GünAzTv: İran İslam Respublikasının Azərbaycan Respublikasındakı səfiri Məhəmmədbağır Bəhrami Azərbaycanda yürütdüyü diplomatiya barədə məlumat vermək üçün İranın dini mərkəzi sayılan Qum şəhərinə səfər edib. Mayın 24-də o, Qumda iqtidaryönlü ayətullah Hüseyn Nuri Həmədani ilə görüşüb.

GünAzTv mətbuat mərkəzinin “Media forum”-a istinadən yaydığı məlumata görə, səfir ayətullaha Bakıdakı “Fatimeyi-Zəhra” məscidinin sökülməsi ilə bağlı qərarın artıq ləğv edildiyini bildirib.

Məhəmmədbağır Bəhrami Hüseyn Nuri Həmədani ilə görüşündə daha sonra deyib: “Mən Azərbaycan Respublikasında yürütdüyüm diplomatiya barədə məlumat vermək üçün Quma səfər etmişəm. Mən İranın qonşu və dost Azərbaycan Respublikasındakı səfiri kimi bildirirəm ki, bu ölkə əhalisinin 90 faizindən çoxu müsəlmandır. Onların 70 faizindən çoxu isə şiələrdən ibarətdir. Azərbaycan Respublikası əhalisinin çoxu dindardır və bu ölkəyə hakim ümumi atmosfer də dini atmosferdir.

Azərbaycan Respublikasındakı bu dini atmosfer gündən-günə genişlənməkdədir və insanlar tərəfindən də rəğbətlə qarşılanır. Bu ölkədə dini mövzuları təbliğ edib yayan çox fəal məscidlər mövcuddur. İnsanlar da həmişə bu məscidlərə toplaşırlar. Fatimiyyə günlərində (Həzrət Fatimənin şəhadətə qovuşduğu günlər) iranlıların Bakıdakı hüseyniyyəsinə 2 mindən çox adam toplaşmışdı. Onların əksəriyyəti gənclər idi. Azərbaycan Respublikasında islam maarifi təbliğ olunmalı, yayılmalıdır ki, onlar da islam maarifi okeanı ilə tanış ola bilsinlər”.

2009-cu ildə Bakının Suraxanı rayonunun Yeni Günəşli qəsəbəsində yerləşən, tikintisi tamamlanmamış “Fatimeyi-Zəhra” məscidinin sökülməsi haqda məhkəmə qərar çıxarıb. Apellyasiya instansiyası və Ali Məhkəmə qərarı qüvvədə saxlayıb. 2010-cu ilin may ayında prezident İlham Əliyev məscidin Qafqaz Müsəlmanları İdarəsinin sərəncamına verilməsini tapşırıb. Dövlət başçısının bu tapşırığı iranlı ayətullahların “Fatimeyi-Zəhra” məscidi ilə bağlı müraciət və bəyanatlarından sonraya təsadüf edib.

İran İslam Respublikasının tanınmış ruhanisi, Üləmalar Məclisinin və Konstitusiyaya Nəzarət Şurasının keçmiş üzvü, Qum dini dairəsində fəaliyyət göstərən ayətullah Lütfullah Safi Qolpayeqani 2010-cu ilin may ayının əvvəllərində Azərbaycan Respublikasının prezidenti İlham Əliyevə müraciətində “Fatimeyi-Zəhra” məscidinin hücuma məruz qaldığını yazmış və bunun acınacaqlı hal olduğunu vurğulamışdı: “Allah eləməmiş, məscid sökülərsə, bağlanarsa, fəaliyyəti dayandırılarsa, bu artıq çox faciəli bir haldır. Bu addımın pis nəticəsi o əziz ölkənin imicinə ziyan vura bilər. Sizin kimi bir şəxsiyyətdən umacağımız budur ki, uzaqgörən siyasətiniz və tədbiriniz sayəsində bu növ fitnələrin və fitnə törədənlərin qarşısını alasınız”.

Məşhur iqtidaryönlü ruhani, ayətullah Nasir Məkarim Şirazi bu müraciətdən bir neçə gün sonra - mayın 12-də Qum şəhərində fiqh dərsində söylədiyi nitqində Azərbaycan Respublikasının hakimiyyətini hədələmişdi. O demişdi ki, Bakıda şiələrə məxsus məscidlər sökülür və bununla bağlı Azərbaycan Respublikasının bir sıra vətəndaşı ona müraciət edib: “Son vaxtlar Azərbaycan Respublikasından xəbərlər gəlir ki, hakimiyyət şiə məscidlərini yıxır və digər məscidləri də sökmək niyyətindədir. Biz Azərbaycan hakimiyyətinə bununla bağlı öz rəsmi mesajımızı yollamış, bu işdən əl çəkəcəklərinə ümidvar olduğumuzu vurğulamışıq.

Azərbaycan Respublikası dünyanın ikinci şiə ölkəsidir. Bu ölkədə əhalinin 90 faizi şiələrdən ibarətdir. Buna baxmayaraq sionistlərlə vəhabilər əl-ələ verərək bu ölkədə şiələrə qarşı fitnə törədirlər. İndi də məscidlərə əl qoyurlar. Biz burada açıq-aşkar bildiririk ki, əgər Azərbaycanda məscidlərin sökülməsi davam etsə, müqavimət hökmü verəcəyik. Biz həm də bildiririk ki, bu yolda ölənlər şəhid sayılacaq.

Biz hökumətlər arasındakı diplomatik münasibətlərə əhəmiyyət vermirik. Azərbaycan hakimiyyəti bilməlidir ki, şiələr din alimlərinin fərmanını gözləyirlər və alimlər hansı hökmü versələr şiələr onu yerinə yetirəcəklər. Biz hələlik bu barədə heç bir hökm verməmişik. Lakin haqqında danışdığımız məsələdə hər hansı dəyişiklik müşahidə olunmasa bu işi edəcəyik. Yaxşısı budur vəhabilərlə yəhudilərin əlaltısı olmayasız və öz ölkənizin sabitliyinə xələl gətirməyəsiz. Əks təqdirdə gələcəyiniz yaxşı olmayacaq”.