GünAzTv: Azərbaycan parlamentinin ölkənin hərbi doktrinasını qəbul etməsi artıq xaricdə müzakirə mövzusuna çevrilib. Bununla bağlı bir sıra ölkələrdə müzakirələr gedir və Azərbaycanın bu sənəddə təcavüzkar dövlət kimi tanıdığı Ermənistana qarşı müharibəyə başlaya biləcəyi ehtimalı ətrafında fikirlər səslənir.

Heritage Fondunun enerji təhlükəsizliyi məsələləri üzrə eksperti Ariel Koen də son müsahibəsində təcavüzə məruz qalmış Azərbaycanın haqlı mövqeyini müdafiə edib. A.Koen deyib ki, 1988-94-cü illərdəki hərbi əməliyyatlar zamanı Azərbaycan ərazilərinin işğal olunması Bakıya öz torpaqlarını güc yolu ilə azad etmək hüququ verir. Azərbaycanın müharibəyə başlamaq ehtimalını real sayan Kouenin belə bir mövqedən çıxış etməsinin ciddi əsaslarının olduğu deyilir. Bir neçə gün əvvəl ölkə mediasına müsahibəsində dövlət başçısı İlham Əliyev də erməni həmkarının düşünmək üçün iki həftə vaxt istədiyi halda, 6 aydır konkret cavab verməkdən yayındığını və növbəti görüş barədə məlumatsız olduğunu bildirdi. Ermənistanın yenilənmiş Madrid prinsiplərinə münasibət bildirməməsi danışıqların sonrakı taleyini sual altına alır. Politoloq Rasim Musabəyov xatırlatdı ki, hər dövlət kimi Azərbaycanın da özünü müdafiə hüququ var: “Bu, ayrı məsələdir ki, sülh danışıqları getdiyi bir şəraitdə o hüquqdan istifadə etmək nə qədər əlverişli nəticələr verə bilər. Ancaq Azərbaycan bu hüququ özündə saxlayır. Olmasaydı xarici qüvvələr təkid etməzdilər ki, Azərbaycan güc tətbiq etməməklə bağlı Ermənistanla saziş bağlasın”. Ekspert hansısa xarici qüvvələrin Azərbaycanı bu hüquqdan məhrum etməsini mümkün saymır: “Torpağı işğal edilən dövlət müdafiə hüququqnu özündə saxlayır. Əks təqdirdə onda heç dövlətin ordu saxlamasına da ehtiyac olmazdı”. Ancaq R.Musabəyov düşünmür ki, artıq danışıqların üstündən xətt çəkilib: “Hələ ki səylər davam edir. Söhbət ondan gedir ki, indi bu səylər Ermənistan və Minsk Qrupunun həmsədrlərindən daha yüksək səviyyədə göstərilir. Söhbət Rusiya prezidenti, xarici işlər naziri, ABŞ dövlət katibi, Fransa xarici işlər naziri səviyyəsində səylərdən gedir. Belə olan halda tələsik hərbi əməliyyatlara qərar verilməsi gözlənilmir”. R.Musabəyov ortada İran amilinin də olduğunu vurğuladı: “Əgər böyük güclər desə ki, gedin Ermənistanın maraqlarını təmin edin, o zaman bizim başqa çıxış yolumuz qalmayacaq. Ancaq hələlik səylərin göstərildiyi və erməniləri ağıla gətirmək niyyətinin olduğu görünür”. Maraqlıdır, İran ətrafında çevrənin daralması Ermənistanın vəziyyətini ağırlaşdıracaqmı? R.Musabəyov: “Bir tərəfdən Ermənistanın vəziyyəti ağırlaşır. Ancaq digər tərəfdən əgər nəzərə alınsa ki, İranın maliyyə əməliyyatlarını həyata keçirmək üçün banklarına sanksiyalar tətbiq olunur, istisna etmirəm ki, ermənilər indi bundan əlavə qazanc axtarışında olacaqlar”. O da istisna olunmur ki, ABŞ ən azı İran ətrafındakı prosesləri yekunlaşdırmadan Azərbaycana torpaqlarını azad etmək üçün hərbi yola əl atmaq imkanı verməyəcək.