Amerika Suriya ilə bağlı yeni qətnamə hazırlayıb

SON XƏBƏRLƏR

Amerika Suriya ilə bağlı yeni qətnamə hazırlayıb

2021.10.20, 07:36

Gunaz.tv

GünAz TV: ABŞ Dövlət Departamenti (Amerika Birləşmiş Ştatlarının xarici işlər nazirliyi) Suriyada olan bütün vətəndaşlarını bu ölkəni tərk etməyə çağırıb.

Rəsmi Vaşinqtonun Suriya ilə bağlı hazırladığı yeni qətnamə layihəsinin artıq BMT TŞ-nın (Birləşmiş Millətlər Təşkilatının təhlükəsizlik şurası) daimi üzvləri və Ərəb dövlətləri liqasını (birliyi) Şurada təmsil edən Mərakeşlə birlikdə bağlı qapılar arxasında müzakirə edildiyi bildirilir. Yeni qətnamə layihəsində Suriyadakı münaqişə tərəflərini zorakılığa son qoymağa çağırış səslənsə də, silahı ilk olaraq hökumət qüvvələrinin yerə qoymalarının vacibliyi vurğulanır. Sənəddə Moskva və Pekinin tələblərini də nəzərə almağa səy göstərilib. Belə ki, Amerika yeni layihənin BMT TŞ-nın müzakirəsinə çıxarılan formal proseduradan ibarət olmasını və sonda Rusiya və Çinin sənədə veto qoymasını istəmir.

ABŞ prezidenti Barak Obama isə Ağ evdə keçirdiyi mətbuat konfransında Bəşər Əsəd rejiminin xalqın gözü qarşısında öz leqitimliyini (qanunilik, məşruiyyət) itirdiyi və tez və ya gec onun çökəcəyinə əminliyini ifadə edib. Ağ Ev rəhbəri bəyan edib ki, Suriyada hələlik hərbi müdaxilə olmadan keçinmək mümkündür. Onun fikrincə, ABŞ üçün bu ölkəyə qarşı birtərəfli formada hərbi əməliyyatlar həyata keçirmək yalnış addım olardı. Bu arada ABŞ dövlət departamenti Suriyada olan bütün Amerika vətəndaşlarına bu ölkəni tərk etməyi məsləhət görüb. Eyni zamanda dövlət departamenti amerikalıları Suriyaya olan hər hansı səfərlərdən imtina etməyə də çağırıb. Suriyada isə təhlükəsizlik qüvvələrinin müxtəlif şəhərlərində həyata keçirdikləri hərbi əməliyyatlarda ölənlərin sayı durmadan artır. Müxalifət fəalları Xoms, İdlib və Dəraada əməliyyatlar zamanı çoxlu sayda insanın yaralandığını və həbs olunduğunu xəbər verirlər. Sərhəd bölgələrində davam edən əməliyyatlarla əlaqədar isə xalqın əksəriyyəti qonşu ölkələrə qaçır. N.S

GUNAZ.TV

SON XƏBƏRLƏR