GünAzTv: Mayın 31-də İsrailin Gəzzəyə yardım aparan Mavi Mərmərə gəmisinə basqını ilə növbəti dəfə gərginləşən Türkiyə-İsrail münasibətləri bu dəfə gizli görüş sürprizi ilə gündəmə gəldi. İyunun 30-da İsrail mətbuatının yaydığı məlumatlarda Brüsseldə Türkiyənin Xarici İşlər Naziri Əhməd Davutoğlu ilə İsrailin Ticarət Naziri Binyamin Ben-Eliezer arasında gizli görüş keçirildiyi bildirilirdi. Qeyd edək ki, Davudoğlu Brüsselə Avropa Birliyi ilə müzakirələrdə yeni bir sahənin açılması üçün getmişdi. Gizli görüşdən hətta Brüsseldə Davudoğlu ilə birlikdə olan digər iki nazirin, Brükseldə olan Kənd Təsərrüfatı Naziri Mehdi Əkərin və Egemen Bağışın xəbərdar olmadıqları da qeyd olunurdu. İsrail tərəfində isə Baş Nazir Benyamin Netanyahu və Müdafiə Naziri Ehud Barakın razılıq verdiyi görüş, radikal sağçı Xarici İşlər Naziri Aviqdor Liebermandan gizli saxlanılmışdı. İsrail mətbuatı görüşün Türk tərəfinin istəyi ilə baş tutduğunu və Liebermanın bu gizli görüşə sərt reaksiya göstərdiyini iddia etmişdi.

Görüş gizli keçirilsə də, qısa bir müddət sonra görüş barədə açıqlamalar verilmişdir. Məlumatlarda qeyd olunurdu ki, 2.5 saat davam edən görüşdə Türkiyə tərəfindən Davutoğlu ilə yanaşı, Xarici İşlər Nazirliyinin Aparat Rəhbəri Feridun Sinirlioğlu və Avropa Birliyindəki daimi nümayəndəsi Səlim Kuneralp da iştirak edib. Görüşdə ümumi müzakirələr aparılıb, münasibətlərin davam etdirilməsinin zərurəti qeyd olunub, Baş Nazirlərə məlumat verilməsi və görüşlərin davam etdirilməsi barədə razılıq əldə edilib.   Gizli görüş sadəcə İsraildə narazılıqla qarşılanmayıb. Türkiyədə də müxalifət cəbhəsi gizli görüşə sərt reaksiya göstərib. Müxalifət bildirir ki, meydanlarda İsraillə bağlı sərt fikirlər səsləndirən, səfiri geri çəkən, İsrail üzr istəmədiyi təqdirdə münasibətlərin yaxşılaşdırlması ilə bağlı heç bir addım atılmayacağını iddia edən iqtidarın, İsrail heç bir addım atmamışkən, bu ölkənin naziri ilə görüş keçirilməsi barədə açıqlama tələb edib. Davudoğlu bu barədə Türkiyə parlametində çıxış etmək məcburiyyətində qalıb. Türkiyə rəsmiləri İsrail ilə münasibətləri yaxşılaşdırmaq üçün irəli sürdükləri dörd şərtin davam etdiyini açıqlayıblar. Xatırladaq ki, Baş Nazir Ərdoğanın bir neçə dəfə açıqladığı şərtlər belə idi:1) İsrail üzr istəyəcək,2) Həyatını itirənlər üçün təzminat ödəyəcək,3) Beynəlxalq istintaqı qəbul edəcək,4) Qəzzəyə embarqonu qaldıracaq.  İyulun 2-də isə İsrailin Baş Naziri Netanyahu, İsrail ordusunun Mavi Mərmərə gəmisinə təşkil etdiyi qanlı basqınla əlaqədar İsrailin dövlət televiziyasına verdiyi müsahibədə iddia etmişdir ki, "İsrail üzr istəməyəcək, çünki əsgərlərimiz özlərini qorumaq məcburiyyətində idilər". Netanyahu, eyni səbəbə görə gəmiyə basqın zamanı zərər görənlərə hər hansı bir şəkildə təzminat ödənməsindən söhbət getməyəcəyini də bildirmişdir. O, eyni zamanda hadisəyə görə kədərləndiklərini də əlavə etmişdir. Netenyahu  Davutoğlu ilə Eliezer arasındakı görüş barədə fikir bildirərkən demişdir ki, "bu görüşün baş tutması çox əhəmiyyətli idi. Çünkü İsrail və Türkiyə üçün yaxşısı, əlaqələrin daha çox zərər görməsinin qarşısının alınmasıdır".

Beləliklə, Türkiyə-İsrail münasibətləri daha çox gərginliklərlə, bəzən də sürpriz müsbət addımlarla, amma hər iki halda qalmaqallarla gündəmdə qalmağa davam edir. Görünən odur ki, münasibətlərin tam pisləşməsində heç bir tərəf maraqlı deyil. Amma, Türkiyə İsraildən üzr istəmək də daxil olmaqla ciddi əvəz almaqla, İsrail isə mümkün qədər heç nə vermədən qarşılıqlı münasibətləri yaxşılaşdırmağa çalışır. Bu isə, yaxın perspektivdə ciddi yaxşılaşma ehtimallarını aşağı salır. Araztm