GünAzTv: Rəmzlər siyasi qurumların və hərəkatların dolayısı ilə mahiyyətini açıqlayır, daşıdığı ideoloji dəyərləri göstərmiş olur.

”Azərbaycanın güneyində yeni bayraq yaranmayacaq. Oraya bu bayraq gedəcək”. (Elçibəy)

Veksilologiya adlı maraqlı elm sahəsi var. Bu elm bəşər tarixində indiyədək mövcud olmuş bayraqları öyrənərək onların anlamlarını və yaranma səbəblərini açıqlayır. Ən maraqlısı isə dünyada bayraq üzrə yeganə doktor ünvanını qazanmış şəxs siyasi elmlər üzrə professor Uitney Smitdir. Massaçusets ştatında “Bayraq Tədqiqat Mərkəzi”ni yaradan, bayraqlar üzrə ildə iki dəfə bülleten buraxan, yüzminlərlə sənədə, minlərlə bayraq kolleksiyasına sahib olan professor Smitin bu sahədən əldə etdiyi qazanc ildə 150 min dollardır. Bunları söyləməkdə məqsədimiz odur ki, professor Smitin xəbəri olmasa da, bizim xəbərimiz olmalıdır ki, uzun müddətdir ki Güney Azərbaycanda polemika mövzusu olmuş, lakin həllini tapmamış bayraq məsələsi nəhayət ki sonuclanmaq üzrədir. Belə ki, Güney Azərbycan türklərinin təmsilçisi funksiyasını daşıyan 18 qurum birgə bəyanat imzalayaraq Güney Azərbaycan Milli Hərəkatının simgəsi olaraq qırmızı rəng ətrafında təmsil olunmaq qərarına gəldiklərini açıqlayıblar. Hərəkat açısından bu çox önəmli qərar oldu. Bəyanatda deyildiyi kimi, Çağdaş Azərbaycan Milli Hərəkatı ya bütün təcrübələrini unudub İran İslam Cumuhuriyyətinin hakim olmayan qanadının rəhbərlik etdiyi "yaşıl hərəkat"a qatılaraq öz milli mahiyyətindən uzaqlaşıb tamamilə qeyri-milli bir mahiyyətə bürünəcək, ya susaraq hakim qara qüvvələrə dolayısı ilə də olsa, yardımçı olacaq, ya da bütün şovinist basqılara köks gərərək yaşıl-qara dilemmasından qurtulacaq, öz rəngini bəlirləyəcək, öz mahiyyətinə tutunaraq yoluna davam edəcəkdi. Rəmzlərin siyasi hərəkatlarda önəmli rol oynadığı bəllidir. Rəmzlər siyasi qurumların və hərəkatların dolayısı ilə mahiyyətini açıqlayır, daşıdığı ideoloji dəyərləri göstərmiş olur. Bu baxımdan qırmızı rəng həm İslamın qara bayrağından, həm də ki demokratik rejim tərəfdarları olduğu iddia edilən yaşıl hərəkatın simgəsindən fərqli olaraq xalqın özünün seçdiyi simgədir.

Qırmızı azadlığın simgəsidir.

Qırmızı heç bir təşkilatın mənimsəyə bilməyəcəyi və ondan istifadə edə bilməyəcəyi bir rəmzdir. Qırmızı bəy kimi yaşamağı özlərinə amal bilmiş Babək tərəfdarlarının simgəsidir. Bu baxımdan Güney Azərbaycan doğru seçim etdi. Bu seçimdə Traxturun da payının olduğu şübhəsizdir. Milyonlarla Azərbaycan türkünün ruhunu özündə birləşdirən bir dəyər daşıyıcısına çevrildi Traxtur. Xalqın bütünləşdirici ruhunun təmsilçisi oldu Traxtur. Ayrıca qırmızı rəng bir tərəfdən Quzey Azərbaycanın keçdiyi mərhələni xatırladır. Bəllidir ki, Fətəli Xan Xoyskinin rəhbərlik etdiyi Azərbaycanın Müvəqqəti Hökumətinin 21 iyun 1918-ci il tarixli qərarı ilə üzərində ağ rəngli aypara və səkkizguşəli ulduz təsviri olan qırmızı rəngli bayraq Azərbaycan Xalq Cümhuriyyətinin dövlət bayrağı kimi qəbul edilib. İndi də Güney Azərbaycanda bu mərhələ başlanıb. Qırmızı simgənin üçrəngli bayrağa çevrilməsi mərhələsinədək bütünləşdirici funksiya daşıyan bu simgənin qəbulu düşünürəm ki, təmsilçilikdə vahidliyə səbəb olacaq. Çünki indiki durumda güney azərbaycanlıların özlərini Avropada və ya digər yerlərdə Quzeyin bayrağı altında təmsil etməsi siyasi açıdan uyğun deyil. Ona görə də ötəri olaraq qırmızı simgənin qəbul edilməsi doğru addımdır və hər bir Güney Azərbaycan türkü Babəkin bayrağı altında birləşmənin ən uca şərəf olduğunu anlamalıdır.