GünAzTv: İyunun 9-da BMT Təhlükəsizlik Şurasının Tehrana qoyduğu sanksiyalara qoşulan ölkələrin sıraları gündən günə genişlənməkdədir. Kanadanın xarici işlər naziri Lorens Kennon jurnalistlərə açıqlamasında İrana qarşı sanksiyaları gücləndirməyə hazır olduqlarını bildirib. O, BMT Təhlükəsizlik Şurasının Tehrana iyunun 9-da qoyduğu sanksiyalara toxunub."Biz BMT Təhlükəsizlik Şurasının sanksiyalarına əməl etməklə yanaşı, özümüz də İranın nüvə proqramına yardım edən şirkətlərə, eləcə də "Sepah"a qarşı sanksiyaları gücləndirməyə hazırıq. İran nüvə probleminin həlli uğrunda aparılan beynəlxalq səylərə müsbət reaksiya vermir və dünyada sülhü təhlükə altına alır". Bu arada Birləşmiş Ərəb Əmirliyi "Sepah"a bağlı olduğu iddia edilən İrana məxsus 40 şirkətin dəftərxanasını bağlayıb. Həmin şirkətlər qvardiya ilə əlaqədar olmaqla yanaşı, ikili təyinatlı texnologiyanın İrana çatdırılması istiqamətində fəaliyyət göstərib. BƏƏ rəsmisi bildirib ki, ölkəsi BMT Təhlükəsizlik Şurasının qərarına əməl edir və qurumun qəbul etdiyi sanksiyada qvardiya ilə iş birliyində olan istənilən şəxs, yaxud BƏƏ-də fəaliyyətdən məhrum olacaq. "The Los Angeles Times"in yazdığına əsasən, bağlanan şirkətlər arasında neftçıxarma firmaları da var. Yaxın Şərq və körfəz üzrə Hərbi Araşdırma İnstitutunun təmsilçisi Teodor Karasik isə bildirib ki, adları sanksiyada göstərilməyən, fəaliyyətindən şübhələnən İran şirkətlərinin hamısı BƏƏ-nin təhlükəsizlik qüvvələri tərəfindən sorğu-sual edilir. Xatırladaq ki, apreldə Dubay əmirliyi İranla ticarət əlaqələrini məhdudlaşdırdığı barədə bəyanat vermişdi. Çünki BMT TŞ-də qəbul edilmiş sanksiyada "qara siyahı"ya düşmüş "ikili təyinatlı məhsullar" (başqa sözlə, həm də İranın atom-nüvə proqramında istifadə olunan) İrana bu əyalətin bazarından ötürülürdü. 2009-cu ildə İranla Dubay əmirliyi arasında 12 milyard dollardan artıq ticarət dövriyyəsi olub. Məlumatlara əsasən, Avropada istehsal olunan bütün məhsullar demək olar bu bazardan İrana ötürülür. Xəbərlərə əsasən, əmirlikdə İran vətəndaşlarının 8 min şirkəti və sahibkar fəaliyyət göstərir. Bunu əmirlik əhalisinin önəmli bir hissəsinin İran mənşəli olduğuyla da əlaqələndirirlər. BƏƏ-nin başqa bir əyaləti Əbu-Dabidən də İrana Qərb istehsalı olan mallar ötürülürdü, amma beynəlxalq yasaq bu yolun bağlanmasıyla nəticələndi. Ərəb təhlilçiləri hesab edir ki, Dubay qonşu əmirlikdən nümunə götürərək, İranla ticarət əlaqələrini azaltmaq məcburiyyətində qalacaq. ABŞ Nümayəndələr Palatası və Senat isə Tehran hökumətinin energetika sənayesini pozmaq və "Sepah"ın maliyyə köçürmələrini önləmək məqsədilə iqtisadi sanksiyalar barədə razılığa gəliblər. Senatın bank işləri komitəsinin sədri Kris Dodd və Nümayəndələr Palatasının Xarici Əlaqələr Komitəsinin sədri Hovard Berman arasında əldə olunmuş razılaşmanın səsvermədən maneəsiz keçəcəyi gözlənilir. Bu arada İranın müdafiə naziri Əhməd Vahidi bildirib ki, Rusiyanın onun ölkəsini zenit-raket sistemləri hesab olunan C-300-lə təmin etməsi nə Rusiya qanunvericiliyinə, nə də beynəlxalq hüquqa zidd deyil. Bununla belə Rusiya bu prosesi dayandırıb. Nazir deyib ki, Rusiya üzərinə götürdüyü öhdəliyi pozduğuna görə məsuliyyət daşıyır: "Görünən odur ki, Rusiya öz öhdəliyini yerinə yetirməkdən imtina edir edir. Bu isə o deməkdir ki, Rusiyanın məsuliyyət hissi tükənib". xalqcebhesi