GünAz TV: Güney Azərbaycan Milli Azadlıq Cəbhəsi (GAMAC) keçən günlərdə terror qurbanı olan tanınmış yazar Rafiq Tağı barədə Bəyanat yayıb.

Bəyanatda deyilir:

"2011 –ci il noyabrın 23-də (azərin 2-də) Azərbaycanın tanınmış yazarı Rafiq Tağı fikir və söz azadlığından yararlanaraq öz fikirlərini sərbəst şəkildə ifadə etdiyi üçün, İran mollası Fazil Lənkəraninin din adı altında onun haqqında verdiyi terror fitvası nəticəsində iran  rejimi tərəfindən qəddarcasına qətlə yetirilməsi,  heç şübhəsiz ki, Azərbaycan dövlətinə və onun ictimai-siyasi qurumlarına ciddi xəbərdarlıq olmalıdır. Müstəqil Azərbaycan Respublikasında (Cümhuriyyət) İran tərəfindən belə bir  terror aktının (əməl) törədilməsi, əslində Azərbaycanda söz və fikir azadlığına qarşı həyata keçirilən terror aktıdır. Çünki, Rafiq Tağı hər hansı bir din əleyhinə çıxış etmirdi, din adına xurafatları tənqid edirdi və onun bu baxışı əslində sağlam cəmiyyətin formalaşdırmasına yönəlmişdi. Ancaq, fars molla rejimi dəfələrlə onu müxtəlif vasitələrlə hədələdi, ona qarşı ölüm fitvası verdi və onun qətlə yetirilməsini həyata keçirdi. Bu acınacaqlı hadisə bir daha sübut etdi ki, Rafiq Tağının fars mollalarının təbliğ etdiyi yalançı dinə fərqli münasibəti, əslində din pərdəsi altında İran tərəfindən təbliğ edilən cəhalət və qaranlığı dağıda biləcək güclü aydınlatıcı mövqe idi. 

Biz, Güney Azərbaycan Milli Azadlıq Cəbhəsi olaraq İran-fars rejimi tərəfindən Azərbaycan vətəndaşı və ziyalısına qarşı həyata keçirilən bu terror əməlini qınayırıq və hesab edirik ki, Azərbaycan dövləti İran rejimi tərəfindən Azərbaycan Respublikasında bəslənən terror yuvalarını tezliklə dağıtmalı və bu kimi qeyri-insani əməlləri törədənlərə qarşı daha adekvat (yetərli) cavab verməlidir. Bu hadisə onu tələb edir ki,  Azərbaycan dövləti İranın  Azərbaycandakı radikal islamçılara verdiyi dəstəyin durdurulması üçün ciddi və təxirəsalınmaz fəaliyyətə başlasın. Əks təqdirdə Azərbaycanda bu kimi terrorların sayı artacaq, çünki hazırda daxili və xarici siyasətində gərginlik yaşayan İran Azərbaycanın sabitliyini, demokratik inkişafini, getdikcə dünyada artan müsbət imicini (vəchə) görmək istəmir və Azərbaycandakı sabitliyi bu şəkildə pozmaq onun işinə yarayır.  Bü gün azərbaycan ziyalısı Rafiq Tağının terror edilməsi əslində iran molla rejiminin Azərbaycanın müstəqilliyinə, dövlətçiliyinə, ərazi bütövlüyünə, hakimiyyətinə və cəmiyyətə qarşı uzun illərdən bəri apardığı düşmənçılık siyasətinin tərkib hissəsi, Azərbaycana qarşı tez-tez səsləndirdiyi hədə mesajlarının daha açıq formada təzahürüdür. Əgər bunun qarşısı alınmazsa bu, Azərbaycanda yeni təhlukələrin başlanğıcı olacaq.

Bütün bunları nəzərə alaraq, Güney Azərbaycan Milli Azadlıq Cəbhəsi bir daha İran tərəfindən həyata keçirilən bu terror əməlini qınayır və bəyan edir ki, Güney Azərbaycanda yaşayan 30 milyon azərbaycan türkü bu kimi hadisələrə biganə qalmayacaq, İran molla rejiminin insanlığa, azad fikirliliyə, demokratiyaya qarşı yönələn bu kimi çirkin əməllərini bütün dünyada ifşa etməyə və rejimə qarşı mübarizəsinə davam edəcək.

Güney Azərbaycan Milli Azadlıq Cəbhəsi Rafiq Tağının terror edilməsi və həyatının itirməsi ilə bağlı millətimizə, bütün azərbaycan ziyalılarına və özəlliklə onun ailəsinə başsaglığı verir və inanır ki, bu cinayəti törədənlər və onun fitvasını verənlər millətimiz tərəfindən layiqli cavablarını alacaqlar."

Güney Azərbaycan Milli Azadlıq Cəbhəsi (GAMAC)

28.11.2011