GünAzTv: Ata və oğul Corc Buşların Səddam Hüseyni məhv etməsini xatırlayırsınızmı? 1991-ci ildə Küveyti işğal edən, İraq xalqına faciə gətirən Səddam Hüseyn İraqın parçalanmasının əsasını qoydu. Həmin ildən 2003-cü ilədək İraqın şimalı və cənubu tam nəzarətsiz bölgəyə çevrildi, ölkənin parçalanması üçün əsaslar formalaşdırıldı və s. Axırda da ABŞ bir zamanlar hakimiyyətə gətirdiyi diktator Səddam Hüseyni devirib asdı. Xüsusi vurğulamaq istəyirəm ki, ata Corc Buş hakimiyyətdən gedəndən sonra demokrat Bill Klinton İraqa qarşı kifayət qədər sərt sanksiyalara əl atdı, İraqın xaricdən dəstəyini kəsmək üçün xeyli iş gördü. Demokratların "yumşaq" sanksiya siyasəti oğul Corc Buşun İraqa hərbi hücumuyla yekunlaşdı....İrana münasibətdə də eyni xətt izlənilir. Oğul Corc Buşun sərt mövqeyindən sonra demokrat Barak Obama İrana qarşı sanksiyalar siyasətini intensivləşdirir. Artıq BMT TŞ-də İrana qarşı kifayət qədər sərt sanksiya tətbiqi haqında qərar qəbul olunub. ABŞ İranın böyür-başında (Ərəb ölkələrində, İraqda, Əfqanıstanda, Pakistanda, dənizlərdə) hərbi iştirakını gücləndirir. Dünən isə ABŞ prezidenti Barak Obama İrana yeni sanksiyaların tətbiqi haqqında qanun layihəsini imzalayıb. Obama sənədi imzalayarkən deyib ki, bu tədbirlərin Tehranın nüvə proqramını maliyyələşdirməsinə əngəl yaradacağına inanır: "Bu sanksiyalar İranın ürəyinə zərbədir. Biz İrana göstəririk ki, getdikcə təzyiqlər artacaq, təcrid isə dərinləşəcək". Obama onu da vurğulayıb ki, ABŞ və İran arasında dialoq üçün qapılar əvvəlkitək açıqdır. Türkiyə-Braziliya-İran müqaviləsini rədd edən Vaşinqtonun İranla necə dialoq quracağı aydın deyil.Xatırladaq ki, İranın İnqilab Keşikçiləri Ordusunu ("Sepah") hədəf alan və bu ölkəyə qaz, benzin və digər emal məhsullarının idxalını qadağan edən qanun layihəsi ötən həftə Konqresin hər iki palatasından keçib. Vaşinqton Rusiyanın, Çinin, Avropa Birliyinin də maraqlarını demək olar ki, nəzərə almır. Yəni İraqdakı vəziyyət təkrarlanır.Hər gün Birləşmiş Ştatların qoşunlarının İran yaxınlığında cəmləşdiyi barədə xəbərlər yayılır. Siz deyirsiniz ki, bu qədər qoşun, silah-sursatdan tez-gec istifadə olunmayacaq? Olunacaq, olunacaq! Elə bilməyin ki, müharibə tərəfdarıyam. Ondan narahatam ki, hər dəfə İranda hər hansı müharibə olanda Güney Azərbaycanda, İranın müxtəlif bölgələrində milli torpaqlarımızda yaşayan soydaşlarımız qanına qəltan olur. İran-İraq müharibəsində həlak olan 1 milyon nəfərin yarıdan çoxu türk idi. Ancaq biz istəsək də, istəməsək də İranın fars-teokratik rejimi bu ölkəni qana, müharibəyə sürükləyir. Tehran bu hücumün qarşısı almaq iqtidarında deyil (Yeri gəlmişkən, deyilənlərə görə, 2003-cü ildə İraqa hücum olanda "Sepah"ın bütün rəhbərləri qaçıb gizlənibmiş). ABŞ ordusuna qarşı hər hansı zərbə, təxribat müharibə qığılcımına çevriləcək. Proseslər bizim arzumuzdan asılı olmayaraq, sürətlənir, daha geniş miqyas alır. Ona görə də həm ABŞ-ın İran hakimiyyətinə qarşı gündən-günə sərtləşən mövqeyini, həm də fars rejiminin daxilindəki parçalanmaları nəzərə almalıyıq. Açıq-aydın görünən odur ki, fars-teokratik rejimi Səddam Hüseynin düşdüyü girdabdan çıxa bilmir. 1979-cu ildə Qərbin bölgədə "xortdan dövlət" yaratmaq üçün hakimiyyətə gətirdiyi fars-teokrak rejimi xidmətini göstərib-qurtarıb. ABŞ vaxtı qurtaran xidmətçilərindən müxtəlif cür yararlanması haqda çoxlu faktlar var. Səddam Hüseyn, Üsama bin Ladenin taleləri gözünüzün qarşısındadır. Onların öz xalqına, dindaşlarına qan uddurması Qərbin maraqlarına uyğun idi. İndi də fars-teokratik-diktatura rejiminin zamanı yetişib. Ola bilsin ki, Birləşmiş Ştatların İrana hücumu bir az ləngiyərək demokrat Barak Obamadan sonrakı respublikaçı prezidentin hakimiyyəti illərinə düşsün. Bütün hallarda yuxarıda qeyd etdiyim kimi bu baş verəcək. ...Quzeyli-Güneyli Azərbaycan yaxınlaşan nəhəng proseslərə zamanında və hər cür variantı nəzərə almaqla hazırlaşmalıdır. Fars-teokratik rejiminin məhvi haqqında fərman verilib. Onu da unutmaq olmaz ki, XX əsr boyu, hər dəfə fars şovinizmi və manqurtizm türkü məhv etmək üçün Qərblə, rusla, erməniylə hər cür alçaq şərtlə əməkdaşlığa gedib...

Xalq cebhesi