GünAzTv: İsraildəki ermənilər Təl-Əvivlə Ankara arasında yaranmış son gərginlikdən istifadə edərək Knesset tərəfindən qondarma erməni soyqırımının tanınması istiqamətində fəaliyyətlərini genişləndiriblər. bu barədə “Qaynar.info” erməni mətbuatına istinadən xəbər yayıb.

Erməni Milli Komitəsinin İsraildəki nümayəndəsi Jorjet Avaqyan vurğulayıb ki, Təl-Əviv qondarma erməni soyqırımı məsələsindən zaman-zaman Türkiyəni qorxutmaq üçün dəyənək kimi istifadə edir: "İsrail hər dəfə Türkiyəyə qarşı təzyiq göstərmək istəyərkən "erməni kartı"ndan yararlanmağa çalışır. Bu artıq 10 illiklərdir ki, davam edir. Bu dəfə də gərginlik aradan qalxan kimi ermənilərin bu faciəsi unudulacaq. Siyasətçilər bildirəcəklər nə üçün Türkiyə ilə münaqişəyə girsinlər? Soyqırım məsələsi yenə də növbəti münaqişəyə qədər arxivə atılacaq".Avaqyan bildirib ki, 1982-ci ildə İsraildə soyqırım məsələləri müzakirə edilərkən qondarma erməni soyqırımının tanınması da gündəmə gəldi. Lakin həmin vaxt Türkiyə İsrailin xarici işlər naziri İshaq Şamirə təzyiq göstərərək bu danışıqlara son qoydu.1989-cu ildə də İsrail televiziyası 1915-ci il olayları ilə bağlı film nümayiş etdirmək istəyəndə Türkiyənin Xarici İşlər Nazirliyinin etirazı üzündən bu baş tutmadı: "Erməni soyqırımını tanımaq hər bir yəhudinin mənəvi borcudur. Biz müxtəlif təbliğat işləri aparırıq. ABŞ, Livan, Yunanıstandakı digər erməni lobbiləri ilə əlaqələr saxlayırıq. Lakin Ermənistan kasıb dövlətdir, nefti və qazı yoxdur. Ancaq bizim qonşularımızla heç kim mübahisə etmək istəmir. Onların enerji resursları çoxdur. Belə görünür ki, söhbət dollarlardan gedəndə tarixi həqiqət heç bir əhəmiyyət daşımır". Artıq İsrailin qondarma erməni soyqırımını tanıması istiqamətində ABŞ-dakı nüfuzlu yəhudi alimlər də fəaliyyətə başlayıblar. Corctaun universitetinin yəhudiəsilli professorları baş nazir Benyamin Netanyahuya ünvanladıqları müraciətlərində qondarma erməni soyqırımını tanımağa və türklərin Şimali Kiprin işğalına son qoymaq tələbini irəli sürməyə səsləyiblər. "İsrael Hayom" qəzetinin yazdığına görə, professorlar Yosi Kas, David Suriel, Yakov Kas, Ofer İsraeli Netanyahudan Türkiyəyə qarşı müəyyən tədbirlərin görülməsini də istəyiblər: "İmzalanmış müqavilələrə baxmayaraq Türkiyə İsrailin ən qatı düşmənləri sırasına qoşulmaq qərarına gəlib. Artıq heç bir sərhəd qoymadan addımların atılması vaxtı çatıb. İlk növbədə İsrail hökuməti ermənilərin soyqırımı tanımaq tələblərini açıq şəkildə dəstəkləyə bilər".Məsələ ABŞ mətbuatında da geniş şərh olunmaqdadır. "The Vashinqton Post" qəzeti yazır ki, artıq ABŞ-ın yəhudi icması Turkiyəni dəstəkləmir. Məqalədə vurğulanır ki, bu vaxta qədər yəhudilər Vaşinqtonda Türkiyənin maraqlarının qorunmasında fəal iştirak edirdilər: "2000-ci ilin oktyabrında Türkiyə hökuməti ciddi problemlə üz-üzə idi. Konqresin nümayəndələr palatasının sədri Dennis Xastert söz vermişdi ki, ABŞ-ın NATO-dakı müttəfiqi Türkiyəyə böyük zərbə ola biləcək qondarma erməni soyqırımının tanınmasını nəzərdə tutan qətnamə layihəsini səsverməyə çıxaracaq". Qəzet iddia edir ki, olaylara müdaxilə etmək üçün Türkiyə ABŞ-dakı ən nüfuzlu yəhudi təşkilatı olan Amerika - İsrail Komitəsinin sədri Yeydi Vismana müraciət edib. Sonuncunun sözlərinə görə, həmin vaxt təşkilatın telefonları susmaq bilmirdi: "Son anda biz Dövlət Departamentinin dəstəyi ilə prezident Bill Klintonu inandıra bildik ki, nümayəndələr palatasının spikerinə şəxsən məktub ünvanlasın. Həmin məktubda səsvermənin Türkiyə - ABŞ strateji müttəfiqliyinə ciddi zərbə vura biləcəyini söyləsin. Son anda göstərilən səylər nəticəsini verdi. Xastert qətnamə layihəsini gündəlikdən çıxartdı. Lakin son 4 ildə münasibətlər korlandığı üçün ABŞ-dakı yəhudilər Türkiyəni dəstəkləmirlər”.