İran "Amnesty İnternational"-ın illik hesabatında...

SON XƏBƏRLƏR

İran "Amnesty İnternational"-ın illik hesabatında...

2021.10.20, 07:36

Gunaz.tv

GünAzTv: "Amnesty İnternational" (Beynəlxalq Əfv Təşkilatı) dünyada insan hüquqlarının vəziyyətinə dair illik hesabatını açıqlayıb. "Ədalətsizlik boşluğu" adlanan sənəddə 159 ölkənin göstəricilərinə nəzər salınır. "Amnesty İnternational"ın bildirdiyinə görə, 111 ölkədə insan haqlarının tapdanması, 96 ölkədə söz azadlığının boğulması və 55 ölkədə qeyri-ədalətli məhkəmələrin keçirilməsi qeydə alınıb. Hüquq pozuntularının geniş yayıldığı ölkələr sırasında İran da xüsusi yer alıb. "Amnesty İnternational"ın hesabatını İranda Azərbaycanlı Siyasi Məhbusları Müdafiə Assosiasiyasının (ADAPP) nümayəndəsi Vahid Qarabağlı və Kanadada yaşayan soydaşımız İnsafəli Hidayət müzakirə edir. Güney Azərbaycandakı hüquq pozuntuları barədə söz açan Vahid Qarabağlı İrandakı mövcud hakimiyyətin artıq uzun müddətdir hüquq pozucuları sırasında ön cərgədə getdiyini bildirib. Bu sıraya müxtəlif növ təqiblər, həbslər, işgəncələr və qətllərin daxil olduğunu deyən soydaşımız İranda siyasi mübarizənin çox çətin şəraitdə keçdiyini vurğulayıb. İranda öz tarixi torpaqlarında yaşayan azərbaycanlıların "yaşıl hərəkat"da fəal iştirak etməməsini əsaslandıran Vahid Qarabağlı molla hökumətinə qarşı mübarizənin başlıca olaraq milliyyətçi xarakter aldığını söyləyib. Onun sözlərinə görə, əksər azərbaycanlılar mübarizəni etnik-mədəni müstəvidə görürlər və onlar İranda cərəyan edən ümumi siyasi mübarizənin hədəflərini bölüşmürlər. İnsafəli Hidayət isə İranda 2009-cu il iyunun 12-də keçirilmiş prezident seçkilərinin və kütləvi etiraz aksiyalarının ardınca vəziyyətin xeyli pisləşdiyini diqqətə çatdırıb. Onun sözlərinə görə, hakimiyyət "yaşıl hərəkat"a qarşı sərt metodlardan istifadə edərək, öz mövqeyini qoruyub saxlaya bilib. Amma cəmiyyətdə narazılıq hissi güclü olaraq qalır və müxalifət məğlubiyyətlə barışmayıb. Soydaşımız Azərbaycan türklərinin "yaşıl hərəkat"la bağlı yanaşmasının da səhv olduğunu bildirərək, Milli Hərəkatda demokratiya ideallarının geniş yer almamasından gileylənib. Onun sözlərinə görə, azərbaycanlı fəallar milli-mədəni hüquqlar uğrunda mübarizədə demokratik dəyərlərə də ciddi fikir verməlidirlər.

GUNAZ.TV

SON XƏBƏRLƏR