GünAz TV: Azadlıq meydanının yaxınlığından başlayacaq aksiya (yürüş) soyqırımı abidəsinin önündə sona çatacaq. müxalifət iqtidarın addımını təqdir edir.

Fevralın (February) 26-da Ermənistanın Xocalıda dinc azərbaycanlılara qarşı həyata keçirdiyi soyqırımının 20 ili tamam olur. Bu münasibətlə Azərbaycanda, həmçinin Türkiyə və digər bir sıra xarici ölkələrdə böyük anım mərasimləri keçiriləcək. Bunun üçün ilk dəfədir ki, iqtidar bütün potensialını işə salıb. Xüsusi ilə Türkiyədəki aksiyaya ciddi diqqət verilir. Əldə etdiyimiz məlumata görə hazırda Diasporla iş üzrə Dövlət Komitəsinin bütün diqqəti İstanbuldakı aksiyaya verilib. Komitə və tədbirin Türkiyədəki təşkilatlarının qarşısında bir hədəf var: Taksimdəki “Həpimiz Xocalıdanıq” aksiyasının “Həpimiz erməniyik” aksiyasından daha gur, daha izdihamlı olmasını təmin etmək.

Xocalı soyqırımına dair ən böyük aksiya Bakıda planlaşdırılır. Bu barədə xüsusi məlumat verilməsə də, “Yeni Müsavat”ın müxbirinə məlum olub ki, hakimiyyət cəmiyyətin potensialını səfərbər edərək, böyük bir göstəriyə hazırlaşır. 26 fevral günü səhər saatlarından başlayaraq bütün idarə, müəssisə, ali məktəblərin kollektivləri şəhərin mərkəzindəki “Park İnn” hotelinin çevrəsinə, Azadlıq Meydanının qarşısındakı fontanın ətrafına toplanmağa başlayacaq. Oradan, təxmin edilən 100 min nəfərin iştirakı ilə Xocalı abidəsinin önünə (Xətai metrosunun qarşısında yerləşir) qədər məsafədə yürüş-mitinq keçiriləcək. Yürüş-mitinqin önündə hakimiyyət təmsilçiləri, ölkənin əksər siyasi, ictimai təşkilatlarının təmsilçiləri, ictimai xadimlər və b olacaqlar. Məlumatda o da vurğulanır ki, hakimiyyətdən müxalifət düşərgəsinə də bu yürüş-mitinqə dəstək vermələri üçün mesajlar göndərilib. Aparıcı müxalifət qurumlarının bu aksiya ideyasına müsbət yanaşdıqları bildirilir.

Müxalifətin ən böyük güc mərkəzi sayılan İctimai Palatanın da Xocalı ilə bağlı milli birlik nümayiş etdirilməsini müsbət qarşıladığı vurğulanır. Məsələ ilə bağlı açıqlamasında İP Koordinasiya (həmahəngi) Şurasının üzvü Pənah Hüseyn bildirdi ki, İP Xocalı soyqırımı və digər milli məsələlərlə bağlı ümummilli birliyi vacib hesab edir və Xocalı ilə bağlı bu cür göstərişli aksiyaya müsbət baxır.

İctimai Palatanın özünün də Xocalı soyqırımı ilə bağlı xüsusi tədbirləri var. Belə ki, fevralın 25-də saat 12-də Müsavat Partiyasının qərargahında Xocalı soyqırımının 20 illiyi münasibətilə tədbir keçiriləcək. Fevralın 26-da isə saat 12-də İctimai Palata Xocalı abidəsini ziyarət edəcək.

Xocalı soyqırımının 20-ci ildönümünə görə Bakıda keçiriləcək tədbirlərlə əlaqədar paytaxtda bəzi yollarda hərəkət məhdudlaşdırılacaq. Bakı şəhər Baş Polis İdarəsinin Dövlət Yol Polisi İdarəsinin şöbə rəisi Vaqif Əsədov Lent.az-a bildirib ki, Xocalı soyqırımının 20-ci ildönümü ilə bağlı fevralın 26-da Bakıda keçiriləcək yürüş və anım tədbiri ilə əlaqədar abidəni ziyarət edənlərin rahat hərəkətini təmin etmək üçün həmin gün saat 07:30-dan tədbir bitənəcən paytaxtın Xocalı prospekti (xiyabanı) istiqamətində avtomobillərin hərəkəti məhdudlaşdırılacaq.

Azadlıq meydanı, Neftçilər prospekti ilə Xocalı parkı istiqamətində, həmçinin Azneft dairəsindən Neftçilər prospekti ilə hər iki istiqamətdə, Heydər Əliyev, Babək, Nobel, Zərifə Əliyeva, Puşkin, Yusif Səfərov, Nəcəfqulu Rəfiyev, M.Mehdizadə, Ayaz İsmayılov, Tağızadə prospekt və küçələrində nəqliyyatın hərəkətinə məhdudiyyətlər qoyulacağını nəzərə alaraq vətəndaşlardan xahiş olunur ki, şəxsi avtomobillərdən mümkün qədər az istifadə etsinlər. N.S