiyini söyləyiblər.    Mənbə diqqəti buna cəlb edir ki, "Arasbaran"da bu xoşagəlməz halın yaşandığı bir gündə, yəni iyulun 6-da Bakıda Beynəlxalq Muğam mərkəzində İran müğənnisi Mohtabad və "Rudəki" musiqi qrupunun konserti keçirilib, mərkəzin foyesində isə İran tarixini əks etdirən fotosərgi, son illər bu ölkədə çap olunmuş kitablar nümayiş etdirilib. "Həmin konsert və sərgini isə Azərbaycan mətbuatı dönə-dönə yayımlayıb, Azərbaycan qəzetləri bu haqda palaz-palaz məqalələr yazıblar".