GünAzTv: Rusiya Demokratiya və Əməkdaşlıq İnstitutunun Nyu-York nümayəndəliyinin direktoru, politoloq Andranik Miqranyan ermənilərə "başınızdakı paslı mismarı çıxarın" mesajını verdi.Nəhayət ki, son 100 ildə erməni təfəkkürü, psixologiyası və dünyagörüşü haqqında əsil həqiqəti dilə gətirməyi bacaran, öz millətinin gələcəyi haqqında sağlam təsəvvürlərə malik olan bir erməni tapıldı. Təəccüblənməyin! Nə qədər qeyri-adi görünsə də bu bir həqiqətdir. Doğrusu, Rusiya Demokratiya və Əməkdaşlıq İnstitutunun Nyu-York nümayəndəliyinin direktoru, politoloq Andranik Miqranyanın "Armİnfo" agentliyinə müsahibəsini nəzərdən keçirəndə elə mən də gözlərimə inanmadım. Eyni ifadənin üzərinə təkrar-təkrar qayıtmalı oldum. Aman Allah, doğrudanmı erməni xalqının təmsilçisi olan Andranik Miqranyan öz millətinin nə qədər dəhşətli bir xəstəliyə düçar olduğunun fərqindədir?...Miqranyanın müsahibəsi bütövlükdə Türkiyə-Ermənistan münasibətlərinə həsr olunub. Bu baxımdan müsahibənin ayrı-ayrı məqamları üzərində dayanmayacağam. Çünki Andranik Miqranyanın müsahibəsində yer alan, bəlkə də onun şəxsi təhlükəsizliyinə xidmət edən bütün məqamları bircə cümləlik həqiqətə qurban vermək olar. Beləliklə, Rusiya Demokratiya və Əməkdaşlıq İnstitutunun Nyu-York nümayəndəliyinin direktoru, politoloq Andranik Miqranyan deyir: "Türkiyə ilə münasibətlər erməni xalqının ekzistensial problemidir və münasibətlərin tənzimlənməsi olduqca böyük problemlər aradan qaldıra bilər. Düşünürəm ki, münasibətlərin normallaşacağı təqdirdə ermənilərin qafasındakı paslı mismar nəhayət ki, çıxarılacaq və ermənilər öz keçmişləri barədə təsəvvürlərlə yaşayıb ömür böyu dərd çəkmək əvəzinə nəhayət ki, gələcəyə addımlamağı bacaracaqlar. Bu gün Ermənistan dünyaya çıxış üçün bütün dünyanın arxa çevirdiyi İrana yeganə və etibarsız alternativ olan Gürcüstandan ağlasığmaz dərəcədə asılı vəziyyətdədir. Bu baxımdan, qonşularla münasibətlərin normallaşdırılması təkcə Ermənistan üçün deyil, dünyanın bütün dövlətləri üçün diplomatiyanın əlifbasını təşkil edir".Maraqlıdır ki, Miqranyan digər erməni politoloqlarından və siyasətçilərindən fərqli olaraq Türkiyənin hətta Dağlıq Qarabağ şərti ilə münasibətlərin tənzimlənməsinə razılıq verməsini də Ermənistanın böyük uğuru hesab edir: "Türkiyənin münasibətlərin normallaşması prosesində ön şərtləri var. Amma Ankaranın hansısa mərhələdə Türkiyə-Ermənistan və Azərbaycan-Ermənistan münasibətlərinin ayrı-ayrılıqda inkişaf etdirilməsinə razılıq verməsinin özü də Ermənistanın böyük uğurdur və bu uğuru qoruyub inkişaf etdirmək lazımdır".Şübhəsiz ki, Andranik Miqranyan Türkiyənin "hansısa mərhələdə" Ermənistanla münasibətlərini ayrılıqda inkişaf etdirməsinə razılıq verdiyini deyəndə, Dağlıq Qarabağ münaqişəsinin tənzimlənməsinin ilkin mərhələsini nəzərdə tutur. Təbii ki, söhbət Azərbaycanın Dağlıq Qarabağ bölgəsinin ətrafındakı rayonların boşaldılmasından gedir. Andranik Miqranyan Rusiya Demokratiya və Əməkdaşlıq İnstitutunun Nyu-York nümayəndəliyinin direktoru kimi başa düşür ki, işğal altındakı Azərbaycan əraziləri azad olunmadan Türkiyə-Ermənistan münasibətlərinin tənzimlənməsindən söhbət gedə bilməz və bu da faktik olaraq Ermənistanın özünütəcrid prosesinin gündən-günə dərinləşməsi deməkdir. Onu da qeyd edim ki, bu müsahibənin təbii qazla bağlı Azərbaycanla Türkiyə arasında imzalanan son müqavilələrdən və hər iki ölkə liderlərinin İstanbul bəyanatlarından sonra maydana çıxması təsadüfi deyil. Türkiyə-Azərbaycan münasibətlərinin yüksələn xətt üzrə inkişafına səbəb olacaq, hər iki dövlətin Avropanın enerji təhlükəsizliyindəki rolunun daha da gücləndirilməsi üçün əlverişli zəmin yaradacaq müqavilələr erməni siyasətində son zamanlar daha qabarıq şəkildə nəzərə çarpan depressiyanı artırıb. Ermənistanı Türkiyənin islam dövlətləri arasında nüfuzunun güclənməsi də ciddi narahat edir və erməni politoloqları bu narahatlıqları açıq şəkildə dilə gətirməklə yanaşı, baş verənlərin müsəlman ölkələrindəki erməni diasporunun fəaliyyətini xeyli məhdudlaşdırdığını bildirirlər. Erməni siyasətçilərinin əndişələndiyi digər məsələ isə ABŞ-Azərbaycan münasibətlərindəki irəliləyişlə bağlıdır. ABŞ-ın müdafiə naziri Robert Qeytsin Azərbaycana gəlişi, dövlət katibi Hillari Klintonun gözlənilən səfəri, Vaşinqton-Bakı əlaqələrinin genişləndirilməsilə bağlı prezident Barak Obamanın məktbutunda yer alan pozitiv ismarıclar da Ermənistanda şok effekti yaradıb. Görünür, regionda və dünyada baş verən proseslərə Kremlin gözü ilə, həm də Amerikadan baxan Miqranyanı açıq danışmağa vadar edən məqamların siyahısı sadaladıqlarımızdan daha genişdir. Yoxsa erməni əsilli politoloq bu qədər açıq danışmağa cəsarət etmədi. Hər halda paslı mismarları öz qafalarından çıxarıb-çıxarmamaq ermənilərin öz problemidir. Əgər çıxarmasalar..., o zaman region üçün paslı mismara çevrilmiş Ermənistanın özünü də kəlbətinlə ilk və son təmasda olmaq perspektivi gözləyir. Elçin Mirzəbəyli. Xalq cebhesi