GünAz TV: ABŞ (Amerika Birləşmiş Ştatları) təyyarədaşıyanı Suriya ərazi sularına yaxınlaşdı, Amerika vətəndaşlarına bu ölkəni təcili tərk etmək çağırışı edildi, Türkiyənin hərbi müdaxiləsi ehtimalı hər gün artır.

Suriyadan təhlükəsizlik qüvvələrinin hər gün onlarla insanı qətlə yetirdiyi haqda xəbərlərin gəldiyi bir vaxtda Ərəb Dövlətləri Liqası (ərəb ittihadiyyəsi) Bəşər Əsəd rejiminə yeni ultimatum verib. Təşkilatın xarici işlər nazirlərinin Qahirədə keçirilən toplantısından sonra Liqanın baş katibi Nabil əl-Ərəbi bəyan edib ki, Dəməşq xarici müşahidəçilərin ölkə ərazisinə daxil olmasına və onların fəaliyyətinə dərhal icazə verməlidir.

Əgər tələb bu günə qədər yerinə yetirilməsə o zaman təşkilata daxil olan ölkələr Suriyaya qarşı sərt iqtisadi sanksiyalara (təhrim) başlayacaqlar. Bura Suriyaya uçuşların dayandırılması, ölkənin Mərkəzi Bankı ilə əlaqələrin kəsilməsi də daxildir. Bildirilir ki, Dəməşq xarici müşahidəçiləri ölkəyə buraxmaq üçün ağır şərtlər irəli sürür, həmçinin tələb edir ki, bu missiyada Türkiyə yer almasın.

Xəbərlərə görə, noyabrın (November) 24-də Suriyanın bir neçə şəhərində ordu bölmələri ilə prezident Bəşər Əsədin əleyhdarları arasında baş verən kütləvi toqquşma nəticəsində 51 nəfər ölüb. Ölənlərin 13-ü mülki şəxs, 15-i müxalifət cəbhəsinə keçən əsgərlər, 23-ü isə təhlükəsizlik qüvvələrinin əməkdaşlarıdır. Əsas toqquşmalar Türkiyə ilə sərhəddə yerləşən Hums, Hama və İdlib şəhərlərində olub. Suriya ordusu ilə döyüşən əsas qüvvə Suriya Azadlıq Ordusunun silahlılarıdır. Nümayişlər və toqquşmalar dünən də davam edib. Londonda nəşr edilən ərəb qəzeti “əl-Qüds əl-Ərəbi” yazıb ki, Suriyanın ərazi sularına yan alan Rusiya hərbi gəmilərində bir qrup hərbi təlimatçı və S-300 raketləri olub. Raketlər Suriya rejimini mümkün beynəlxalq hərbi müdaxilədən qorumaq üçündür. Bildirilir ki, S-300 raketləri Suriyanın əsas hərbi bazalarını (payqah)  hava hücumlarından qoruyacaq. Həmçinin Suriyanın hərbi bazalarının ətrafında radar sistemləri də yerləşdirilib. Digər ərəb qəzeti “Asharq Al-Awsat” isə yazıb ki, İraqda Müqtəda əs-Sədrə bağlı olan “Mehdi Ordusu” Bəşər Əsəd rejiminə dəstək üçün Suriyaya ərazisinə göndərilib. Bu barədə məlumatı “Azad Suriya Ordusu” yayıb. Bildirilir ki, “Mehdi ordusu”nun bölmələri Homs şəhərində Bəşər Əsədin qardaşı Mahir Əsədin başçılıq etdiyi 4-cü diviziya ilə birgə nümayişçilərə divan tutur.

Xəbər verildiyi kimi, Rusiyanın Suriya sahillərinə hərbi gəmilər göndərməsinə cavab olaraq ABŞ-da Aralıq dənizi sularına özünün ən yeni təyyarədaşıyan gəmisini yola salıb. Dünənə olan xəbərlərə görə “Corc Buş” təyyarədaşıyanı Suriyanın ərazi sularının bilavasitə yaxınlığına çatıb, onu aralarında esminets də olmaqla bir neçə müxtəlif tipli gəmilər müşayiət edir. Təyyarədaşıyanın göyərtəsində onlarla qırıcı və bombardmançı var. Dövlət Departamenti (xarici işlər nazirliyi) isə Suriyadakı bütün Amerika vətəndaşlarını bu ölkəni dərhal tərk etməyə çağırıb. Hələlik Suriyaya beynəlxalq hərbi müdaxilə variantı rəsmilər tərəfindən istisna edilir. Lakin Türkiyənin Suriyaya mümkün müdaxiləsi ehtimalı daha çox müzakirə edilməkdədir. “The Financial Times” qəzetinin yazdığına görə hazırda Suriyaya hərbi müdaxilə barədə ən çox düşünən ölkələr Fransa və Türkiyədir. Lakin Ərdoğan hökuməti Fransa ilə ortaq hərəkət etməkdən çəkinir, hesab edir ki, Fransanın Liviyaya (Libi) müdaxiləsində əsas məqsəd bu ölkənin neftini ələ keçirmək idi. Məqalədə deyilir ki, Əsəd rejiminin getdikcə artan dəhşətverici davranışları Türkiyəni hər keçən gün müharibəyə daha çox yaxınlaşdırır. “Vaxtilə Ərdoğan Əsədlə yaxın münasibətlər qurmaq üçün ailəsi ilə birlikdə onunla istirahətə də çıxmışdı. Ancaq indi əsədi Hitlerə bənzədir. Türklər Suriyanın şimalında humanitar məqsədli dəhliz qurmaq variantını müzakirə edirlər, bu da türk əsgərinin sərhədi keçərək Suriya ərazilərinə daxil olması deməkdir. Digər tərəfdən Ərəb Liqası da Qəzzafi kimi indi də Əsədə hücumları artırıb. Bu da Suriyaya beynəlxalq hərbi müdaxiləni legitimləşdirən amillərdir”. Lakin qəzetin mövqeyinə görə Türkiyə Suriyaya müdaxilənin nə dərəcədə riskli ola biləcəyini də anlayır. Suriyanın PKK-dan Türkiyəyə qarşı istifadəsi də gündəmdədir.