Sulduzda Milli Qiyamın 12-ci ildönümü mərasimində çox sayda azərbaycanlı fəal saxlanılıb

SON XƏBƏRLƏR

Sulduzda Milli Qiyamın 12-ci ildönümü mərasimində çox sayda azərbaycanlı fəal saxlanılıb – Siyahı

2021.10.20, 07:36

Gunaz.tv

GünAz TV: Güney Azərbaycanda baş verən Milli Qiyamın (May hadisələri) 12-ci ildönümü münasibəti ilə Sulduz şəhidlərinin məzarı başında düzənlənən mərasimdə çox sayda fəal saxlanılıb.

Bir neçə gün əvvəl sosial şəbəkələrdə elan olunduğu kimi, mərasim mayın 25-i, yerli vaxtla saat 17:00-da Sulduz qəbiristanlığında keçirilib. Lakin təhlükəsizlik qüvvələri mərasim baş tutmasın deyə şəhərin giriş və çıxış yollarını nəzarətdə saxlayıblar.

Məlumata görə, müxtəlif şəhərlərdən Sulduza gələn milli-mədəni fəallardan bir neçəsi Sulduz üçyolunda təhlükəsizlik qüvvələri tərəfindən saxlanılaraq Məhəmmədyar kəndinin Polis Bölməsinə aparılıb.

GünAz TV mətbuat mərkəzinə verilən məlumata görə, Sulduz üçyolunda saxlanılanlardan hələlik Məhəmməd Mahmudi (Təbriz sakini), Murtaza Məhəmmədi (Əhər sakini), Vahid Bəstami (Əhər sakini), Məhəmməd Qənbərzadə (Əhər sakini) və Murtaza Səfərinin (Əhər sakini) kimliyi müəyyənləşib.

Nasir Əhmədi, Babək Siyami, Səccad Şohiri, Əmir Səttari və Əli Xocəstə isə mərasimdən sonra təhlükəsizlik qüvvələri tərəfindən yaxalanaraq naməlum istiqamətə aparılıb. Xanım Ulduz Qasimi və onunla birlikdə olan daha 3 fəalın da mərasimdən sonra yaxalandığı bildirilir. Məlumata görə, xanım U.Qasimi ilə birlikdə olanlardan biri yaxalanarkən təhlükəsizlik qüvvələri tərəfindən döyülüb.

GünAz TV-yə daxil olan son məlumatda tutulanlar arasında Davud Mahmudi (Təbriz sakini), Rəsul Sələhşur (Təbriz sakini) və Cavad Yekanlının (Xoy sakini) da adı çəkilir.

Tutulan fəallardan birinin ailəsi tərəfindən verilən məlumata görə, Sulduz üçyolunda saxlanılan fəallar saat 12 radələrində Məhəmmədyar Polis Bölməsindən Sulduz şəhərinin Polis İdarəsinə aparılıb. Onun sözlərinə görə, fəallar “Ümumi asayişi pozmaq” kimi saxta ittihamla üzləşiblər, onların müvəqqəti azadlığa buraxılması üçün 100 milyon tümənlik mülki vəsiqə tələb olunur.

Hələlik mərasimlə bağlı tutulanların hamısının kimliyi müəyyən edilməyib, bu barədə hər hansı yeni məlumat əldə olunursa diqqətinizə çatdırılacaq.

Xatırladaq ki, bu günlər 2006-cı ilin mayında Güney Azərbaycanda baş vermiş hadisələrin ildönümüdür. İran dövlətinin rəsmi mətbuat orqanı olan “İran” qəzetində Azərbaycan türklərinin kobud şəkildə təhqir edilməsi kütləvi etirazlara səbəb olub. Azərbaycanlılar tərəfindən həyata keçirilən kütləvi aksiyalar qısa müddətdə bütün Güney Azərbaycan şəhərlərini bürüyüb. Bir həftədən artıq davam edən və 1 Xordad (22 May) hərəkatı adı alan aksiyalar zamanı onlarla azərbaycanlı şəhid olub, yüzlərlə insan yaralanıb və çoxsaylı insan həbs olunub.

2006-cı il mayın 25-də Sulduzda keçirilən dinc aksiyada Tohid Azəryun, Hümmət İsmzadə, Hüseyn Fəthipur və Əsgər Qasimi adlı 4 soydaşımız təhlükəsizlik qüvvələrinin açdığı atəş nəticəsində şəhid olmuşdur.

N.S

GUNAZ.TV

SON XƏBƏRLƏR