GünAzTv: Prezident İlham Əliyev İyulun 4-də Azərbaycanda rəsmi səfərdə olan ABŞ (Amerika Birləşmiş Ştatları) dövlət katibi Hillari Klintonu qəbul edib.

GünAzTv mətbuat mərkəzinin SİA-ya istinadən yaydığı məlumata görə, görüşdə ikitərəfli münasibətlər, Dağlıq Qarabağ münaqişəsi və digər məsələlər müzakirə olunub.

İyulun 4-də Azərbaycan Respublikasının Prezidenti İlham Əliyev və xanımı Mehriban Əliyeva, ölkəmizdə səfərdə olan ABŞ-ın dövlət katibi Hillari Klinton birgə nahar ediblər.

Dövlət katibinin Azərbaycan gəncləri ilə görüşündə isə Dağlıq Qarabağ münaqişəsi, blogerlərin həbsi,  demokratiya, insan hüquqları, söz və internetdə fikir azadlığı məsələlərinə toxunulub.

O Azərbaycanın gələcəyi ilə bağlı optimist olduğunu deyib.

Xarici qonaq Azərbaycanın suverenliyi və ərazi bütövlüyü uğrunda canından keçmiş insanların uyuduğu şəhidlər xiyabanını ziyarət edib.

“Cənubi Qafqaz regionunun tərəqqisi üçün Dağlıq Qarabağ münaqişəsi tezliklə öz həllini tapmalıdır. Hər iki xalq sülh və təhlükəsizlik şəraitində yaşamalıdır. Münaqişəsinin həlli regionun çiçəklənməsinə və sabitliyə xidmət edəcək”. bu sözləri ABŞ-ın dövlət katibi Hillari Klinton ölkəmizə rəsmi səfərinin yekunları ilə bağlı iyulun 4-də Azərbaycanın xarici işlər naziri Elmar Məmmədyarovla birgə keçirdiyi mətbuat konfransında deyib.

Ölkə rəsmiləri ilə aparıdığı danışıqların nəticələrindən razı qaldığını qeyd edən dövlət katibi Azərbaycanda kifayət qədər tərəqqinin əldə olunduğunu diqqətə çatdırıb.

ABŞ-ın Dağlıq Qarabağ münaiqşəsinin dinc yolla və dövlətlərin ərazi bütövlüyü prinsipi çərçivəsində həllinin tərəfdarı olduğunu bildirən Hillari Klinton deyib ki, Birləşmiş Ştatlar məsələni birbaşa həll edə bilməz, amma dəstək göstərə bilər.

ABŞ, Rusiya və Fransa prezidentlərinin Dağlıq Qarabağ münaqişəsinin nizamlanması ilə bağlı məlum bəyanatına toxunan dövlət katibi vurğulayıb ki, problemin həlli yolları tezliklə tapılmalıdır və bu məsələdə tərəqqi də vardır.

Azadlığa Dəstək Aktına 907-ci düzəlişin aradan qaldırılmasına gəlincə, Hillari Klinton qeyd edib ki, Prezident Barak Obama onun müvəqqəti aradan qaldırlması ilə məşğuldur. Amma tam aradan qaldırılması üçün də çalışacaqdır.

Dövlət katibi Azərbaycanın Əfqanıstan və İraqdakı əməliyyatlarda ABŞ-a yaxından dəstək göstərdiyini də vurğulayıb.

Hillari Klinton Azərbaycanda cari ilin noyabrında keçiriləcək parlament seçkilərinə toxunaraq deyib ki, ABŞ bu seçkiləri dəstəkləyir və əməkdaşlığa hazırdır.

Azərbaycan xalqının mehriban münasibətindən böyük məmnunluq duyduğunu vurğulayan dövlət katibi ölkəmizdə dinamik inkişafın şahidi olduğunu xüsusi qeyd edib. Bildirib ki, Azərbaycan ilə ABŞ arasında mədəniyyət, təhsil və ticarət sahələrində də əlaləqələr geniş inkişaf edir.

Xarici işlər naziri Elmar Məmmədyarov Azərbaycanın həyata keçirdiyi böyük layihələrə ABŞ-ın dəstək verdiyini xüsusi qeyd edib.

Nazir vurğulayıb ki, Ermənistan-Azərbaycan, Dağlıq Qarabağ münaqişəsi tam həll olunandan sonra Cənubi Qafqazın bütün ölkələri regional layihələrdə iştirak edə bilərlər.

Cəbhə xəttində baş vermiş son silahlı insident zamanı həlak olmuş Azərbaycan hərbçisinin meyitinin ermənilər tərəfindən verilməməsi ilə bağlı sualın cavabında bu məsələ ilə bağlı Ermənistandakı təmsilçisinə lazımi göstəriş verəcəyini qeyd edib.

Qeyd edək ki, H. Klinton Bakıdan sonra İrəvan və Tiflisə səfər edəcək.