GünAzTv: Keçmiş BMT diplomatından şok açıqlama: “Hücum Gürcüstandan başlayacaq, koordinatlar Bakıdan veriləcək”.

İsrailin İrana Gürcüstan və Azərbaycan üzərindən hücum etmək planı var. Bu sensasion iddia keçmiş BMT diplomatı, Amerika hərbi dəniz qüvvələrinin tərkibində Vyetnam müharibəsində iştirak edən, bir sıra aparıcı telekanallarda hərbi-siyasi mövzularda şərhlər verən Qordon Daff tərəfindən irəli sürülüb.

Bir sıra Yaxın Şərq və Afrika ölkələrinin hökumətlərinə müşavirlik edən, Əfqanıstan və Pakistan üzrə inkişaf proqramlarının koordinatoru olan Daffın “Veterans Today Network” saytında yer alan məqaləsində deyilir ki, ötən həftə İsrailin İrana zərbələri endirmək üçün Səudiyyə Ərəbistanın hava sahəsindən istifadəyə dair razılıq aldığı haqda məlumat mətbuata ötürülüb. Səudiyyə mənbələri İsrail tərəfindən ötürülən bu məlumatı dərhal təkzib edib: “Bu informasiyanın ötürülməsi əslində İsrailin İrana Gürcüstan üzərindən hücum etməyi nəzərdə tutan real planlarını gizlətmək üçün tələdir. Lakin Türkiyə ilə İsrail arasında münasibətlərin korlanması bu planı təhlükədə qoyur”.Ekspert bildirir ki, münasibətlər korlanmazdan əvvəl İsrail hərbi-hava qüvvələrinin təyyarələri Türkiyə üzərində təlim uçuşları keçirirdi. Bu təlimlər zamanı təyyarələrə havada yanacaq vurulması da sınaqdan keçirilib. Lakin Türkiyənin xəbəri olmayıb ki, həmin təlimlərə cəlb olunan İsrail təyyarələri geriyə yox, Gürcüstana uçub. Bununla da İrana Gürcüstan ərazisindən zərbələr endirmək üçün bütün texniki hazırlıqlar tamamlanıb. Q.Daff bildirir ki, Gürcüstandan qalxacaq İsrail təyyarələrinə İrandakı hədəfləri vurmaq üçün koordinatlar Azərbaycanda qurulmuş kəşfiyyat mərkəzlərindən ötürülməlidir. Belə ki, İsrail ikitərəfli hərbi əməkdaşlıq müqavilələri çərçivəsində texniki personal, təlimatçılar və müşavirlər adı altında Azərbaycanda öz kəşfiyyatçılarını yerləşdirib. Müəllifin yazdığına görə, əməliyyatda istifadə olunacaq döyüş sursatlarını Gürcüstana əsasən ABŞ tərəfindən göndərilir, sursat və bombalar Poti limanına yan alan yük gəmilərində daşınır. İsrail tərəfindən hazırlanan Gürcüstan sahil mühafizə xidməti isə bu əməliyyata nəzarət edir. Həmçinin ABŞ hərbi gəmiləri müntəzəm olaraq Poti limanına baş çəkir. Bütün bunlar İranı vurmaq üçün hazırlanan məxfi əməliyyatların tərkib hissəsidir.Q.Daff hesab edir ki, Azərbaycan, Gürcüstan və Qazaxıstandan istifadə etmədən İsrailin İrana hücumu qeyri-mümkündür. Çünki İsraildən İrana qədər olan 2500 kilometrlik hava məsafəsini qət etməklə zərbələr endirmək və bu yaxınlarda Fars körfəzində yerləşdirilən sualtı qayıqlardan istifadə etmək istənilən nəticəni verməz. Eyni zamanda ekspert qeyd edir ki, Türkiyə ilə münasibətlərin korlanması İsrailin məxfi planını pozub.Qeyd edək ki, İrana qarşı ABŞ və ya İsrailin hazırladığı hücum planlarına dair xarici mətbuatda yayılan xəbərlərdə Azərbaycanın adı dəfələrlə çəkilib. Vaxtilə Corc Buş administrasiyası dövründə Pentaqonda hazırlanan plana əsasən İrana zərbələr endirmək üçün Azərbaycan ərazisindəki hərbi aerodromlardan istifadə də nəzərdən keçirilirdi. Yaxud belə məlumatlar yayılıb ki, Azərbaycan ərazisində qurulan İsrail və ABŞ kəşfiyyat mərkəzləri İran ərazisində kəşfiyyat aparır. Bu yaxınlarda isə ABŞ-ın Mərkəz Komandanlığının Azərbaycan da daxil olmaqla bir sıra xarici ölkələrdə məxfi əməliyyat mərkəzləri yaratmaq barədə qərarı mətbuata məlum olub. Bir sözlə, kifayət qədər mürəkkəb regionda yerləşən Azərbaycan dünyanın supergüclərinin maraqlarının toqquşduğu yer olmaqla bərabər İrana qarşı mümkün hücumlar və Əfqanıstanda aparılan əməliyyatlar üçün də kritik nöqtəyə çevrilib. Baxmayaraq ki, rəsmi Bakı İranla münasibətlərdə maksimum ehtiyatlı olmağa çalışır və bu ölkəyə qarşı fəaliyyətlərdə açıq şəkildə yer almır. Musavat