GünAzTv: İslam İnqilab Keşikçiləri Qvardiyasına (Sepah) aid qüvvələr İranın şimal-qərb sərhədinə gətirilir. Qvardiyanın briqada generalı Mehdi Moini deyir: "ABŞ (Amerika Birləşmiş Ştatları) və İsrail silahlı qüvvələrinin Qərb sərhədlərimizdə mövcudluğu bizi məcbur etdi ki, bölgəyə əlavə hərbi güc çəkək". İranlı generalın sözlərinə görə, bunun başqa bir səbəbi Qərbi Azərbaycan əyalətində etnik qruplararası münaqişə ehtimalının artması və həmin bölgədə sabitliyin pozulmasına cəhdlər olacağıdır. Əlavə hərbi qüvvələrin bögəyə bu zərurətlərdən gətirildiyi deyilir ("PressTv").Belə görünür, Tehranın hakimiyyət eşelonlarında Qərb ölkələrinin dəstəyi ilə Amerika və İsrailin İrana zərbə endirmə ehtimalına ciddi yanaşırlar və önləyici əks-tədbirlər görməyi lazım bilirlər. Bu önləyici tədbirlər kontekstində İran rəsmiləri arabir təhdidli bəyanatlar səsləndirməyi də vacib bilirlər ki, özünü qorumaqdan ötrü İran beynəlxalq ictimaiyyətin rəyi ilə hesablaşan qonşulara zərbə endirə və ya ona ziyanlar vura bilər.Hərbi qüvvələri cəmləşdirdiyi bölgə inzibati mərkəzi Urmiya şəhəri olan Qərbi Azərbaycan vilayətidir. Bu vilayət İraq, Türkiyə, Azərbaycan Respublikası və Ermənistanla həmsərhəddir. Bu vilayətdə əhalinin böyük əksəriyyətini etnik türklər təşkil etsələr də, müəyyən bir hissəni etnik kürdlər təşkil edir. İran rəhbərliyi Türkiyə və Güney Azərbaycan torpaqları arasında etnik kordon yaratmaq məqsədilə bu bölgədə kürdlərin sayca artması prosesini dəstəkləmişdi. Odur ki, indi bura barıt çəlləyini xatırladır. Qvardiya generalı etnik qruplararası "münaqişə baş verməsindən" danışanda bölgədəki kürdlərlə yerli türklər arasında yarana biləcək qarşıdurmanı nəzərdə tutur.Tehran rəhbərliyi hesaba almamış deyil ki, kürdlərin Amerika ilə sıx əlaqələri qurulub və əgər İrana zərbə gündəmə gəlsə, kürdlər - İranın dünənki "dost"ları Amerikanın "vuran əl"inə çevriləcəklər. Bir vaxtlar Tehran kürd kartından Türkiyəyə və Azərbaycan türklüyünə qarşı istifadə edərdi. İndi bumeranq PJAK şəklində geri qayıdır. Kürd terror dəstələrinin Tehrana qarşı silahlı aksiyaları gündən-günə güclənməkdədir.Belə bir fikir var ki, bölgədə özünə arxa qazanmaq üçün İran rəhbərliyi Azərbaycan türklərinə üz tuta, onları kürdlərə qarşı qoya bilər. Fikir var ki, bu iş artıq planlaşdırılır. Amma Tehranın kürdlərlə nə cür davranmaq lazım gəldiyi barədə yekdil fikri yoxdur. Bəzi qüvvələr Tehranda kürdləri dəstəkləyir. Təkcə bir faktı xatırladaq ki, Azərbaycan torpaqlarına iddia ilə dolu "Kürdüstane-Mokrian" kitabı Tehranda çıxıb. Bundan başqa qonşu dövlətlərdən Qərbi Azərbaycan əyalətinə kürdlərin gətirilərək, yerləşdirilməsi də Tehrandakı həmin qüvvələrin ideyası və əməlidir. Onlar öz əlləri ilə öz başlarına iş açıblar və indi Tehran bunun acı meyvələrini hər an dada bilər.İran rəhbərliyinin xeyir-duası və yardımı ilə Azərbaycanın Urmiya, Salmas, Xoy, Nəğədə (əsl adı - Sulduz) və başqa şəhərlərində kürdlər yerləşdiriləndə Azərbaycan türklərinin fikrinə məhəl qoyulmadı. Amma hadisələrin inkişafı onu göstərir ki, gec partlayan bomba hazır vəziyyətdədir. Generalın bəyanatı da bu acı gerçəyin yaxınlaşdığına işarədir.İranın hələ dünənə kimi "əmioğlu" adlandırdığı Ermənistanla sərhədə də hərbi qüvvə yerləşdirəcəyi xəbəri İrəvanda çaşqınlıqla qarşılanıb. Ermənilər deyəsən bərk təşvişə düşüblər. Orada belə fikirlər səsləndirilib ki, qoy Rusiya Ermənistanın İranla sərhədində hərbi baza yerləşdirsin. Onlar bu fikirdədirlər ki, ABŞ-la İran arasında ziddiyyətlərin kəskinləşməsi Ermənistan üçün təhlükədir. S.Sədrəddin