GünAzTv: Ankaranın Avropa Birliyinə  qarşı Şərq birliyi  yaratmaq yönündə  real addımları Avropa liderlərini təşvişə  salıb.

Bazar ertəsi İtaliya və Almaniya Türkiyənin Avropa Birliyinə  üzvlüyü məsələsini müzakirəyə çıxaracaq.

Rəsmi Ankaranın Qərbdən Şərqə meyllənməsi barədə dünya mətbuatında yer alan müzakirələr baş nazir Rəcəb Tayyib Ərdoğanın son açıqlamalarından sonra daha da şiddətlənib. Türkiyə eyni gündə həm Avropa Birliyinə (AB) qarşı sərt çıxış etdi, həm də «Tariximizdə istinadı var» deyərək Şərqlə birlik əldə etmək məqsədilə konkret addım atdı: 3 ölkə ilə sərbəst keçid və ticarət dövriyyəsinə məhdudiyyətlər aradan qaldırıldı. «Türkiyə Şərqə sürüşürmü?» sualı ətrafında şərhlər daha da çoxalıb. Həm Brüssel, həm də Vaşinqton Türkiyənin siyasi yönümlərinin narahatlığını yaşayır. Amma bir tərəfdən də səhvi özlərində görürlər.«CNN» kanalının  analitik materialı da məhz bu mövzuya  həsr edilib. Şərhdə bildirilir: «Xarici işlər naziri Əhməd Davudoğlu Türk-Ərəb Əməkdaşlıq Forumunda Türkiyə, Suriya, İordaniya və Livanla gediş-gəliş və ticarət dövriyyəsi önündəki bütün maneələrin qaldırıldığını açıqlayıb. Uzun müddəti hədəfə alan bu addım Afrikayadək uzanan bir bölgəni vahid məkana çevirməyi nəzərdə tutur.Bütün bunlardan  sonra dünya mətbuatı və siyasətçiləri İrana qarşı sanksiyalara «yox» deyən, qısa müddət ərzində Suriya, Liviya, İordaniya, Livan və Pakistanla viza rejimini aradan qaldıran Türkiyənin siyasətində sürüşmələrin olduğunu iddia edən fikirləri qızğın şəkildə müzakirə etməkdədirlər.Ankaranın Brüsseli danlaması müzakirələri daha da alovlandırıb. Şərqlə sərhədləri qaldıran addımla eyni gündə baş nazir Rəcəb Tayyib Ərdoğan ilk müraciətindən 50 il sonra Türkiyə ilə müzakirələri başladan Avropa Birliyinə bəlkə də ən sərt mesajını verdi: «Gizli gündəliklərinin fərqindəyik. AB isə bir sınaq altında olduğunun fərqində deyil».Qərb isə bir tərəfdən Türkiyənin siyasi yönümündə yer alan dəyişmələrdən ciddi şəkildə narahatdır, digər tərəfdən də qəbahəti özündə görür. Bunun ilk əlaməti ABŞ müdafiə naziri Robert Qeytsdən gəldi: «Türkiyə Şərqə sürüşürsə, özünə istədiyi üzvi bağı verməkdən imtina edən Avropa tərəfindən itələndiyi üçün sürüşür. Türkiyədə niyə bunlar olur, Qərb ilə daha güclü bağları Türkiyə liderləri üçün necə daha qiymətli edə bilərik - oturub bunu düşünməyimiz lazımdır».Növbəti narahatlıq siqnalı Türkiyənin AB-yə üzvlüyü prosesinə ən böyük dəstəyi verən İtaliyadan gəldi. İtaliya xarici işlər naziri Franko Frattininin də fikri Qeytslə paralellik təşkil edir. Almaniyanın «Frankfurter Allgemeine Zeitung» qəzetinə müsahibə verən İtaliya naziri Türkiyəni sıralarına buraxmayan AB haqqında sərt fikirlər səsləndirib: «Brüssel başını əllərinin arasına alıb düşünsün. Ləngimədən Avropa Türkiyəyə qarşı hansı səhvləri etdiyini düşünməlidir. Biz avropalılar türkləri yanımıza çəkmək əvəzinə daha çox Şərqə itələdik. Türkləri Avropa ailəsi içində istəmədiyimiz təəssüratını yaratdığımızdan, onlar da İran, Qafqaz və Suriya kimi bölgələrə yönələrək fərqli perspektivlər axtarırlar. Bu, Avropanın xeyrinə deyil. Birliyin bir üzvü maneə törətdiyi üçün ərzaq təhlükəsizliyi kimi sadə bir mövzuda belə danışa bilmədik. Bunun nəticələrinə hamımız birlikdə dözmək məcburiyyətindəyik.Bir neçə həftədən sonra Türkiyə ilə yeni bir müzakirə açılmadan daha bir AB dövr başçılığı sona çatacaq. İtaliya və Almaniya bazar ertəsi Lüksemburqda keçiriləcək yığıncaqda Türkiyə mövzusunu gündəmə gətirəcək».Mövzu ilə bağlı dünya mətbuatından bəzi çıxarışları təqdim edirik:«Əl-Cəzirə» telekanalı öz şərhini «Ərdoğan: Hə Deməyən Adam» başlığı altında yayıb: «Ərdoğan ərəb və İslam dünyasında ən parlaq günlərini yaşayır. Güclü sözlərini güclü hərəkətlərlə dəstəkləyir. Bunun ən əhəmiyyətli səbəbi İsrailə «yox» deməsidir. Bu, İsrailin qurulmasından bu yana işə yarayan ən sehrli düsturdur».«Əl-Ərəbiyə» kanalı da bu mövzunu baş xəbər şəklində təqdim edib: «Ərdoğanın səhnəyə ərəb dünyasının alqışları altında çıxması Türkiyənin beynəlxalq arenada yüksəlişinin əks olunmasıdır».«Financial  Times» qəzeti mövzunu qlobal balansın dəyişməsi kimi şərh edib: «Türkiyənin üzünü Şərqə çevirməsi, ideologiyadan çox strateji və iqtisadi problemlərlə bağlıdır. Bu nə Qərb əleyhdarlığı, nə də yeni Osmanlıçılıqdır. Gördüyümüz yalnız Türkiyənin regional bir güc olaraq yenidən ortaya çıxmasıdır».«La Republica» qəzeti Türkiyənin siyasətində dəyişmənin bünövrəsinin çoxdan qoyulduğunu hesab edir: «Ankara Vaşinqtonun təhdidlərinə qarşı İrana qanuni bir maraq səbəbindən kömək edir. İranla qarşılıqlı ticarətin miqdarı 10 milyard dollardır. Sanksiyal qarşısında bu rəqəm uçub gedə bilər. Ancaq bu cəhdlə Türkiyə regional bir müstəqil güc olaraq da ortaya çıxdı».  Bizim yol