GünAzTv: İsrail və Türkiyə arasında yaşanan ziddiyyət getdikcə daha maraqlı məcrada cərəyan etməkdədir. Buna əsas səbəb ziddiyyətin daha geniş miqyasda özünü büruzə verməsidir. Belə ki İsrailin strateji müttəfiqi olan ABŞ məsələyə müdaxilə edərək Türkiyəni geri addım atmağa vadar etməyə çalışır.  GünAzTv mətbuat mərkəzinin “Bakı-xəbər”-ə istinadən yaydığı məlumata görə, İran da daxil olmaqla ərəb ölkələrinin böyük əksəriyyəti isə məsələ ilə bağlı Türkiyənin tərafında birləşir.    Belə bir vaxtda Londonda nəşr edilən ərəb "Əl-Hayat" qəzeti yazır ki ABŞ prezidenti Barak Obama Türkiyənin baş naziri Rəcəb Tayyib Ərdoğana son dəfə xəbərdarlıq edib.    Qəzetin yazdığına görə "Böyük səkkizliy"in Torontoda keçirilən sammitində Obama Ərdoğandan "İsraildən əl çəkməsini" tələb edib. Məlumata görə Obama bildirib ki Ankaranın Qəzzaya gedən humanitar yardım gəmisinə hücumla bağlı beynəlxalq komissiyanın yaradılması tələbləri Türkiyənin özü üçün arzuolunmaz nəticələr verə bilər: "Obama bildirib ki tədqiqat gəmidəki türk sərnişinlərə qarşı cinayət işinin açılması ilə nəticələnə bilər".    Mövqeyini daha da sərtləşdirən Ankara isə bildirir ki İsrail ya türk yardım fəallarının öldürülməsilə bağlı beynəlxalq araşdırmanın nəticələrini qəbul etməli ya da may ayında baş verən hadisəyə görə açıq üzr istəməlidir. Xarici işlər naziri Əhməd Davudoğlu bu şərtlərə əməl olunmadığı təqdirdə Təl-Əvivi əlaqələrin kəsiləcəyilə hədələyib: "İsrailin qarşısında üç yol var: ya üzr istəyəcək ya gəmiyə hücumun araşdırılması üçün beynəlxalq komissiyanın yaradılmasına razılaşacaq ya da əlaqələr kəsiləcək". Ə.Davudoğlu ötən həftə İsrailin sənaye və infrastruktur naziri Benyamin Ben-Eliezer vasitəsilə göndərdiyi mesajların İsrail hökumətinə çatdırıldığını söyləyib: "Cavab üçün tarix müəyyənləşdirmədik. Amma sonsuza qədər gözləməyəcəyik.    İsrailin basqınından bir həftə sonra hava məkanımız İsrail hərbi aviasiyası üçün tam qapadılıb. Hava məkanının mülki aviasiya üçün də bağlanması ilə bağlı hələlik qərar yoxdur. Amma hadisələrin inkişafına görə bu da nəzərdən keçirilə bilər. Müvafiq addım atmasalar İsrailin təklənməsi prosesi davam edəcək. Biz tam haqlıyıq".    Təl-Əviv isə bildirir ki üzr istəməyə heç bir əsas görmür. İsrail Xarici İşlər Nazirliyinin sözçüsü İqal Palmor qeyd edir: "Üzr istənilməsi tələbilə çıxış edəndə təhdid və ultimatuma əl atmırlar".Xatırladaq ki bir neçə gün əvvəl Brüsseldə Türkiyənin xarici işlər naziri Əhməd Davudoğlu ilə İsrailin ticarət naziri Binyamin Ben-Eliezer arasında gizli görüş keçirilib. Gizli görüş təkcə İsraildə narazılıqla qarşılanmayıb. Türkiyədə də müxalifət cəbhəsi gizli görüşə sərt reaksiya göstərib. Müxalifət meydanlarda İsraillə bağlı sərt fikirlər səsləndirən səfiri geri çəkən İsrail üzr istəmədiyi təqdirdə münasibətlərin yaxşılaşdırılması ilə bağlı heç bir addım atılmayacağını iddia edən iqtidardan İsrail heç bir addım atmamışkən bu ölkənin nazirilə görüş keçirilməsi barədə açıqlama tələb edib. Görüşlə bağlı Türkiyə parlamentində çıxış edən xarici işlər naziri Əhməd Davudoğlu danışıqların İsrailin istəyilə baş tutduğunu bəyan edib. O İsrailin sənaye və ticarət naziri Ben-Elizerlə görüşdə əsas məqsədin Türkiyənin tələblərini rəsmi Təl-Əvivə birbaşa çatdırmaqdan ibarət olduğunu deyib. Görüşün gizli keçirilməsilə bağlı səslənən tənqidlərə cavab olaraq Davudoğlu deyib ki bunu İsraildən soruşmaq lazımdır. O humanitar yardım gəmilərinə hucumla bağlı Türkiyənin mövqeyinin dəyişmədiyini deyib.Türkiyə rəsmiləri İsraililə münasibətləri yaxşılaşdırmaq üçün irəli sürdükləri dörd şərtin davam etdiyini açıqlayıb. Xatırladaq ki baş nazir Ərdoğanın bir neçə dəfə açıqladığı şərtlər belə idi: 1) İsrail üzr istəyəcək həyatını itirənlər üçün təzminat ödəyəcək    3) Beynəlxalq istintaqı qəbul edəcək 4) Qəzzaya embarqonu qaldıracaq.    hazırda isə Türkiyə-İsrail münasibətləri daha çox gərginliklərlə gündəmdə qalmağa davam edir. Görünən odur ki münasibətlərin tam pisləşməsi qaçılmaz olmaqdadır. İstisna olunmur ki bu məsələ ABŞ-İsrail müttəfiqliyilə Türkiyə başda olmaqla ərəb ölkələrinin münasibətini daha gərgin hala gətirəcək.