GünAzTv: Mana Neyistani Beynəlxalq Karikaturaçıların Hüquqlarını Müdafiə Şəbəkəsinin 2010-cu il Şücaət mükafatının ona İranda keçən ilki hadisələrlə əlaqədar karikaturalarına görə verildiyini təstiq edib. O bunu mükafatı verən təşkilatdan soruşduğunu, məsələni dəqiqləşdirdiyini bildirib. Karikaturaçı azərbaycanlı olması barədə xəbərləri əsassız adlandırıb.

GünAzTv mətbuat mərkəzinin VOA-ya istinadən yaydığı məlumata görə, Beynəlxalq Karikaturaçıların Hüquqlarını Müdafiə Şəbəkəsinin 2010-cu il Şücaət mükafatının İranlı karikaturaçı Mana Neyistaniyə verilməsinə Azərbaycanlı bəzi qruplar etirzalarını bildiriblər. Məlum olduğu kimi Mana Neyistaninin 2006-cı ildə İran qəzetində çap olunan, azərbaycanlıların təhqir olaraq qəbul elədikləri karikaturaları Güney Azərbaycan boyu kütləvi etiraz aksiyalarına səbəb olmuşdu. Karikatura böhranı ilə başlayan nümayişlər qısa müddət ərzində Güney Azərbaycanlılarının mədəni hüquqları tələbi ilə milli hərəkata çevrilmişdi. Həmin aksiyalar zamanı təhlükəsizlik qüvvələri ilə baş verən toqquşmalar nəticəsində çoxlu adam həbs olunmuş, bədən xəsarəti alan və həyatını itirənlər, itkin düşənlər olmuşdu. Bunu da qeyd edək ki, Azərbaycanlıların etirazları nəticəsində Mana Nəyistani və İran qəzetinin baş redaktoru bir müddət həbs olundular.

Bəzi qrupların Beynəlxalq Karikaturaçıların Hüquqlarını Müdafiə Şəbəkəsinin 2010-cu il Şücaət mükafatının İranlı karikaturaçıya 2006-cı ildə Azərbaycanlıları təhqir edən karikaturalara görə verildiyini irəli sürməsindən sonra Amerikanın səsinin Azərbaycan redaksiyası məsələni araşdırıb və mükafatın Mana Neyistaniyə keçən bir il ərzində İranda  baş verən etiraz nümayişləri ilə əlaqədar İran hökumətinə qarşı nəşr olunan karikaturalarına görə verildiyini öyrənib.

Bunu da xatırladaq ki, redaksiyamız məsələni dəqiqləşdirmək üçün hazırda Malaysiyada yaşayan karikaturaçının özü ilə də elektron poçt vasitəsi ilə əlaqə saxlayıb. Mana Neyistani mükafatın özünə keçən ilki hadisələrlə əlaqədar olaraq nəşr edilmiş karikaturalara görə verildiyini təstiq edib bunu mükafatı verən təşkilatdan soruşduğunu, məsələni dəqiqləşdirdiyini bildirib. Mana Neyistani Amerikanın səsinin Azərbaycan redaksiyasına telefonda müsahibə verməktən imtina edib. O belə bir müsahibənin İranda yeni etiraz dalğasına səbəb ola biləcəyindən ehtiyyatlandığını bildirib. İranlı karikaturaçı beş ildə beş ölkənin onun siyasi sığınacaq almaq barədə müraciətini rədd etdiyini yazaraq deyib ki, “qorxuram müsahibə yeni etirazlara səbəb olsun və Malaysiya məni İrana, Evin zindanına göndərsin.”

Mana Neyistani Niqahəng Kövsər-ə müsahibəsində qeyd edib ki, 2006-cı ildə nəşredilən karikaturalara görə həbsi ona örgədib ki, İran, təkcə Tehran deyil və gərək  İrandakı azlıqların hüquqları müdafiə olunsun. O deyib ki, “mükafatı azlıqlara ithaf edirəm.”

Qeyd edək ki, ingilis dilində bəzi mənbələr, o cümlədən Vikipedia, Mana Neyistaninin Azərbaycan əsilli olmasını yazırlar. Neyistani bunun düzgün olmadığını bildirib və bu barədə sualın cavabında yazıb:” Mən Azəri deyiləm. Mənim həbs olunduğum zamanda, tanımadığım adamlar, mənim kökümün Azəri olmasını yazıblar ki, Azərbaycandakı etirazların şiddəti azalsın.”