GünAzTv: Rəsmi Moskva ümidli danışsa da, münaqişə tərəflərinin bəyanatlarında hələ də ehtiyatlılıq hiss edilməkdədir.

Azərbaycan və Ermənistan prezidentləri İlham Əliyev və Serj Sarkisyan rusiyalı həmkarları Dmitri Medvedyevlə görüşdə Dağlıq Qarabağ probleminin həllinə dair Madrid prinsipləri ilə bağlı dialoqun davamına hazır olduqlarını bildiriblər" . Bu fikirləri Rusiya dövlət başçısının mətbuat katibi Natalya Timakova səsləndirib. RİA "Novosti"nin məlumatına görə, Timakova mətndə əsas prinsiplərin həllində mübahisəli olan məsələlərlə bağlı tərəflərin mövqeyində yaxınlaşmanın olduğunu söyləyib. Onun sözlərinə görə, Azərbaycan və Ermənistan prezidentləri bu sənədin Rusiya, ABŞ, Fransanın ATƏT-in Minsk Qrupu səviyyəsində iştirakı ilə yekunlaşması istiqamətində dialoqun davamına hazır olduqlarını təsdiqləyiblər.Dünən prezidhent İlham Əliyev Sankt-Peterburqda onun üçün ayrılmış iqamətgahda ATƏT-in Minsk qrupunun həmsədrləri Robert Bratke, Bernar Fasye, İqor Popov və ATƏT-in hazırkı sədrinin xüsusi nümayəndəsi Anjey Kasprşiki qəbul edib. Görüşdə Ermənistan - Azərbaycan, Dağlıq Qarabağ münaqişəsinin nizama salınması ilə bağlı aparılan danışıqların hazırkı vəziyyəti və perspektivləri ətrafında fikir mübadiləsi aparılıb. Qeyd edək ki, İlham Əliyevin Rusiyaya işgüzar səfəri başa çatıb.Artıq görüşlə bağlı Azərbaycan və Ermənistan tərəflərinin də mövqeləri açıqlanıb. "Sankt-Peterburqda prezidentlər arasında intensiv danışıqlar həyata keçirilib, tərəflər məsələ ətrafında fikir mübadiləsi aparıblar" - Xarici İşlər Nazirliyinin mətbuat katibi Elxan Poluxov məsələyə münasibət bildirərkən belə deyib. Onun sözlərinə görə, Rusiya rəhbərinin iştirakı ilə prezidentlər səviyyəsində keçirilən belə görüşlər hər zaman çox vacib önəm daşıyıb: "Hesab edirik ki, belə görüşlər Ermənistan-Azərbaycan, Dağlıq Qarabağ münaqişəsinin həllində müxtəlif mövqelərin yaxınlaşdırılmasına həmişə imkanlar yaradır və bu imkanlardan istifadə edilməlidir". Onun sözlərinə görə, Azərbaycanın mövqeyi ondan ibarətdir ki, bu gün danışıq masasında yeniləşmiş Madrid təklifləri adlandırılan sənəd var və bu sənəd danışıqlarda növbəti mərhələyə keçməyə imkanlar yaradır: "Bu sənədin hazırlanmasında hər üç ölkənin həmsədrləri iştirak edib. Həmin sənəd ətrafında iş aparılmalıdır". E. Poluxov hesab edir ki, bu mərhələdə artıq görüşlərin sayından deyil, aparılan danışıqların mahiyyətindən və səmimiliyindən danışılmalıdır: "Ermənistan tərəfi bunu anlamalıdır". Ermənistanın xarici işlər naziri Edvard Nalbandyan da Rusiya, Azərbaycan və Ermənistan prezidentlərinin Sankt-Peterburqda keçirdikləri üçtərəfli görüş barədə danışıb. "Nevs.am" xəbər verir ki, jurnalistlərə açıqlama verən nazir danışıqların İlham Əliyevlə Serj Sarkisyan arasında Rusiyanın dövlət başçısı Dmitri Medvedevin təşəbbüsü ilə keçirilən 6-cı görüş olduğunu xatırladıb. "Bu, indiyədək 3 prezident arasında keçirilmiş görüşlərin davamı olub. ATƏT-in Minsk qrupunun digər həmsədrləri - ABŞ-la Fransa da bu görüşü və Rusiyanın vasitəçiliyini dəstəkləyir", - deyə E.Nalbandyan qeyd edib. Dünən baş tutan görüşün nəticələri haqda danışan erməni nazir son zamanlar Azərbaycanla Ermənistan arasında dialoqun Rusiyanın xarici işlər nazirinin təşəbbüsü ilə XİN başçıları arasında davam etdiyini də xatırladıb: "Bu görüşdə indiyədək aparılmış danışıqlarda əldə olunmuş nəticələr qeyd edilib. Tərəflər eyni əsaslarla müzakirənin davam etdirilməsi haqda qərar qəbul ediblər. Prezidentlər xarici işlər nazirlərinə təmasların davam etdirilməsini tapşırıblar". E.Nalbandyan bildirib ki, iyulun əvvəllərində isə vasitəçilərin regiona növbəti səfəri nəzərdə tutulub: "Proses davam edir. Sankt-Peterburq görüşünün kifayət qədər konstruktiv və səmərəli olduğunu söyləmək mümkündür. O, Dağlıq Qarabağ münaqişəsinin həlli prosesində vacib məqam oldu".Dağlıq Qarabağ münaqişəsinin həlli prosesində "yeni növ inkişaf" gözlənilir. "Armenia Today"in verdiyi məlumata görə, bu fikri Ermənistanın Sosial-Ekoloji Partiyasının lideri Armen Dövlətyan səsləndirib. Rusiya, Azərbaycan və Ermənistan prezidentləri arasında dünən Sankt-Peterburqda keçirilmiş üçtərəfli görüş haqda fikirlərini bölüşən partiya sədri hesab edir ki, danışıqlardan sonra verilən açıqlamalar görüşün Yerevan üçün yaxşı keçmədiyini göstərir. Dövlətyan prezidentlərin görüşü, Azərbaycanın hərbi doktrinasının qəbulu və Qarabağa Rusiya hərbçilərinin yerləşdirilməsi məsələlərinin "eyni zəncirin bəndləri" olduğunu düşünür: "Bu bəndlər Qarabağ münaqişəsinin həllində yeni inkişaf mərhələsidir". Rusiyanın Aralıq və Qara Dəniz hövzələrinin problemlərinin araşdırılması mərkəzinin rəhbəri, ekspert Alla Yazıkova isə "Nezavisimaya Qazeta"da dərc olunan məqaləsində Dağlıq qarabağ münaqişəsinin həlli ilə bağlı son iki ildəki fəallığın cənub enerji dəhlizi ilə bağlı olduğunu açıqlayıb. Onun sözlərinə görə, 2008-ci ilin avqust hadisələrindən sonra cənub dəhlizində enerji daşıyıcıları üçün yeni yollar axtarılıb. Bu marşurut Ermənistandan keçir. Lakin bunun reallaşması üçün Dağlıq qarabağ münaqişəsi həllini tapmalıdır. Bölgədə baş verən son prosesləri analiz edən mütəxəssisin qənaətincə Qarabağ münaqişəsi ətrafında gərginləşən vəziyyətdən yeganə çıxış yolu dünyanın aparıcı güycləri və regional qüvvələr tərəfindən dəstəklənən münaqişə tərəfləri arasındakı birbaşa danışıqlardır: "Bunun nə zaman baş verəcəyi məlum deyil. Lakin o da məlumdur ki, bu variant alternativsizdir". qaynar